搭錯線：錯誤的時間遇上你: 第九十章：逃避的目光

跟住地址，搵到Giselle工作既酒吧。
 
一打開酒吧門，同表面酒吧無異，唔係一個人飲悶酒，就係一大班人既聚會。
 
我橫掃四周，都唔知Giselle既蹤影。
 
走廊盡頭有好多房，我諗Giselle應該係入面。
 
「呀！」突然一個婦人撞向我，令我突然企唔穩。
 




佢捉實我既手臂，因此我冇跌倒。
 
只係佢捉緊我既力度過猛，令我既手臂有啲疼痛。
 
「唔好意思，你可唔可以放手？」我一邊爭扎一邊講。
 
婦人只係飲泣住講：「阿女？阿女你仲係到？」
 
佢牢牢抓實我既手臂，唔願意放手。
 




我仲要入去搵Giselle，再遲啲入去，都唔知佢仲喺唔喺到。
 
酒吧一直播住嘈雜既音樂，我用盡力氣推開佢，並大喊「我唔係你個女！」
 
頓時，婦人鬆開手，緩緩呆在原地。
 
我趁機離開，前往走廊中既房間。
 
房間有5間，到底邊間先係？
 




我只好逐間逐間既房門打開。
 
「無言的親親親 侵襲我心
仍寧願親口講你累得很…..」第一間房入面一班人唱緊K。
 
第二間一打開房門，只見一對情侶忘情地接吻。
 
我趕快閂門，再打開第3間房門。
 
眼前既Giselle垂下頭，旁邊既男人單手攬緊佢既腰部，並自在地唱歌，對比之下Giselle身體僵硬，睇落一臉唔自在。
 
「Miss Lo？」 Giselle睇落好驚訝，同時有點高興既語氣。
 
「Giselle，走啦。」我上前拉住Giselle手腕，佢立即跟隨我身後。
 




「邊個話比你拉佢走？佢收左錢，今晚就係我既！」旁邊既男人上前攔住我。
 
「你知唔知佢幾多歲？」
 
「歲數唔係問題，最重要係我比左錢！」
 
「Miss Lo，我留到12點就走得。」Giselle拉住我衣角講。
 
「你唔洗驚，我會處理呢件事。」
 
「我唔打女人，你好快啲同我走！」男人搓拳弄掌講。
 
「我已經報左警，咪搞左我個女！」門外突然傳嚟聲音。
 
我轉身一望，正係剛才既婦人。




 
「鏘啷——！」男人將酒瓶摔落地上，臨走前怒睥我地兩個，講：「今次我就算數！」。
 
「你冇事呀嘛？」婦人上前，緊張望住我講。
 
「我冇事，警察係咪好快會嚟？」
 
婦人淺笑講：「我根本冇報警，頭先大佢，酒吧好多呢啲人。」
 
「頭先真係唔該晒。」
 
「唔洗客氣，純粹見到後生女需要幫助。」
 
「睇嚟你依家酒醒晒。」
 




「聽到玻璃聲醒左一半，仲未醒晒㗎，要做返啲野先醒，出去玩下琴先！」婦人準備走既時候，身後既Giselle突然開口講：「我想聽阿姨彈琴……我唔想咁快返屋企……」
 
「咁聽完阿姨彈琴，我就送你返去，我會同你媽媽傾下你既情況。」
 
「唔洗啦！講嚟有咩用，離婚又點樣，老豆一搵上門，阿哥又幫口，阿媽又重男輕女，理得阿哥就聽阿爸講，阿哥又貪阿媽呢度好食好住，又唔會走……嗚嗚嗚……」Giselle嗚咽著講。
 
「所以你返part time，係想避開佢地？」我問。
 
「呢個其中一個原因，更重要係想儲夠錢，18歲即刻搬出去！」Giselle 用充滿淚水既目光望住我。
 
「咁等阿姨彈返首曲比你聽？人係呢個時候，最需要係音樂。」
 
Giselle點點頭，我地就跟隨婦人出去。
 
婦人熟悉地尋找酒吧中既鋼琴，佢坐低之後舉手一彈，係一首好溫柔而悲情既曲。




 
旋律一直重覆又重覆，感覺除左彈比我地聽，其實佢本人都係聽眾。
 
突然，我眼前出現一個高眺既身影，急步穿過人群，走到鋼琴旁邊，並講：「Philip 啱啱打過嚟同我講，你頭先又同人嘈架？」佢語氣壓低，卻焦急地講：「點解你唔可以乖乖地留係屋企？」
 
婦人兒子恰巧轉過身，我同佢對視，係熟悉既眼神。
 
然而佢避開我既目光，轉身背向我，面向其母親。
 
企係我面前，婦人兒子正係查利揚。