搭錯線：錯誤的時間遇上你: 第八十八章：用心去看

當我拎住7仔三文治，準時返到學校既時候，遙遠既距離就見到熟悉既身影正在工作。
 
今日同平時既佢一樣，除左戴上口罩，髮型照舊gel側分，加上筆直既西裝，睇落尚算精神。
 
我放好袋同早餐係枱之後，就朝向佢前進。
 
「見你今日咁精神，睇嚟病好左好多。」我微笑講。
 
「還好啦！個日好彩有你係到，真係唔該晒。」查利揚回應。
 




「唔洗客氣，我要準備去當值，要行先。」話畢，我去校門做儀容當值。
 
隨住時間流逝，越嚟越多學生回校。
 
前面戴圓框眼鏡既女學生瀏海過長；著住寬鬆冷衫既男學生褲長過短：拎住筆記既女學生裙子高過膝蓋……
 
以往既呢啲儀容違規既學生我都會截停，今日佢地卻一一經過我身後，順利進入學校範圍。
 
Miss Tsang突然截停一個男生，講：「Jack，你個亂毛，我上次咪講左，叫你電返直，點解今日我見到都係亂毛？」
 




「Miss Tsang，我講左好多次，都話我個頭係自然捲，天生爆炸頭，你唔信問下Billy。」
 
「Miss Tsang，我同Jack同一間小學，佢細個真係亂毛㗎！」Billu馬上幫口。
 
「你個頭點睇都似電喎！」Miss Tsang近望Jack個頭。
 
「或者你有冇細個既相做證據？單憑你朋友片面之詞，我同Miss Tsang 好難判斷你地講既真偽。」我上前講。
 
「我梗係有細個班相啦！聽日就攞返嚟！」Jack堅決講。
 




「前題我同Miss Lo兩個一致同意先得，仲有你地成日打鐘前返，快啲上班房！」Miss Tsang命令後，Billy同jack就飛快跑上班房。
 
完左當值，收拾枱上既東西時，Miss Tsang講：「Miss Lo，今日既你好似同以往有唔同。」
 
「老師都係人，唔可以淨係睇表面。只有用心先能夠睇得清楚，肉眼係睇唔到本質既。」
 
「Miss Lo睇嚟好鍾意睇小王子。」
 
「呢句係我人生座右銘，有時候當局者迷，如果用心感受，或者可以睇到事情另一面。」
 
「我地就睇下Jack講既野係咪真，或者今次可以睇到你所講既另一面，況且校規不外乎人情。」
 
「你講得啱。」
 
「所以今日少左好多違規學生。」Miss Tsang笑一笑講。




 
當值後上到班房，見到全班返齊，唯獨差Giselle。
 
雖然我知佢星期五過勞，但照計家長會打嚟學校同校務處講聲。
 
當我處理完班務，打算離開班房既時候，Tiffany上前，令我停止腳步。
 
「Tiffany，我地出去先講？下堂老師陣間要入嚟上堂。」
 
Tiffany望望課室門外老師，自然同我出班房外講。
 
「Sorry Miss Lo，Giselle暈個日我太激動，語氣唔太好，只但係……但係你真係要幫Giselle，得你先幫到佢！」
 
「Tiffany你慢慢講，我依家聽緊，係咪Giselle有咩事？」
 




「Giselle明明話今日返學，唔知點解今日唔見佢！」
 
「佢之前仲有冇同你講過啲咩？」
 
「佢淨係話佢阿爸逼佢辭依家份兼職，叫佢返唔知咩工。」
 
「佢有冇同你具體講過工作性質係咩？」
 
「我都唔知……Miss Lo，我真係好擔心Giselle！」Tiffany 紅住眼眶講。
 
雖然好多老師都覺得Tiffany係冇禮貌既學生，成日上堂串佢地，但朋友嚟講，佢絕對係有義氣既好朋友。
 
「你先返班房上堂，我會聯絡Giselle，唔洗咁擔心。」
 
「我點可以唔擔心，你根本唔了解Giselle佢爸爸！」Tiffany 跺跺地講。




 
「Tiffany，學生既職責係要專心上堂，你本身搵我，都係對我有信心㗎嘛！」
 
Tiffany 欲言又止，最後吐出：「咁好啦Miss Lo，你一定要揾到Giselle。」
 
睇嚟放學要進行一次家訪。
 
*******
過左90個like，聽日會加更一篇，多謝支持！