搭錯線：錯誤的時間遇上你: 第八十二章：淚下擁抱

「你同病人咩關係？」
 
「我係佢老師，依家佢情況點樣？」
 
「病人因過度疲勞導致暈厥，建議休息，多飲水，補充體力就得。打完點滴觀察冇問題就可以出院。」醫生講。
 
「過度疲勞？」
 
「頭先檢查結果得出佢營養不足，平時應該食好少野，加上休息不足，頭先又進行劇烈運動，脫水低血糖情況先引致昏厥。」
 




「好，唔該醫生。」
 
我坐係Giselle旁邊，雙手緊扣五指，心中祈求Giselle要快啲醒返。
 
過左一段時間，當Giselle父母都仲未到，門口卻嚟左熟悉既人。
 
「佢依家情況點樣？」查利揚問。
 
「今日唔係有辯論學會活動咩？」我帶點疲倦既語氣講。
雖然我係同查利揚講左，只係佢比我想像中早嚟。




 
「我臨時取消左，主要見你面色唔太好。」
 
「我已經通知左Giselle父母，等埋佢地嚟就可以。」
 
「你不如抖下先？呢度我睇住就得。」查利揚講。
 
「唔洗，我要睇到Giselle醒返先。」
 
「乞嚏！Sorry…..咁我…..」




 
「Giselle！」突然中氣十足既男人聲音劃破病房既寧靜。
 
「點解我個女會上上下堂暈左㗎！我今日因為佢，又做少左幾個鐘野！」Giselle父親質問我。
 
「不如我地出去講？病房仲有其他病人。」我講。
 
我地一同出去走廊。
 
「醫生話佢過度疲勞，源於平時休息不足，食野又唔多，同埋佢做緊劇烈運動，所以先暈低。」
 
「好人好者點會暈呀？我一日係地盤開工，由朝到晚，咁撚多體力勞動，日曬雨淋，我暈都未到呢個死女包暈啦！」
 
「Giselle爸爸，Giselle仲係學生，但係我聽佢朋友講，佢呢排忙住返Part Time…」
 




「你係老師，對佢既時間仲多過佢老母對佢！學生有困難，你係老師，點解你唔幫佢？」
 
聽到Giselle爸爸既說話，我頓時語塞，因為我一早知Giselle屋企狀況。
 
明明我係最有能力幫到Giselle既人，卻一步步將佢推入深淵……
 
「Giselle爸爸，Giselle校外返Part Time，你有冇問過點解佢要咁做？」查利揚插嘴。
 
「咁我點知呀？」Giselle爸爸反駁。
 
「老師只可以負責校內既事，校外既事我地係唔會知，不如等Giselle醒返，我地一齊了解佢情況？」查利揚提議。
 
「見到佢冇事就得啦，我比完醫藥費就走！」
 
「你唔等埋佢醒返先走？」我問。




 
「你地睇住佢咪得，個衰婆就走唔開，我先被逼過嚟咋嘛！」Giselle爸爸調頭就走。
 
我呆愣站在原地，再望住未醒既Giselle，細聲講左句：「對唔住。」
 
「不如呢件事交比我處理，你依家需要休息。」查利揚講。
 
「我大個啦！我自己可以搞得掂！」我推開查利揚，並坐左櫈上飲泣。
 
查利揚默默企係我旁邊，絲毫冇離開既意思。
 
「有咩困難，我地一齊面對同解決。仲有嚴格嚟講，呢件事根本唔關你事，你只係盡左做老師既責任。」查利揚坐係我旁邊，溫柔摸著我頭頂上既髮絲。
 
「因為你成日逼佢買校裙，依家Giselle依家先瞓係醫院！呢排Giselle已經忙住返part time，返完part time，都已經冇晒時間…於是佢就凌晨溫書……」Tiffany帶住淚腔既聲音講。
 




耳邊中Tiffany既聲音不斷縈迴著。
 
我抽抽鼻子，紅著眼眶望住佢講：「呢件事係因為我而起……係我太嚴格，先搞到Giselle咁既樣……」
 
查利揚將我擁入懷裏講：「傻妹，你只係太盡責去做一個好老師，你盡情喊啦，我唔會睇到。」
 
「嗚……嗚嗚……做老師好辛苦！」我放聲大哭，同時查利揚温柔拍住我背部，並安慰我：「Hailey，你一直都做得好好，我都睇到㗎！」
 
 
唔知喊左幾耐，我抽抽鼻子，想鬆開鬆開查利揚既時候，我卻感覺炙熱既背部。
 
我摸摸查利揚額頭，再摸自己既額頭，發現佢熱到好唔尋常。
 
「Hailey？」查利揚喚道。
 




我依家先發現，原來查利揚已經面青唇白。
 
「查利揚，你依家即刻去樓下急症室睇醫生！你發燒啦！」我緊皺眉頭講。