搭錯線：錯誤的時間遇上你: 第七十七章：雨後的陽光

辯論學會結束後，我同查利揚一齊返到教員室。
 
「Hailey, 你陣間仲有冇野做？」查利揚行近我身邊講。
 
「我執埋啲野就行得….」
 
「嗡嗡嗡…」查利揚電話震動。
 
「查sir你不如聽電話先？」我講。
 




查利揚尷尬點點頭，就急忙離開。
 
我去完廁所，返嚟教員室個陣，就見到查利揚好急執野，之後急步離開。
 
我都夠鐘收工。
 
我出到校門口，前面查利揚行得好急。
 
仲未來得切追上去，眼前一幕卻令我停下腳步。
 




查利揚旁邊已經有人──Charlotte。
 
佢身穿黑色短版上衣，外搭格紋西裝外套，下身啡色長褲配黑色皮帶，簡潔又時尚。
 
加上Charlotte 換上一頭俐落短髮，睇落瀟灑又自信，帶著不容忽視的存在感。
 
下一秒，她忽然伸手，將查利揚攬入懷裡。
 
距離太遠，我睇唔清佢地面上表情，只見兩個身影緊貼在燈影底下，好似一幅定格既畫面。
 




我心口猛然一沉，雙腿像被釘死咁，動彈不得。
 
眼睛偏偏不聽使喚，死死盯著前方，明明想移開卻做唔到。
 
「Miss Lo? 你企係到做咩？」Miss Kwan既聲音忽然響起，將我扯返現實。
 
我勉強扯起嘴角，胡亂編左個藉口：「um…啱啱醒起漏左銀包上office，依家準備拎返。」
 
「咦？查sir同佢女朋友喎！乜佢地咁痴纏㗎，學校門口都攬到咁肉緊！」
 
「女朋友？」
 
「呢個咪佢女朋友囉，之前都見過佢接查sir收工。老實講查sir呢啲荀盤點會冇女朋友！佢地都拍左拖都有幾年，我諗佢地就快結婚，呢啲大單野等同我班好姊妹講先！」Miss Kwan準備拎手機影相。
 
「Miss Kwan, 頭先我見到你地班學生好似係教員室搵過你，你要唔要同我上返去睇下？」




 
我臨時突然編左一個大話。
 
「唉，返緊工個陣又唔問！等我影埋相先！」
 
「佢好似好急搵你，叫咪都叫左3次。」
 
「陣間落嚟先再影，我地翻上去！」Miss Kwan 無奈講完。
 
我不禁加快腳步離開。
 
上到教員室，由於唔見我所講既學生，Miss Kwan就向我抱怨錯失八掛好時機。
 
我扮拎返銀包，就離開教員室。
 




「唔好意思，Miss Lo，可唔可以傳返個波比我地！」籃球停在我腳踝旁邊，一位學生大喊。
 
不知不覺間，我已經行左去籃球場個邊。
 
「自己去執波啦！唔好麻煩Miss。」一把低沉有力嘅聲音響起，同時佢望向我一眼。
 
眼前既籃球教練廣闊既肩膊，結實肌肉，完美身材。
 
對比起以前，金髮修剪得乾淨俐落，眼神更充滿自信。
 
「Felix?」我抬頭問。
 
「Hailey?」Felix驚訝而燦笑講。
 
「Miss Lo同李sir識㗎？」一個學生插嘴。




 
「李sir以前都係呢間學校讀書，後來轉左校，佢係我師弟。」我講。
 
「今日就練完咁多先，仲有10分鐘，你地依家換衫同執野！」Felix大喊。
 
「我地好耐冇見啦！應該都有10年？」我坐係籃球場旁邊既櫈講。
 
「差唔多啦！你過成點？」Felix坐左我旁邊，飲完水講。
 
「中學畢業之後，去左教大讀中文，出面教左2年書，依家返嚟教。」
 
「我仲以為你會讀中史，做中史老師添。」
 
「Minor係edu的確讀中史，只係我major係中文，依家主教中文，兼教中史。」
 




「點解你會揀中文，唔揀中史？我印象中你中史成績好好。」
 
「我中文一直都唔差㗎！況且中史都係中文一部分，讀中文其實讀埋中史，中文再讀得廣啲。」我繼續講：「係呢，唔好淨係講我，你呢？」
 
「轉左校之後，成績再唔係最重要，我真係可以專注籃球。」Felix放懷笑住講。
 
「我仲記得我地遲到，你仲拉我去食茶記！你夢想係做籃球選手。」我忍唔住笑一笑講。
 
同Felix傾偈，總係可以令我放鬆。
 
「中五既我，真係距離夢想好近。個陣比港隊教練睇中左，邀請我加入港球，我真係好開心㗎！只係我太開心，亦都太勤力練習，導致膝蓋勞損好勁。」Felix抓抓頭，臉上掛住苦笑，繼續講：「做完手術之後，醫生同我講，冇辦法再做籃球選手，如果一再做高強度訓練，我諗我唔洗行路，用輪椅行都得啦！」Felix苦中作樂，仍然講笑。
 
我記憶入面既Felix，一直都係個陽光少年，永遠笑得咁開朗自信。可係，眼前呢個帶著苦澀嘅笑容，令我有一刻覺得，原來我地好耐冇一齊傾過偈。
 
「所以輾轉之下，你就做左籃球隊教練？」
 
「起碼我仲可以接觸到籃球，已經好開心。Hailey，中文老師真係你想做既事？」
 
「嗯….理想同現實有出入。」我無奈講。
 
「我頭先先撞到查sir，我走左….你地之後點樣？」
 
「咪普通師生關係囉！李軒宇，你以前都冇咁八掛㗎喎！」我輕輕拍左felix膊頭。
 
「關心下師姐啫！」Felix用手機睇時間，突然講：「死啦！我就遲到！Hailey唔同你講啦，我約左人，就嚟夠鐘！」Felix急忙收拾東西。
 
「你遲到既習慣咁多年都冇改過，哈哈！」
 
「笑下咪好，頭先見你皺晒眉頭，失晒魂咁行路！」
 
「你又知？」
 
「Hailey眉頭眼額我掌握晒….你等等先…喂！Heidi！我仲有5分鐘就到！唔好嬲唔好嬲！」話畢，Felix放低電話。
 
「女朋友？」
 
「嗯！」
 
「祝你地幸福啦！」
 
Felix 忽然又回過頭，眼神帶點狡黠但認真，語氣壓低：「查sir比你想像中，更加留意你。」
 
我愣住咗，心口微微一震：「Felix，你點知一個人有冇留意自己？」
 
Felix 笑咗，笑容依舊燦爛，但眼神卻透出一種睇穿人心嘅篤定。他用手指點咗點自己雙眼，語氣篤實：「眼神唔會呃人。」
 
我唔會忘記，中學時我唔開心，總有Felix係度；大學時期，出現既就係Jay。