搭錯線：錯誤的時間遇上你: 第八十七章：查利揚視角——慢慢靠近

我緩緩張開眼皮，感覺額頭上有一股冰涼既感覺，伸手一摸，係濕毛巾，感覺好似換左冇耐。
 
我眼望四周，完全唔見Hailey既蹤影。
 
胸口突然有種悶痛既感覺。
 
佢話會陪我直到退燒為止，的確佢係有遵守諾言，況且佢今日都要返工…
 
陽光毫不留情照射到我既臉上，令我不得不拎起頭上既毛巾，準備起床。
 




當我走出房間，見到Hailey係到煮緊野食。
 
我病到開始有幻覺？
 
Hailey仲係我屋企？佢唔洗返工咩？
 
我望向客廳既鐘，正顯示11點37分。
 
我不禁揉揉眼睛，Hailey恰巧轉身望向我，並講：「起身啦？你刷牙洗臉之後就可以食粥。」
 




睇嚟眼前一切唔係幻覺…
 
Hailey仍然著住琴日既白色吊帶連身裙，頭髮盤起，側邊既髮絲垂下，睇嚟佢照顧左我成晚，都冇走過。
 
手心中既凍毛巾仲係濕潤。
 
「你唔洗返工咩？你幫我請左病假？」我急忙問。
 
「嘻嘻…今日星期六…你快啲刷牙洗臉啦！」Hailey笑完，就轉身繼續煮粥。
 




胸口好似比頭先舒坦左。
 
我伸伸懶腰，梳洗後就同Hailey一齊食粥。
 
眼前一切都好似夢，美好到好唔真實。
 
「啲粥唔啱你食？」Hailey 望我個碗冇點郁既粥，再抬頭問我。
 
「唔係，好好味。」我開懷笑住講。
 
同Hailey對視既瞬間，我隱約見到佢微微發腫既雙眼，唔知係咪我錯覺？
 
「我見你食得咁慢，仲以為你唔舒服食唔落，又或者係我煮得唔好食。」Hailey 輕輕一笑，繼續食粥。
 
「第一次食到你整既野食，想慢慢食。」我淡淡笑住講。




 
「只係好簡單既白粥，再加多左啲鹽啫！」Hailey無奈笑住講。
 
「我真心覺得好食㗎，啲粥你都煲到好綿。」我舉左拇指。
 
「你係咪仲發緊燒？」Hailey突然上前摸我既額頭，細聲嘀咕：「啲粥一啲都唔綿喎！好水喎！」
 
Hailey 對上我既眼，我地持續望左對方一陣子。
 
我清楚望到Hailey雙眼，眼角微微泛紅。
 
佢琴日係咪喊過嚟？因咩原因喊？
 
「睇你依家咁精神，都唔似發燒，陣間再探下熱。」Hailey講完呢句話，就繼續低頭食粥。
 




「你食完粥係咪返屋企？」我問。
 
「你都冇發燒，睇返啲藥幾時食就冇問題啦！」話畢，Hailey 將剩低既粥倒晒入口。
 
「我第一次覺得病係咁開心，因為有你係我身邊。」我望住Hailey講。
 
眼前既佢瞪大雙眼，口中既粥尚未吞落去，因此臉頰脹鼓鼓。
 
過左幾秒，佢吞下粥，面色凝重講：「我知你琴晚既說話都係認真，最近我都感受到你既好意，只係我需要時間去諗清楚我地既關係。」
 
Hailey 停頓半刻，深呼吸繼續講：「8年前，你係我家姐朋友，我當你哥哥；你係我中史科老師，我當你老師。8年後，我同你係同事同朋友關係。我想撇除呢啲關係，去認識真正既你。」
 
眼前Hailey 眼神無比堅定。
 
我就知道，Hailey 係一個好慎重而思考長遠既女仔，同佢一齊既時候，係我可以放鬆既時間。




 
「唔緊要，我尊重你既決定，你慢慢諗。當你準備好，我隨時Ready。」我緩緩說出。
 
「多謝你。」Hailey 淺笑講。
 
「你快啲返去休息，我知你已經照顧左我成晚。」我輕聲講。
 
「嗯，你記得準時食藥。」Hailey收拾袋子講。
 
「我送你去到lift。」我講。
 
「唔洗啦，你病緊就留返係到休息，我走先。」Hailey行到門前。
 
「星期一見。」我講。
 




Hailey 抱住甜美既笑容，向我揮手。
 
食藥既時候，一諗起Hailey，藥都好似冇咁苦。
 
睇嚟下星期一好快病好，可以返學校，第一次咁期待返工。
 
［查利揚視角完］