搭錯線：錯誤的時間遇上你: 第八十九章：家訪

「你所打既電話暫時未能接通，請遲啲再打過嚟……」
 
無論我打去Giselle，定佢父母，都去晒留言信箱。
 
翻查學生資料，Giselle屋企住係樂富既屋邨。
 
幸好今日放學唔洗開會，完成晒今日既工作，我搵左Miss Tsang同佢講一講Giselle情況，佢本來想等埋我一齊去家訪，但臨時要開會。我越諗越唔放心，實在等唔切，只好先行一步，前往 Giselle 屋企。
 
當我上到Giselle屋企，就按下門鈴。
 




「叮鈴……叮鈴……叮噹……」
 
「叮鈴……叮鈴……叮噹……」
 
「叮鈴……叮鈴……叮噹……」
 
當我打算轉身離開時，門後卻傳來開門聲音。
 
「大佬大佬，比多2日比我，小弟一定還到錢！」一個不修邊幅既年輕男人打開門縫講。
 




接著男人一臉驚訝，問：「小姐，你咁生面口，邊間財務公司？」
 
「請問係咪張樂宜Giselle屋企？」我冷冷地問。
 
「係呀，你係？」
 
「我係佢既班主任，姓盧。事關今日Giselle 今日冇返學，而學校未有收到任何電話通知，身為班主任，我係有責任了解學生發生咩事，所以特登上嚟做個家訪。」
 
「盧老師，你入嚟先講。」男人立刻打開門，然後急住閂門。
 




男人講：「我係Giselle阿哥，你叫我Henry 得啦！盧老師洗唔洗飲杯茶？」
 
「唔洗啦，我想問Giselle喺唔喺屋企？」
 
「唔喺，佢返左工。」Henry拎住報紙，打開財經報講。
 
「返咩工？」
 
「輕鬆高薪工！」
 
「你好講清楚咩工？」我上前拎走Henry 報紙講。
 
「咪去陪酒囉！飲下酒，輕輕鬆鬆袋千幾，幫我同老豆還債！」Henry立刻搶返報紙，並睥我一眼。
 
「你叫佢返呢啲工㗎？」




 
「返咪返？我都好想同人飲下酒，就賺咁多錢！」
 
「邊個人叫佢返呢啲工？」我努力沉住氣問。
 
「我又點會叫得郁Giselle，梗係老豆出馬啦！」
 
「Giselle依家返工既地址係邊到？」
 
「我又點知啫，夜晚會就返嚟掛？盧老師，你有冇廿蚊，我仲差少少錢買個叉雞飯！今日成日乜野都未落過格！」
 
「你依家即刻打電話比Giselle 爸爸，我要問佢拎地址。」
 
「打完電話，我係咪有錢收先？」Henry奸笑講。
 




「你係我面前開住speaker打。」
 
「好，即刻打。」Henry拎起電話。
 
「嘟嘟嘟…..喂！老豆！」Henry傳電話比我。
 
「開緊工㗎！咁急打比我，係咪有好馬益我？」
 
「喂，Giselle爸爸，我係姓盧，係Giselle班主任，之前我地係醫院見過面。」
 
「我記得你！搞到我個女體育堂暈既垃圾老師！」
 
「我要澄清返，Giselle係因為做兼職，同時兼顧考試，所以係體育堂先過勞暈倒。」
 
「算鳩數！做乜用我個仔個電話打比我？」




 
「想問Giselle今日去左邊到返工？」
 
「我冇必要同你交代，張樂宜係我個女，又唔係你個女。」
 
「今日學校完全收唔到樂宜缺席原因，如果冇合理理由，我會當樂宜今日曠課。學生一旦曠課，到時就要請佢父母嚟學校商討情況。」
 
「屌！叫衰婆嚟咪得！」
 
「其實你只需要比樂宜現時工作地址比我就可以，我要問過樂宜，知道佢缺席原因，先可以同學校交代。」
 
「咁佢繼續曠課咪得，唔洗同學校交代，踢佢出校！等佢專心返工，返工好過返學，有錢賺！啲客人一定比唔少貼士啦！」
 
「想問Giselle媽媽係咪同意呢件事？」
 




「我做事唔需要佢同意，男人做事，女人行開！」
 
「我要知道Giselle工作地址。」
 
「你問阿仔咪得，打過嚟煩我做咩？」
 
我望向Henry，只見佢陰陰嘴笑。
 
「阿爸，多謝你呀，我有錢買飯啦！」Henry對住speaker講。
 
「衰仔，連老豆都借嚟過橋！男人呀，就係醒目過啲女人！」Giselle爸爸講完就收線。
 
「地址呢？」我激動問Henry。
 
「你比左廿蚊我，我咪比你囉！加埋頭先電話錢，total 40蚊！」
 
「痴線…..」我瞄向桌面上，一封又一封財務公司信件，突然萌生念頭。
 
「你再唔講地址，我就打去財務公司，叫佢地上嚟搵人。」我囂張一笑講，拎起桌上既信件。
 
「得得得，有事慢慢講，依家即刻比你。」Henry即刻拎紙同筆，寫低Giselle工作地址。
 
「Emm…盧老師，地址都寫左比你，錢係咪…..」Henry比完紙，禮貌地問我。
 
「我從來都冇應承過比錢比你。」我冷笑完，接住講：「我手上仲有一封信，Giselle安全返嚟，封信自然返到你手中。」
 
儘管Henry狠狠睥住我，但佢只可以目睹我離開。
 
我查看手上地址，立刻前往尖沙咀。