搭錯線：錯誤的時間遇上你: 第八十章：真相

「好耐冇見，唔知你仲記唔記得我，我係…」
 
「Charlotte.」我打斷佢既說話，然後繼續向前行。
 
「我今日唔係嚟搵阿揚，係特登嚟搵你。」
 
我停下腳步，回頭一望，Charlotte 接住講：「不如我地搵一個靜靜地既地方傾下偈？係關於阿揚。」
 
Charlotte 打開車門，我俯身坐進車內，門闔上的瞬間，外面的喧鬧全被隔絕。
 




車內充斥住淡淡花香味，同Charlotte身上散發既香味係一樣。
 
從車窗望出去，只見街上既人流越嚟越少。
 
旁邊既Charlotte專注駕駛既側面，其秀麗臉孔令我不禁望多兩眼。
 
一個連女生都吸引起同性，男人又點會捨得同佢講分手呢？
 
過左一陣，車輛停下。
 




「呢度係大圍一間好少人嚟既café，但你可以放心，啲野食好味。」Charlotte推開木製既大門，只見晚市時段，café卻非常冷清。
 
Charlotte 帶我行去店內行窗邊既座位。
 
「依家新出pizza，套餐加多20蚊就可以嗌埋，你地睇下有咩啱食先？諗好再㩒旁邊既鐘就可以㗎啦！」店員服務殷勤，已經係旁邊幫我地倒水。
 
「唔該，我地睇下先。」Charlotte 微笑講。
 
「Hailey你睇下有咩想食。」Charlotte 將menu轉向我既方向。
 




「咁我地A餐burger，另外加埋pizza?」我問。
 
「好。野飲我叫flat white。」
 
我按下旁邊既鐘點餐。
 
等待既過程中，剩下餐廳既背景音樂。
 
「依家播緊蕭邦既Nocturne 夜曲系列，以前我同阿揚成日都一齊聽。」Charlotte一臉陶醉，接住講：「我同佢既關係，好多人都話我地係青梅竹馬，但我覺得最貼切既講法，係指腹為『友』。」
 
「查利揚同你父母係朋友？」
 
「我地阿媽係中學朋友，當我阿媽話有左我個陣，過左2個月，阿揚媽咪都話有左小朋友。
 
佢地兩個話如果同性別，可以延續佢地友誼，做好朋友，相反如果係異性，男就叫Charlie，女就叫Charlotte，之後再睇下我地有冇緣分。




 
我同阿揚確實由細識到大，小學中學都係同一間。
 
唔點知點解係咪由細識到大既關係，我地好多野都會同對方講，關係就好似家人。」
 
「點解你要同我講呢啲？」
 
「因為我地既關係唔係你想像中咁樣。」
 
「咁點解你地之前係攬埋一齊？」我忍唔住衝出口講。
 
「我屋企破產，如果你有睇最近新聞，就會知喬氏集團被收購，最痴線係幕後主腦，竟然係我一個好信任既人。」Charlotte望住窗邊，冷笑講。
 
「阿揚只係安慰我，我地既關係就係屋企人同知己，唔想你誤會落去，懷疑阿揚既心意。」Charlotte 望向我，微笑講。
 




我攬拌住可可，沉思Charlotte 既說話。
 
但查利揚明明話佢地已經分左手…
 
「你有咩問都可以直接講出嚟，今日我約你出嚟，就係會解答你既疑惑。」
 
「你地有冇拍過拖？」
 
「從來都冇。係我任性，太過信佢…為左同嗰個人一齊，先同阿揚提出無理請求──扮拍拖，只可惜最後都被嗰個人背叛左。」
 
「咁點解查利揚會應承你？」
 
Charlotte 指向我，微微一笑。
 
我滿腹疑惑，指向我自己。




 
Charlotte點點頭，講：「我只係幫佢避開狂風浪蝶！」
 
呢排既疑惑頓時消失得無影無蹤，眼前既食物更讓我食指大動。
 
「新出pizza幾好食，你都試下？」我將pizza放落Charlotte雪白既碟上。
 
Charlotte 勉強一笑，咬左一啖講：「最近屋企發生太多事，都冇點食過好野….Hailey，你記得我嚟搵你既事，唔好同阿揚講，佢應該係想自己同你交代返啲野，只係作為過來人，我好清楚知，如果誤會唔即時解開，未來只會越嚟越大。」
 
我微笑點點頭，講：「好多謝你今日主動搵我。」
 
Charlotte 淡淡一笑：「唔洗客氣，你食多啲！我落去『呼吸』下先！」
 
我望向窗邊，只見煙霧再次在佢身邊縈繞，朦朧得幾乎融入夜色。
 




過咗一陣，花香與淡淡水果味再次飄返嚟。我回頭一望，Charlotte 已經返到座位，笑著講：「你食完啦喎！咁我地埋單啦！」我就同Charlotte一齊去收銀處。
 
誤會雖然解開左一部分，但望住前面既Charlotte，我心入面仍忍唔住諗，Charlotte 可唔可以順利走出自己既困局呢？