搭錯線：錯誤的時間遇上你: 第七十六章：對立
「Hailey，我有啲野想問一問你。」查利揚行埋我個位講。
啱啱返工，櫈都未坐暖。
「查sir，有咩事？」我微笑回道。
「想同你傾下分配工作。」
「查Sir，我地前日中史科開會，印象中已經有定論，想問仲有咩野你要補充？」我停止手上工作，望住查利揚道。
前日又唔講，係都要分開啲野嚟講。
「工作分配方面，放學之後你有冇興趣帶辯論學會？」
「學會印象中唔係我工作範圍內。」
「校長話我身為科主任，負責既野比較多，就建議辯論學會不如揾多個老師處理，我見你手頭上冇課外活動，所以先問下你。」
之前聽校長講，每個老師都有帶學會既機會，冇諗過咁快就殺上門。
睇嚟想準時收工都難….
「好呀，辯論隊逢星期幾練習？」
「逢星期四，放學4點 - 5點半，4A班房。」
「係呀，放學見！」查利揚微笑講。
笑笑笑，佢就開心，野就比新人做！
以前點解我會咁鍾意佢？佢只係A字膞既男人！
話時話，呢幾日都唔見佢戴眼鏡，冇左眼鏡既佢有啲睇唔慣。
冇眼鏡係靚仔左，但改變唔到，佢黑人憎既事實！
我睇一睇手機時間，夠鐘要落去當值。
同時借手機熒幕既倒影，去檢查自己模樣，確保外表整齊，畢竟學生會以老師為榜樣，
.
「前面2位同學麻煩停一停。」我講。
被我叫住嗰2位女同學越行越急。
我急步截停2人，原來係我個班既學生。
「Giselle, Tiffany, 前幾日同你地講完既野，你地又唔記得？」
「Tiffany，校規寫明唔可以用耳針，你依舊戴緊，當我之前講既野耳邊風？仲有Giselle，校裙唔到膝蓋。」我一邊講，一邊寫緊違規紙：「我會繼續記你地違規，你地已經儀容違規2次，再2次違規就要記缺點，今日記得去留堂。」
「Miss Lo, Giselle冇錢買校裙。」Tiffany講。
「佢條校裙係可以放落嚟，仲有Giselle記多個違規，學生不得化妝。」我冷冷講完，繼續當值。
沿途間，有唔少學生都被我截停，只要我做儀容當值老師，當日留堂班既學生就特別多。
「Miss Lo，儀容違反既人太多，我地都係隻眼開隻眼閉，留堂班學生太多，上面又會問咩事。」Miss Tsang講。
「咁佢地的確違反校規。」我理直氣壯講。
「有啲女學生瀏海過眉，少少就算啦，如果要捉，10個有8個都違規，當中你都捉左成5個。」Miss Tsang繼續講：「有時候，做野都要取得中庸之道，咪話我唔教精你。」
上一間學校，我就係對學生太寬鬆。雖然佢地成績係好，但係往往無視我講野，上堂傾偈做其他科功課不在話，就連交比校長查簿，佢地都趕到最後一刻。
有見及此，新老師必須樹立尊嚴，學生先唔會無視你，遵循我既教導。
只可惜當刻既我選擇無視Miss Tsang既說話，先招致後來既麻煩。
.
