搭錯線：錯誤的時間遇上你: 第八十一章：衝擊

今日係學校統測最後一日，考完最後一科後，學生都非常雀躍，整個學校充滿住輕鬆既氣氛。
 
作為老師既我，見到學生咁開心，都替佢地感到高興，畢竟佢地真係好認真準備今次統測。
 
我係球場睇住自己班同隔離班既學生係到玩閃避球。
 
「Hailey，啱啱我去樓下買咖啡，順便買埋你個份，mocha多cream啱唔啱？」查利揚遞杯咖啡比我。
 
「你又記得我要嗌多cream既！」我驚訝講。
 




「當然，係個腦入面。」查利揚指住自己個腦講。
 
「嘻！」我地都相視而笑。
 
「今日啲咖啡好似冇咩味…」查利揚講。
 
「齋啡係咖啡味最濃！如果齋啡冇味，我呢杯多cream 咪係飲緊水？」我飲住mocha講。
 
「你唇角有Cream。」查利揚比左紙巾比我，同時指出位置。
 




我笑過收下紙巾。
 
最近查利揚成日都搵我傾偈，有時仲會請我飲野同送零食比我，當然我都有回禮比佢。
 
我地既關係都好似以前咁親近，彷彿咩事都冇發生過。
 
只係有件事我一直都唔明，Felix同Charlotte 都話查利揚好留意同緊張我，咁點解當年放榜個陣，佢話我係熟人個妹…..
 
我抹嘴角動作不禁僵化。
 




「Hailey，你有咩煩惱呀？見你皺晒眉頭咁喎！」查利揚問。
 
「哦...Miss Kwan囉！佢話中文周啲野唔洗我幫Miss Wong搞，反而叫我幫佢帶音樂會，我係呢到都完全冇帶活動既經驗…」
 
「音樂會幾時要帶隊？」
 
「11月6號，星期六。」
 
查利揚笑一笑，講：「佢星期六可能要照顧小朋友，佢單親媽媽嚟，最多我過嚟幫你。」
 
「但係你咪要特登返嚟？」我疑惑問。
 
「前輩幫後輩係應該既，更何況我同你咁熟，冇所謂啦！」查利揚講。
 
「都係唔好啦…我同Miss Kwan再傾下先！」




 
「3A班贏左一分！」
 
我忍唔住企起身拍手。
 
「Miss Lo同查sir睇落好sweet喎！」突然有學生大喊。
 
「最近我成日見佢地行埋一齊，佢地肯定係拍緊拖！！！」學生好興奮講。
 
「邊有呀！」我紅著臉講。
 
「你地咪蝦Miss Lo啦！」查利揚笑住講。
 
「哇！」球場傳出尖叫聲。
 




喊聲主人正係Tiffany，旁邊暈低既人係…佢好朋友Giselle。
 
我同查利揚急忙走上前。
 
「Giselle！」Tiffany不斷搖動佢既身體。
 
「Tiffany，你冷靜啲先！」我上前拉走Tiffany。
 
「因為你成日逼佢買校裙，依家Giselle依家先瞓係醫院！呢排Giselle已經忙住返part time，返完part time，都已經冇晒時間…於是佢就凌晨溫書……」Tiffany帶住淚腔既聲音講。
 
我當場愣著，原本緊握Tiffany既肩膀，亦逐漸鬆開手。
 
「Hail…Miss Lo，我已經call左白車，好快就會嚟到。」查利揚拍拍我膊頭，讓我回過神來。
 
「陣間冇堂，我會跟埋車。」我同查利揚講。




 
我深呼吸，望住一班學生大喊：「仲有你地散開，比啲空間比Giselle！同埋午息就嚟完，你地快啲返上班房，呢度我會處理！」
 
Tiffany 仍然不願離開，站在Giselle身旁。
 
「我同Miss Lo會睇住Giselle，你唔洗咁擔心！」查利揚安慰Tiffany。
 
Tiffany緊緊盯著我，然後被班上其他同學拉走。
 
「我陣間仲有堂……我放學會過嚟揾你。」查利揚用擔憂既眼神望住我講。
 
「我可以處理到，你去上堂先。」我勉強一笑講。
 
查利揚欲言又止，然後離開球場。
 




球場只剩下我同Giselle。
 
如果我鬆手啲，唔成日出違規紙比佢；
 
如果我可以多啲了解下班上學生既困難，而唔係忙住處理職務；
 
如果…..
 
等待救護車既時間，我不斷反思，自己到底係咪合格既老師？