搭錯線：錯誤的時間遇上你: 番外篇：Felix視角（4）——免費勞工

「Felix，放學啦！」Heidi拍我個頭講。
 
「妖…瞓緊…」我不願起身，繼續瞓覺。
 
「喂！你應承我既野，唔係想走數呀嘛？」Heidi將我既手移開，令我個頭不禁撞到枱。
 
我立即起身，摸摸發紅既額頭。
 
「捨得起身啦咩？快啲執書包啦！我地冇咩時間！」Heidi催促之下，我迅速收拾書包離開學校。
 




Heidi 帶我嚟到一間破舊既地方，一打開門，迎面而嚟就係沙包。
 
「砰！砰！」拳館唔算大，左邊一排沙包，幾個人正係度狂揮拳，打到汗水飛濺。
 
空氣混雜住汗水味同皮革味，仲帶點焗促。
 
「阿爸，我揾左人嚟拳館幫手，你睇下掂唔掂？」Heidi將我推向叔叔面前。
 
我好似比人賣豬仔，講緊係不平等條約。
 




前題係我同Heidi，係連條約都冇簽，我係不知情情況下比人帶左過嚟。
 
眼前既叔叔身材魁梧，滿身肌肉，睇落唔野少。
 
「靖嵐，你眼光幾好！同學，你叫咩名？」叔叔打量我講。
 
「我叫李軒宇，Felix。」
 
「軒宇，你聽左靖嵐講，拳館依家唔夠人手，所以仗義過嚟幫手，叔叔真係唔該晒你！你之後既晚飯我就包埋，當係幫手既酬勞啦！」
 




「哇！真係多謝叔叔！」
 
「靖嵐會同你講你需要做啲咩！我依家要教人先！」叔叔講完呢句就離開左。
 
「喂！江靖嵐，我冇應承過嚟拳館幫手喎！」我瞪住Heidi。
 
「係邊個上堂抄功課比人發現，搞到我比人留堂？如果唔係你，我琴日咪可以返嚟幫阿爸手，仲要呢排咁忙，拳館又請唔到人，阿爸連飯都冇時間食！」Heidi抱怨。
 
「咁我今日幫你當打和囉！」
 
「你應承左我老豆，之後都會嚟幫手，咪反口呀！」
 
「我又幾時應承過叔叔？」
 
「頭先，阿爸話包晒你以後既晚餐！」




 
「怪唔知你係班上冇咩朋友，根本打橫嚟講！你都冇同我講過要長期幫手！」我聲量較大，引起旁邊既人注目，包括叔叔都望左呢邊。
 
「喂，你細聲啲啦！」Heidi 突然壓低聲線，眉頭皺得好深。
 
「之前就係唔夠人，阿爸忙到舊患復發，隻手都郁唔到，於是我先同阿爸話揾人幫手，但揾人邊有咁易喎，你都知男男女女都驚左我…」Heidi搓動手指講。
 
平時見開既Heidi總係好有殺氣，我從來都未見過依家既佢。
 
「我幾時要過嚟幫手？」我不自覺放軟聲線講。
 
「逢星期二、四、六。」Heidi 燦笑講。
 
「咁多㗎！」
 




「你既然應承左我，依家就要聽我吩咐，冇得SAY NO！」Heidi又變返平時凶神惡煞。
 
「咁我依家要做咩，Heidi姐？」
 
「檢查沙包，睇下有冇漏沙，漏左就係個邊拎個新掛上去。」
 
「你會同我一齊拎㗎嘛，冇問題啦！」我拍晒心口講。
 
「咩我同你一齊拎，男人老狗，呢少少野都拎唔到！我仲要做其他野！」Heidi 突然揮拳過嚟，我嚇到即刻縮起身，用手護住個頭。
 
早知頭先唔應該比佢打動到！
 
簡直自己跳入火海！
 
就係咁樣，風雨不改，就算轉左校，我依然過嚟幫Heidi手。





****
下星期5/12（星期五）開始第二季，​會同另一邊平台同步，包括加更都係，而時間會改逢星期一同五6點更新，多謝大家支持！