「叮噹叮噹…」
「各位同學再見！」
「Goodbye and thank you Miss Lo.」
我執完啲野，就去辯論班房。
查利揚一見我嚟到，就同班學生講：「呢位係盧正希老師，係啱啱新嚟，你地班馬騮唔好蝦人！」
一群學生眼定定望住我，然後紛紛拍手。
「查sir，我地唔蝦女老師！」有個男仔講。
「Rachel同Chris點解今日冇嚟？」查利揚問。
「佢地今日儀容違規去左留堂班。」有人回答。
「平時佢地都帶住辯論隊練習…Miss Lo，Rachel同Chris係辯論學會既主席同副主席，你日後有咩事可以搵佢地。不過你都可以搵其他幹事幫手。」查利揚同我逐一介紹幹事，然後再講：「日後你會好快適應到，呢到啲野冇其他學會咁複雜。」
學生在場，查利揚叫返我Miss Lo。
突然唔慣，佢冇再叫我英文名。
你梗係係話呢度冇其他學會咁複雜，呢啲呃人既說話我係唔會信。
「依家佢地會搵題目練習，你只要聽下佢地講野，比啲意見就得。」查利揚講。
學生分別分左正反方，開始討論，題目係：「功課多是否等於學習效果好？」
正方先發言：「各位同學，大家都知道『熟能生巧』呢句成語。功課越多，練習就越多，學生自然對知識掌握得更好。
反方立刻回應：「我地唔認同。學習唔係靠『量』，而係靠『質』。如果功課太多，學生根本冇時間消化知識，只會抄完交左，根本冇學到野。」
正方回應：「功課係一種鞏固學習既方式。上堂聽完老師解釋，如果冇功課跟進，好快就會忘記。就好似運動員咁，每日練習先可以保持狀態。」
反方反問：「試問正方作為學生，有冇試過因為太多功課而拖延，最後返到學校求其做？功課多只會令學生變得機械化，效果仲會適得其反。」
佢地繼續辯論，之後完左由我同查利揚評價佢地表現。
「各位太耐冇練辯論，水準仲係到！」查利揚讚完，繼續講：「正方表現唔錯，論點推論都合理，至於係反方同學，Jason講得幾好，太多功課延伸到拖延症，可以令人思考，不過你地明顯有私人感情係到，要注意下。」
「我第一次聽你地辯論，雙方表現都精彩。正方一開始提到熟能生巧呢個例子引人入勝，同埋運動員比喻用得好貼切。而反方論點重複講太多功課令學生揀抄，如果有多啲論點會再好啲。」
「咁Miss Lo同查sir，你地支持咩方？」Jason突然問。
「我當然正方。」我不假思索回答。
「我會係反方。」查利揚講。
「如果比少功課，學生好多時只會去玩，唔會自發溫書。反而多啲功課可以當練習，至少確保佢地有時間接觸返課本，唔會到考試先臨急抱佛腳，長遠嚟講係為佢地打底。」我即刻講。
「呢點我唔同意。你假設所有學生都係咁，其實唔公平。總會有自律學生，佢地會自己安排時間。而且學生唔只讀一科，如果每科都比太多功課，只會令佢地壓力爆煲，最後反而學習效果更差。」查利揚講。
「如果唔係靠功課督促，老師點樣確保所有學生有基礎？老師係透過功課，先知學生理解課堂內容有幾多，從而調整教學內容。」
「老師既責任係教佢地點樣去學。真正既學習效果，係學生自己願意吸收，而唔係靠功課堆砌出嚟既數字。功課應該係工具，唔係枷鎖。」
「所以就係要多做功課，學生先會吸收到知識，功課質同量可以成正比，有時堂上講解功課，佢地返去睇下書，理解完都可以好快做完功課。」
「有時候一份質素高既功課，已經可以睇到學生既長弱處，只要針對弱處出功課，一樣可以幫到學生學習。」
前排有啲同學細聲講：「查Sir講得都啱啲喎…」
另一邊有人低聲回：「功課真係太多啦，Miss Lo肯定唔知我地有幾辛苦，平時放學要補課補習，有時課外活動搞到成7點先返到屋企，都冇乜時間做功課。」
查利揚年資比我長，佢講既野其實冇錯，而令我語塞。
「三、二、一！我地宣布反方勝利！少功課！」一班學生狂呼。
「Miss Lo, 睇嚟我同你教學方式都幾唔同。」查利揚講。
我輕輕咬唇，然後禮貌微笑。
今次就比你贏，下次我一定要贏你！***另一邊平台過左60個LIKE，聽日會補更一篇，多謝大家支持！