搭錯線：錯誤的時間遇上你: 第七十九章：改變（下）

第二日，我掛住黑眼圈返到學校。
 
「請返你食，係琴日既飯錢：）」枱頭上外賣盒癡住既memo。
 
我立刻望向前面，只見查利揚笑咪咪望住我。
 
我勉強笑一笑，打開外賣盒，係三文治，同凍檸茶，標籤仲要寫住走甜少冰。
 
我每日返工，都趕住出門，好多時候早餐都係去便利店買包、三文治或者飯團。
 




唔通佢平時有留意我？佢又知我凍檸茶叫開走甜？
 
我望手上既包，到期日係後日。
 
眼前既三文治香氣撲鼻，係炒蛋同火腿既組合。
 
於是我獲得美味可口既早餐。
 
只可惜食完早餐，又有閒雜人等過嚟搵我。
 




「Miss Lo, 你知唔知Miss Wong準備生小朋友？」Miss Leung行過嚟同我講。
 
平時我同佢都唔係太多交集，點解會咁突然搵我？
 
「唔知喎，真係恭喜佢呀！」
 
「嚟緊可能辛苦你，你同Miss Wong教同一級中文，啲重要野又唔會叫代課做。」
 
嚟緊每級都有中文周活動，野不但未做完，仲要又多左。
 




「聽講代課淨係負責教書，嚟緊音樂比賽佢負責帶隊，校長好睇重今次比賽，希望唔會搵中我去帶隊！」Miss Leung繼續講。
 
「咁多老師，點都唔會搵中我地既！」我講笑道。
 
「係呢，我見到查sir今朝放左早餐係你枱上面喎！」Miss Leung 講。
 
仲諗緊佢咁好人同我講Miss Wong懷孕既事，原來過嚟就係為左八掛，同Miss Kwan fd既老師都係同類人。
 
「琴日我地OT，咁啱同Miss Lo講起，附近茶餐廳三文治好食，所以佢麻煩我，順便買埋佢個份，只不過係同事間互相幫助。」查利揚既聲音突然係我身後傳出。
 
「哦…咁又係！你不嬲有女朋友！」Miss Leung尷尬打圓場講。
 
「分左手。你地真係好關心我既感情狀況！」查利揚微笑講。
 
分左手？我一臉狐疑望向查利揚。




 
「查sir你一定可以搵過好女仔，洗唔洗我介紹？」Miss Leung不厭其煩講。
 
查利揚回道：「唔洗啦！因為我已經搵到一個好好既女仔。」話畢，查利揚對住我牽起嘴角，彷彿我就係佢口中嗰位女仔。
 
Miss Leung回應：「咁祝你成功啦！」
 
我整理耳邊旁邊既髮絲，個腦霎時當機，於是我急忙回應：「係囉係囉！今次可以結埋婚就好啦，哈哈！」。
 
「都要睇下對方接唔接受我先既，結婚遲啲先再算啦！不過你地都想睇我結婚喎！」查利揚望住我講。
 
「查sir, 我醒起仲有野未做，下次再傾！」Miss Leung急忙離開，似係為左避開未來既紅色炸彈。
 
查利揚望住我，輕輕笑左一聲，就離開左。
 




佢咩意思？
 
佢唔係笑緊我啱啱講既野？
 
點解我係查利揚面前，總係咁易緊張？
.
「Goodbye and thank you Miss Lo.」
 
「Giselle你同我出嚟。」我冷酷講。
 
Giselle急步跟隨我既步伐，跟到班房門外。
 
「Giselle，最近好多老師話你上堂瞓覺，仲有你仲未買新校裙？」我瞄向已褪色既校裙講。
 
「Miss Lo，你可唔可以比啲時間我？」Giselle垂下頭講。




 
「比時間？開學成個月，10月都已經到，你條裙未及膝蓋。」
 
「Miss Lo你再記落去，我真係有缺點…」
 
「咁你買校裙，及膝蓋咪可以唔洗記缺點。」
 
「唔係我唔想買…而係我屋企….」Giselle既淚珠係眼眶滾動，引起其他老師同同學既注目。
 
「總之下星期一，我一定要見到及膝校裙。」話畢，我就行去升降機方向。
 
返到教員室，我翻查Giselle既個人資料。
 
父母離婚，依家由母親撫養，有3個細佬妹。
 




經濟狀況：領取綜援。
 
唔通佢真係冇錢買校裙？
 
我係枱面上拎開一張又一張紙，終於搵到張粉紅色違規紙。
 
碎紙機運轉既聲音劃破寂靜，嗡——喀喀喀——粉紅色紙被撕裂成碎末。
 
我返埋位，開始翻查學生既背景、經濟狀況同學習進度。
 
Charles 記過2次缺點，Sandy 中文長年唔合格，Hannah 同 Giselle 都係領綜援…
 
呢一個月我除左教書，搞學會，出卷等等，好似都冇好好了解班上既學生。
 
睇嚟之後要去佢地屋企做家訪，特別係Giselle。
 
睇到咁多資料，眼睛都感到乾澀。
 
我收拾東西，就離開學校。
 
校門外，濃濃煙霧圍繞住一位女生臉龐。
 
起初我以為係學生，但當我睇清楚——
佢穿住白色背心，外搭米灰色西裝外套，下身一條剪裁俐落既深藍牛仔褲，加上白色高跟鞋。
 
煙霧散盡，Charlotte 既輪廓漸漸浮現。
 
佢抬起頭，眼神明亮，嘴角揚起：「Hi, Hailey.」