搭錯線：錯誤的時間遇上你: 第八十四章：遲來的告白

從升降機離開，遠處只見查利揚緊皺眉頭，單手按著額頭。
 
明明佢咁攰，又唔舒服，點解佢仲要過嚟揾我？
 
查利揚恰好抬頭，展現微笑，彷彿小病一場，示意我唔洗擔心。
 
但見到佢唔舒服，又點會唔擔心？
 
我走上前，坐係佢旁邊，並係手袋揾Pandol。
 




「Hailey你揾乜野？」查利揚用沙啞既聲音問。
 
「Pandol。我隨身都會帶住Pandol，急診室等咁耐，你不如食住Pandol先，你等一等。」
 
查利揚笑而不語望住我，讓我停低手上既動作。
 
「你做咩咁望住我？」我別過臉，不斷係袋揾野。
 
「感覺你真係大個女。」查利揚摸摸我個頭講。
 




我感覺臉頰一股熱意，同時手從袋中終於揾到Pandol。
 
於是我將藥放係查利揚手心。
 
望住查利揚食藥，我先鬆一口氣。
 
「唔該借借，私家車車禍，傷者合共2個人！」救護員大聲道。
 
查利揚立刻望過去，我跟隨佢既目光，傷者係中年男人同中學女生。
 




二人白色布料被血滲開，大片刺眼鮮紅。
 
「希望佢地無事啦…」我望向查利揚講。
 
只見眼前既佢臉色慘白，緊緊盯著車禍傷者。
 
我拍拍佢肩膊講：「查利揚，你冇事呀嘛？」
 
佢仍然望住女傷者，並全身顫抖。
 
「你依家臉色好差喎，睇嚟發燒發得好嚴重…..Pandol都頂唔到幾耐……依家突然又有車禍患者，不如我地去私家診所睇醫生啦！」我收拾好袋子後講。
 
查利揚捂著嘴巴點點頭。
 
我講：「你依家想嘔？」




 
佢搖搖頭，只係指住醫院門口。
 
我企起身，同時扶住查利揚一同離開。
 
「你今日係咪揸車過嚟？架車啪左係邊？」我問。
 
查利揚指門口既黑色車輛，虛弱咁講：「我食左藥揸唔到車，要揾代駕先得。」
 
「唔洗啦，我有車牌喎！車匙呢？」我滿有信心講。
 
查利揚瞪大雙眼，比車匙時講：「Hailey你考左車牌？幾時？」
 
「2年前，1 take過Pass。」我接過車匙講。
 




「我都考左2次先Pass…」佢喃喃自語。
 
「行啦！你平時睇開邊個醫生，我車你去啦！」上到車，我立刻問查利揚。
 
「依家咁夜，診所醫生都閂晒門。平時都係去藥房買藥食，食完好快好，你直接車返我屋企，應該仲有藥。」
 
「你住邊？」我問。
 
「沙田第一城。」
 
自從我考完車，今次係我第一次坐上駕駛座，並不自覺調整後視鏡。
 
當我諗住㩒導航既時候，查利揚已經早我一步㩒左。
 
「你放心揸，我係你隔離。」佢講。




 
太耐冇揸車，啲野都還晒比老師。
 
我都唔明頭先點解我咁有信心講可以揸車，會唔會成交通意外都成問題。
 
我深呼吸，啟動引擎，再望後視鏡。
 
「你只要望前面揸就可以，仲有我會幫你睇埋後面。」查利揚講。
 
聽完佢講，儘管手心冒汗，但我努力掌握揸車既節奏。
 
由於我慢慢揸車，導致原本20分鐘車程，變左40分鐘。
 
到左佢屋企樓下，我先發現佢瞓著左。
 




熟睡中既查利揚眉頭深鎖，呼吸忽快忽慢。
 
我靠近查利揚，輕輕鬆開佢既眉心。
 
「發惡夢？」我喃喃自語。
 
查利揚突然緊緊捉住我隻手，講：「唔好走…唔好走…我唔應該遲到…對唔住…..」
 
話畢，佢眼角泛起淚珠，緩緩流過臉頰。
 
我抹過佢既淚水，輕輕咁講：「我會係你身邊，唔會再走。」
 
儘管我手臂變得僵硬，但我唔敢郁動半分，生怕整醒查利揚。
 
唔知過左幾耐，查利揚張開雙眼，發現自己緊握我既手。
 
「你終於醒啦！」我鬆手講。
 
隨即，佢緊握我既手，講：「今次，我唔會再放開你。」
 
我心跳亂麻，講：「你…咩意思？」
 
眼前既場景彷彿回到8年前，只係我地位置對調。
 
「Hailey，你依家仲細，遇既人都唔多，我知呢個年紀好容易就會鍾意一個人，只不過….呢個人唔應該係我。」
 
「我同Hailey只係師生關係，校外最多咪係….熟人個妹。」
 
種種回憶紛紛湧進腦海中。
 
我同查利揚對視，佢堅定既眼神令我諗起佢生日講過既說話：「你唔信我唔緊要，我會證明比你睇。」
 
佢開口，繼續講：「正希，自從我地重逢，我發現你係我心中佔左好重要既位置。由第一次見你，到畢業之後，呢8年間，我冇一刻唔諗起你，所以我想講...我鍾意你。」