搭錯線：錯誤的時間遇上你: 第八十六章：八年未說出口的話（下）

話畢，我掛斷電話。
 
我到底對查利揚做左啲咩？
 
由一開始重遇，我已經想到佢劃清界線，其後更用同事態度對佢。
 
就算最近關係好左，只係查利揚不斷主動靠近我，照顧我，關心我，我先暫時放下過去既執著。
 
既然知道佢心意，我係咪唔應該再咁執著佢過去所過既說話？
 




只係呢8年，佢講既說話都好似心魔纏繞住我。
 
盧正希，當務之急都係照顧好查利揚，等佢好返先再問清楚佢！
 
當返到佢屋企，行入查利揚房間後，只見佢熟睡既樣子。
 
我準備好暖水同藥物，就輕輕搖醒佢，講：「食藥啦！」
 
「咳…你咁快返到嚟…咳…你慢慢行返嚟，你成頭都係汗啦！」





「仲好意思講我！」我係藥袋翻找藥物。

查利揚望一望我枱上既藥袋，講：「Hailey，你買左咁多藥？我食唔晒咁多！」

「咁我唔知你慣左食咳藥水定咳藥丸，同埋剩低既藥可以放藥箱，你下次病左都可以有藥食！」

查利揚笑一笑講：「咁我要咳藥丸。」

「你快啲食藥！記得食藥之前食埋呢包梳打餅！」





「如果我食完藥，你係咪就會走？」

「Um…等到你退燒先。」

查利揚微微一笑，一口水吞晒所有藥後，便躺在床上。

「瞓醒就好快好返，你好好休息。」我幫查利揚蓋上被子。

「Hailey，你可唔可以等到我瞓著先走？」查利揚用柔弱既眼神望住我講。
 
「你瞓著我就出廳，等到你退燒為止。」
 
「其實我病，好耐未試過比人照顧。」查利揚苦笑講。
 
「我係男人，亦都係家中既長男，自從細妹詩韻出世，阿媽就放晒所有專注力放落細妹身上。




 
詩韻可能意識到呢點，所以細個每當我病既時候，佢總係做我既傳聲筒；唔開心既時候，就嘗試氹我開心，例如送自己畫既畫，幾粒佢鍾意食既提子味糖。」查利揚淡淡然笑住講。
 
「咁詩韻同你關係都幾好呀，佢依家只係忙先少左關心你啫，同埋起碼你身邊仲有我照顧緊你，你唔係一個人。」
 
「詩韻已經去左個無憂無慮既世界，日日食佢最鍾意既提子味糖。如果詩韻冇因為個場意外，我諗我地一家一定好幸福。」
 
「Sorry，我唔知你細妹已經…」
 
「傻妹！咳咳咳…我都冇同你講過，你唔洗咁自責喎。」查利揚溫柔咁講。
 
「我出去斟杯水比你。」
 
我斟完水返房，見到查利揚再次熟睡。
 




我放下水杯係旁邊書桌，發現枱上數個相框。
 
第一張係一家四口既相，係鐘樓樓下影。
 
細個查利揚既樣貌同依家冇點變，唔同既係，相中既佢係掛住天真既笑容。
 
旁邊既女孩應該係詩韻，佢紮住雙馬尾，抱住燦爛既笑容，並舉出yeah手勢。
 
而父母企係子女身後，帶著慈愛既笑容。
 
第二張相，查利揚生日。
 
枱上面既蛋糕插滿左…共15支。
 
查利揚頭頂上帶著生日帽，鼻子沾著忌廉，而詩韻正在吮吸手指上既忌廉。




 
仔細一睇，詩韻同細個既我有幾分相似，因為佢有碧藍既雙眸，同時都係黑長髮。
 
第三張相，係詩韻單獨照。
 
背景係屋企，詩韻身穿白色連身長裙，光滑布料上，袖旁更有一顆顆珍珠作點綴，同時臉頰化上淡妝，整體睇落高貴優雅。
 
背景既模糊下，好似見到查利揚係角落。
 
當我拎起第三張相，仔細再睇下背景既時候，卻唔小心推翻旁邊既水杯。
 
我立即抽取紙巾抹乾枱面，而櫃桶恰巧打開，我怕水整濕入面既簿同紙張，於是拎出嚟睇下有冇濕。
 
「啪嗒——」有野從簿中跌出嚟。
 




我低頭一看，卻見到中五既自己——Christmas Party同查利揚既拍立得合照。
 
我仲記得個陣同查利揚二選一拍立得，我揀左比心心既相，而呢張係…我單方面望向查利揚，而查利揚微笑望向鏡頭既相。
 
簿封面上寫住 Diary (2020)，中間更夾住手製而發黃既書籤。
 
我抱住睇下日記簿有冇濕，而打開日記簿。
 
「直道相思了無益，未妨惆悵是清狂。」書籤上熟悉既字跡吸引我注目。
 
呢個咪係選科講座個陣，派剩既書籤？
 
八年間，我地不但搭錯線，仲將好多未講出口既說話，一圈一圈，結成多個亂團。

********
好突然過左80個LIKE，聽日會加更一篇，多謝大家支持！