搭錯線：錯誤的時間遇上你: 第九十三章：查利揚的過去（1）
我抬頭望向阿揚，只見眼神瀰漫著憂傷。
阿揚開始憶述佢既過去。
詩韻係細佢6年既妹妹，佢地自細感情好好。
可能因為長男關係，詩韻好多時候想要咩，作為哥哥既佢，都會讓比妹妹。
只係一開始阿揚係獨生子，突然之間要讓細妹，細個既佢當然唔明白，就會同細妹爭野。
背後重要既原因係，阿揚發現如果佢唔讓細妹，媽媽就會擺面色比佢睇。
除左查母偏心詩韻，更獨愛其音樂天賦──因懷孕而未能完成既音樂夢。
一切源於查母發現詩韻既天賦開始。
「阿揚，練琴啦！」媽媽喊道。
「琴日咪練左囉！點解今日又練啫！」阿揚抱怨講。
「唔練琴冇飯食！」媽媽冷冷講完就離開，剩下阿揚和冷冰冰既琴鍵。
「又係呢首Mendelssohn Andante！」阿揚雖然晦氣講，但都照肢體記憶敲打琴鍵。
「阿哥阿哥！」詩韻拎住洋娃娃行到琴邊。
「阿妹，我依家要練琴，陣間先同你玩煮飯仔！」
「阿哥，我想試下彈！」
「下？你？我彈完一個鐘咪比你囉！」
「我日日都聽，個旋律我都記得㗎，點解我唔彈得喎！」詩韻不滿講。
「唉，比你彈囉！一陣唔比你又喊！喊包！」阿揚讓出位置。
「哼！我唔準你話我喊包！」詩韻坐在正中間，深呼吸之後，就開始按下琴鍵。
「嘻嘻…..又話記得點彈！除左頭一段啱之後，之後都錯漏百出！」查利揚譏笑。
「阿揚，點解你彈到錯晒…..」查母從廚房出嚟，但眼前景象令佢非常驚訝。
一個K2 4歲小朋友，雖然好多彈錯，前題查母未教詩韻彈琴，但係詩韻對節拍既敏銳度，分到高低音既位置，同埋左右手協調下，查母就知道，眼前既小朋友，係可以幫佢實現夢想。
「詩韻，彈琴係咪好好玩呀？」查母眉開眼笑咁講。
「嗯！好好玩！啲聲好好聽！」詩韻繼續彈。
「咁由聽日開始，媽咪教你彈琴？」
「好呀！」詩韻欣喜地說。
.
「腰要挺直！基本姿勢講左幾多次！」
「首歌唔啱feel！呢首咁輕快既曲，你彈到好似紀念先人曲。」
「你學左琴咁耐，點解仲係同佢咁疏離！你要當鋼琴係你既好朋友！」
「唉！如果詩韻係中一，分分鐘準備考8級，你依家先係5級，慢左大半步啦！兩個仔女都係我生，點解差咁遠！」
每當阿揚練琴，查母總係忍唔住責罵佢。
阿揚心諗：中學入面，身邊既朋友都仲係4級，5級已經算快。
只不過每日充滿謾罵既聲音下，阿揚逐漸覺得自己能力不足。
無論阿揚比以往花多兩三倍既時間，查母眼中阿揚都被標上「冇天賦同能力不足既人」。
「唔好意思呀！」有一日樓下保安搵上門。
「係，請問你有咩事？」查母回應。
「樓上鄰居投訴你地，話夜晚成日聽到琴聲，覺得好滋擾，麻煩你地注意，8點後不得有任何琴聲。」
當時查母狠狠望住保安。
門被重重甩上，發出「砰」一聲巨響。
阿揚坐係鋼琴邊，一直望住母親從門口返嚟。
「查利揚，聽到啦，8點之後唔準再練琴，不過唔緊要，反正你用左3個鐘練琴，我都睇唔到有咩進步，講過既野又犯。」
阿揚垂下頭，望住10根都起繭既指頭，泛起淚光。
每日花3個鐘練琴，升上中學又要適應新既教學節奏。
主科4科，仲有地理、科學、中史、西史……阿揚逐漸越嚟越少瞓，為左應付龐大既功課量。面對住疲憊，佢只可以飲咖啡提神。
佢心諗：由細到大，明明只要努力，將勤補拙，一定就會有進步，媽媽就會對自己改觀，可能有一句讚美，足以令自己開心一日。
我係男仔，唔可以喊。
男仔要堅強，更何況我喊，阿媽可能就話咁小事，喊咩。
「哥哥，粒糖比你食糖呀！唔好唔開心啦，媽咪只係要求高，只要我彈琴唔彈咁好，媽咪就唔會話哥哥啦！」詩韻突然出現係阿揚旁邊，塞左幾粒提子糖係阿揚既手心。
「我唔食甜野！」阿揚無可宣洩下，將怨氣發泄落無辜詩韻身上。
提子糖跌落地上，詩韻逐粒逐粒拾起，追住比佢行得快既哥哥背影講：「我明你咩感受。以前初初學彈琴真係好開心，只係要彈得完美，符合媽咪高標準，其實真係好難㗎！呢2年，我都已經冇以前咁鍾意彈琴。」
阿揚發現，原來好耐冇同詩韻好好傾過偈。
幼稚園個陣，阿揚起碼會串下詩韻，有時間就會陪詩韻玩，包括煮飯仔。
自從詩韻學琴，一切都改變。
母親每次望住詩韻，眼裏總係發光，呢個係阿揚一直係母親身上搵唔到既認可目光。
長期比較下，即使詩韻主動搵阿揚玩，甚至簡單傾幾句偈，阿揚只係冷淡回覆，多次用「好忙」當藉口推搪。
第一次，阿揚覺得世上原來仲有人理解佢，願意企佢身邊。
排除母親，至於父親，多數早出晚歸，加上佢係一名「老婆奴」，事事聽取老婆意見。
原本佢以為具有音樂天賦既詩韻，受到母親既重視同寵愛，照計應該好幸福先啱……
阿揚轉身，詩韻再次將提子糖遞上比阿揚。
今次唔同既係，阿揚係詩韻手心取下一粒糖，其餘剩下喺詩韻手心。
詩韻用疑惑既眼神望住阿揚。
阿揚久違展露笑容，講：「呢啲留比你食，我記得你鍾意食提子糖。」
詩韻歡喜得露出牙齦，講：「一齊食！」
2年間冇點理會詩韻，係阿揚其中一件後悔既事，明明根本唔關詩韻事，佢就將怨氣發泄落弱者身上。
早知相處時間有限，阿揚一定會一分一秒都唔浪費，珍惜同詩韻相處既時光。