搭錯線：錯誤的時間遇上你: 第七十八章：改變（上）

最近忙住出卷，所以成日OT。
 
Miss Kwan一時話我出得太簡單，一時又話我出得太難。
 
全部中文科老師出卷都冇問題，唯獨我出既卷，佢總係可以挑出好多毛病。
 
我伸懶腰，發現查利揚仲坐係位上，呢個鐘數好少見到佢。
 
做左咁耐有啲肚餓，反正都未出完卷，於是我開老友Foodpanda叫外賣，順便睇下有冇就嚟到期既coupon。
 




「買一送一優惠券，9月30號將到期。」
 
9月30號？
 
我睇睇手機日期，今日咪就係9月30號？
 
9月30號，係查利揚生日。
 
望住遠方正在工作既佢，按下「使用優惠券」鍵，然後繼續出卷。
 




「嗡嗡嗡…」旁邊既電話響起。
 
夠鐘落去拎外賣！
 
我拎住外賣返去教員室，只見查利揚紅著眼眶，揉揉眼後繼續工作。
 
點解生日都唔開心……
 
我搖搖頭，提起精神，逐漸靠近查利揚。
 




「我諗你應該都未食飯？」我將熱騰騰既飯盒放係佢枱頭。
 
查利揚瞪大眼睛後，展開微笑講：「Hailey，個飯幾多錢，我payme比返你？」
 
「唔洗啦，就當我請你食。」
 
查利揚拎起飯盒，行過去我座位。
 
「一齊食飯啦！」查利揚拉起旁邊椅子，坐係我旁邊。
 
我地默默食住飯，教員室只有食飯既聲音。
 
「Hailey，最近做野順唔順利？」查利揚講。
 
「還好啦！」




 
順利就唔會仲係到同你食飯啦！
 
最衰都係Miss Kwan！
 
「你有咩麻煩都可以搵我，畢竟我係呢到時間都算長，有咩都可以幫到手。」
 
你幫我？你唔比野我做都偷笑！
 
「好呀。」我繼續食飯。
 
「老實講再見返你，你係中文老師我都幾驚訝。」
 
「我個樣唔似老師咩？」
 




「我仲以為你會揀中史。」
 
我不斷篤檸檬茶入面既檸檬，低頭講：「原本係，但再排Jupas次序個陣，我改變左心意。」
 
成個教員室只剩下古舊冷氣機既嗡嗡聲。
 
我地都各自食飯，冇再傾偈。
 
查利揚食完飯之後，講：「既然你今日請左我食飯，咁下次我請返你？」
 
「唔緊要啦，今日係你生日…」我不自覺講左出嚟。
 
「你仲記得我生日？」查利揚抬頭講。
 
「你咁夜係到OT？女朋友冇約你咩？」我保持微笑講。




 
「如果我同你講，我依家冇女朋友呢？」查利揚拉近椅子，直盯我講。
 
我不自覺避開視線講：「um…查sir，Miss Kwan都話你拍左幾年拖啦！」
 
「呢個只係誤會，你唔好聽佢地講。」查利揚語氣堅定，同時帶住無奈既情感。
 
我打算點頭之際，卻回想起佢同Charlotte兩個身影緊貼在燈影底下。
 
「查Sir，我都明你想低調啲，但唔洗連同事都隱瞞喎！」我努力抱住開朗既語氣，低頭執好外賣飯盒。
 
查利揚搶去外賣膠袋，阻止我打繩結。
 
我愣左一秒，手仲停係半空。
 




佢靠近過嚟，距離近得連我呼吸都開始亂。
 
我望向佢，只隔住一層空氣。
 
「你唔信我唔緊要，我會證明比你睇。」話畢，查利揚就去扔外賣袋。
 
今日既查利揚，同8年前既佢，似乎有啲唔同。