搭錯線：錯誤的時間遇上你: 第八十五章：八年未說出口的話（上）

我呆了半晌，不知所措。
 
咁點解8年前，佢拒絕我，而依家先同我講返清楚？
 
「我知，你一直望住既人，其實唔係我！」
 
腦海突然浮現Jay 苦笑既樣。
 
「我覺得你唔識愛人，所以，你根本唔愛我。」Jay離開時所講既最後一句說話。
 




我迴避查利揚炙熱既眼神，講：「你依家病到咁，頭腦都唔清醒，你淨係需要一個人喺你身邊。」
 
「正希，你以為我發燒先亂講？我已經等左成八年，每一日我都係到諗，你今日過成點…我只可以透過Hazel口中得知你既近況，當我知道你有男朋友個陣，個心簡直好痛好痛……」
 
「唔好再講！我依家好亂！到底你想點？八年前你明明就唔鍾意我！我只係熟人個妹咋嘛！仲有你依家都對我咁好，只係因為我家姐，先特別照顧我，放榜個陣你同Miss Tsang講既野，我記得清清楚楚！」我衝口而出。
 
車廂彌漫著沉重既氣氛。
 
冷靜過後，我低頭講：「你依家病到個人唔清醒，我陪你上去屋企，睇埋你食藥我就走。」
 




我地離開車廂後，不發一言。
 
眼前既查利揚腳步浮浮沉沉，令我不禁上前攙扶住佢。
 
「我見你唔舒服先扶住你，你住幾樓？」入到升降機後，我講。
 
「20。」
 
我按下20樓，同時正值放工時間，好多人湧入升降機。
 




我同查利揚被迫貼到好近，近到我清楚聽到佢胸腔入面急促而凌亂既心跳聲。
 
怦怦怦怦怦怦….
 
唔通佢同我一樣都好緊張？
 
升降機顯示20樓，佢行到B室前面，並掏出鎖匙開門。
 
映入眼簾後，旁邊鞋子整齊放係鞋櫃，桌上有一啲未整理既教案，成間屋以黑色色調設計，整體係好整潔既屋企。
 
「唔好意思，間屋有啲亂，冇諗過會比你見到呢一面。」查利揚急忙收拾桌上散開既紙張。
 
「唔緊要，我送到你返嚟，睇埋你食藥就走。你啲藥放…」我閂住門講。
 
「碰！」身後突然轉來一聲巨響。




 
我回頭一望，只係桌上既燈跌落地下，而查利揚步伐飄浮。
 
我立即上前扶住佢既手臂，問：「你間房係邊？」
 
查利揚指向走廊盡頭既房間。
 
當我進入查利揚既房間，右邊一個書櫃，滿滿既書本，左邊係書桌，書桌後面就係床。
 
「你瞓低先，藥箱放左係邊？」
 
查利揚躺在床上，講：「放左係…放左係廳….門口….電視下面個櫃，第2格….」
 
我衝出房間，翻找櫃子，盒子上日期卻褪色，部分藥物已經過期。
 




醫院又多人，依家9點幾，診所又閂晒門，藥房通常都收左鋪….去7仔應該買到啲應急既藥！！
 
「查利揚，你啲藥已經過晒期！我依家出去幫你買藥，你頂住先！你比埋條鎖匙比我！」
 
「鎖匙放左係…廳個將枱….」
 
「你除左發燒，頭痛，仲有邊到唔舒服？有冇喉嚨痛？」
 
查利揚半眨著眼睛，點點頭。
 
「我都係其他藥都買埋，陣間咳、流鼻水、嘔、肚痾就麻煩！」拋低呢句我就走左。
 
我跑到附近7仔，腦袋亂到分唔清先後，只係從貨架中不斷將藥一盒一盒拎落籃。
 
退燒藥、止痛藥、咳水、咳丸、肚痾、止暈藥……




 
結果貨架上每種藥都比我拎走一盒。
 
「小姐，咳藥水咳藥丸你都買晒？是但買一個藥效都係一樣。」收銀阿姨掃描到一半抬頭望住我講。
 
「唔洗啦，我全部都要。」
 
阿姨將啲藥執晒落袋後，講：「小姐，你需唔需要收據？」
 
「唔洗，唔該。」下一秒我就拎走藥袋。
 
我邁向勁急速既步伐，諗緊查利揚依家係咪病得好辛苦？洗唔洗打個電話比佢，睇佢咩情況？
 
當我諗住打電話既時候，卻收到家姐既來電顯示。
 




「喂～」
 
「喂！你打過嚟有咩事？」
 
「今日阿爸阿媽等左你勁耐，我同佢地講你OT緊。」
 
阿爸阿媽等緊我？
 
今日夜晚8點，家姐約左我地一家人食飯，我完全唔記得左呢件事！
 
「我打左好多次比你，電話飛晒去留言信箱，所以咪打過嚟搵你。」
 
「Errr…查利揚今日陪我做野，點知佢病左，所以我依家買緊藥比佢。」
 
電話突然傳來一陣沉默。
 
「Hailey，你仲記唔記得當年Charlie 比你盒pandol比你？」
 
「我仲記得，咁同依家有咩關…」
 
「當年你病完冇幾耐，佢就病左。你都知個陣pandol一盒難求，我先知原來嗰盒pandol，係佢手上僅餘一盒。」
 
「你講咩話？」電話隨著手心而顫抖著。
 
當年查利揚成盒pandol比左我，我仲以為佢仲有多，所以先咁做。
 
「我意思係…你好好照顧Charlie。當年我叫佢照顧你，只係佢照顧你既程度已經超乎我想像。」家姐淡淡然講。
 
「今次，就換我照顧返佢。」手心的抖震隨即停止，並牢牢握緊電話。