搭錯線：錯誤的時間遇上你: 第八十三章：守候

「我地即刻落去樓下急症室！」我拉住查利揚隻手講。
 
「我呢啲小感冒，返屋企食少少藥就好快會好。」
 
「咩小感冒呀？你依家發緊燒，點得呀？」
 
「嗡嗡嗡…」旁邊手機響起，我接下電話。
 
「喂～」
 




「我係Giselle媽咪，你係咪Miss Lo?」
 
「我係呀，你好呀Giselle媽咪，Giselle佢依家仲未醒。」
 
「我啱啱收工，依家過緊嚟醫院。」
 
「請問你大約幾耐過到嚟？」
 
「半個鐘左右。」
 




「好，明白，咁我地陣間見。」
 
「Giselle都未醒返，我等埋佢醒返先走啦。」查利揚講。
 
乜佢仲硬頸過啲小朋友㗎！
 
我板著臉講：「既然你想等埋Giselle先醒，咁你都要做好榜樣，病左就要去睇醫生。」接著我企起身講「我依家等埋Giselle媽咪過嚟先走，依家同你落樓下急症室先！」
 
查利揚無奈一笑，被逼妥協既佢就跟我去左急症室。
 




「你係呢到坐低，有咩事就打比我！」我準備行既時候，感覺手腕被拉住。
 
我回頭一望，查利揚眼皮垂下，帶住疲憊既語氣講：「Giselle好快會醒返，你唔洗咁擔心。」
 
「你擔心下自己仲好啦！」
 
「快啲返嚟，我等你。」佢淡淡一笑講。
 
眼前既查利揚就好似一隻搖頭擺尾好乖既大狗，等主人出外回家。
 
我忍唔住笑一笑，拉拉佢隻手講：「我好快返嚟。」
 
我行過去升降機門前等，發現一位神色極度慌張既婦人，焦急望住樓層升降既數字，同時又望向手機時間。
 
佢既手機壁紙顯示同女兒既合照，相中人正係Giselle。




 
剛好升降機到達，我地同時入去，同時我已經按下樓層鍵。
 
如果我主動同佢打招呼，佢會唔會好似Giselle爸爸指責我？
 
我吞一吞口水，望向旁邊既婦人。
 
我微微張開口，問：「你….」
 
旁邊婦人望向我問：「你係咪Miss Lo，Giselle班主任？」
 
我稍為瞪大眼睛望向佢，一時之間講唔出任何說話。
 
隔左數秒，我先回答：「我係Giselle班主任，你係Giselle媽咪？」
 




佢點點頭，同時講：「我係電話估到你年紀，你把聲聽落好後生，怪唔知阿女咁鍾意你，成日係我面前提起你。Giselle依家係咪仲未醒？」
 
「係。由學校到醫院，佢都仲未醒。」
 
Giselle鍾意我？
 
無可能！我成日捉佢儀容違規，同埋佢平時上堂唔專心，又會叫佢答問題。
 
照計我應該係佢最憎既老師先啱？
 
此時𨋢門打開，Giselle媽媽急住行出去。
 
我拉住Giselle媽咪，講：「右邊先啱。」
 
我地到達病房時，見到醫生正同Giselle做檢查。




 
「Miss Lo，唔該你照顧我個女咁耐，依家我個人都到左，呢度我睇住就得。」
 
「我聽埋醫生點講先走。」
 
「唔洗啦，你男朋友唔係病左咩，快啲落樓下陪佢！忙住做野就會好似我咁，忽略身邊重要既人。」Giselle媽媽苦笑講。
 
「佢唔係我男朋友，仲有你點會見到...」
 
「頭先明明我就見到你地好痴纏，依家未係，唔代表將來，我要去睇Giselle，你都收工啦！你係一個好老師，睇左Giselle咁耐，今日真係辛苦你！」
 
我由衷一笑講：「Giselle媽咪，多謝你！」
 
我同Giselle媽媽道別後，行過幾步，忍唔住回望，只見佢緊握Giselle手，氣氛融洽。
 




我向前行，然後加快步伐，去揾一個差啲因為做野而忽略既人，佢依家仲等緊我。

************另一邊過左70個LIKE，聽日會加更一篇，多謝大家支持！