搭錯線：錯誤的時間遇上你: 第九十二章：我話要做你既女朋友！

「我今日可以比答案比你：我願意。」
 
「願意啲咩？」查利揚突然愣一愣。
 
「喂！查利揚，咪個3個字！」我心急再講：「女朋友！我話要做你既女朋友！」
 
查利揚低頭笑一笑，再望向我講：「好，我既女朋友。」
 
佢鬆開我既手，接住講：「女朋友，唔好係出面企咁耐，入嚟男朋友屋企先講啦！」
 




「你平時都唔係咁遲鈍！」我嘟嘟嘴講。
 
「我唔係聽唔明，只係你唔親口講，我都確認唔到你既心意，況且你心急個樣咁得意，我想睇多陣。」查利揚拉住我既手，坐係沙發上。
 
「依家有排你睇！」我笑住講。
 
「好呀！終於可以仔細睇清你個樣。」查利揚靠近我講。
 
整個客廳都好寧靜，我地都聽到彼此急促既呼吸聲。
 




通常呢啲時候，我諗都係Kiss既前奏。
 
我輕輕閉上眼，等待呢一刻。
 
奇怪，點解咩動靜都冇？
 
我稍微打開眼縫，先發現查利揚揾緊角度。
 
場面滑稽得令我忍唔住發笑。
 




「大學除左讀PPT1001，我覺得仲要讀LOVE1001。」我微微側頭，將唇貼上佢既唇，然後輕輕離開。
 
眼前既查利揚臉紅耳赤，係一個我從來都未見過既樣。
 
「你冇閉氣㗎嘛？」我開玩笑問。
 
「當然冇！」查利揚立即否認。
 
「不過我地係咪都要整理下對大家既稱呼？」我講。
 
「你想我點叫你?」我問。
 
「唔好全叫我全名～知你由學生時期，就已經叫我全名。」查利揚笑住講。
 
「你又知？」我驚訝問。




 
「你家姐成日都同我講你冇大冇細，況且你頭先都好自然叫我全名啦！」
 
雖然知佢英文名叫Charlie，中學個陣要叫查Sir，但我內心的確係叫佢查利揚。
 
「咁你咪知我好多野？」我開玩笑地反問。
 
查利揚露出自信的笑容，講：「你想點叫我？」
 
「咁叫阿揚?」我立即回答。
 
之前聽 Charlotte咁叫佢，我都想同Charlotte一樣叫到親切啲，代表我係……阿揚身邊親近既人。
 
「好呀，正希。」阿揚笑住講。
 




「平時啲人都叫開我Hailey，一時之間唔慣人地咁叫。」
 
「咁你要習慣下啦，正希！」
 
「阿揚。」
 
「嗯？」
 
「想咁叫下你啫！」我佻皮咁講。
 
「嚟緊大把時間比你咁叫。係呢，你咁夜上嚟搵我，係咪有咩重要事？」阿揚緊張問。
 
「你今日唔係同auntie 嘈架咩？到底發生咩事？」我拉住佢隻手問。
 
「說來話長。」阿揚嘆左口氣講。




 
「你係咪未ready同我講？我都明屋企事需要時間去講既！我上嚟只係想睇你狀態O唔OK。」
 
「當然唔係！你係我女朋友，點會唔同你講呢？只係我一講，就可能講到天光，依家好夜，聽朝你又要返工，不如我依家送你返去？」
 
「我上嚟就係想聽你講野。」我將頭挨向查利揚肩膀上，繼續講：「你知啦，以前做你學生，只係知你老師專業個一面；做同事，就知你可靠既一面。咁真正查利揚呢？」
 
「咁睇落我對你了解可能仲深。」
 
「我好多野你都仲未知！」我扯一扯阿揚臉頰肉講。
 
「咁點解……你今日會酒喺吧出現？呢個我真係……唔知。」阿揚甜笑望住我，任由我扯住佢塊臉講。
 
「今日Giselle冇返學，但佢父母冇同學校請假，加上Tiffany搵我幫手，我咪上去做家訪。意外先知Giselle爸爸叫佢做陪酒，然後去酒吧搵返Giselle，中途有啲爭執，好彩auntie 幫左我。」
 




「佢份人就係咁，最叻逞強。」
 
「同你差唔多啦！不過auntie點解係酒吧？」
 
「我同個度bartender Philip好熟，佢同我講阿媽飲到好醉，呢間只係阿媽常去酒吧其中一間。」
 
「點解Auntie飲咁多酒？佢會唔會有心事先要借酒澆愁？」
 
「佢憎我。」
 
「邊有父母憎自己仔女？auntie會唔會唔識表達自己感情，你先誤會佢？」
 
「因為詩韻過身，呢一切先會發生，而一切源頭都係我。」


********
另一邊過左100個LIKES，聽日會加更一篇，多謝大家支持！