搭錯線：錯誤的時間遇上你: 第九十四章：查利揚的過去（2）

2年後，當阿揚升上中三，過左15歲，終於考到6級，同樣地詩韻升上小四，但早已考取6級。
 
雖然阿揚同詩韻相差6年，但有啲差距，從來唔係靠時間可以追得上。
 
「媽咪，既然阿哥都考左6級，咁你咪可以一齊教我地，我想同阿哥一齊學琴。」詩韻向母親撒嬌。
 
「同佢學，拖慢你進度！」查母不屑望阿揚一眼。
 
接著查母蹲下，雙手搭住詩韻肩膊，講：「詩韻，媽咪已經同你報左亞洲鋼琴比賽，下個月星期六你就可以表演，聽講全場最後生既報名者係你。呢個比賽你一定要做到最好，今年竟然有個評判係嚟自維也納，話唔定你可以比佢睇中，去到維也納受訓！」
 




後來查母更用篤定眼神望住詩韻講：「唔係，係你一定要比佢睇中，今次比賽，你要贏到冠軍！」
 
其實詩韻同阿揚都知，去維也納學習音樂，係母親一直以嚟既願望。
 
既然母親實現唔到既願望，佢決定交由詩韻實現。
 
自此之後，查母幫詩韻整左個時間表──一個連阿揚都覺得窒息既時間表。
 
3點半放學，一返到屋企就要即刻練琴，5點半前功課一定要做完。
 




所以詩韻係學校，所有小息午息時間只能做功課，換取在家中既喘息空間。
 
6點，開始練琴，練到8點，因為唔可以嘈住鄰居。
 
8點食飯，9點用電子琴，繼續練，練到11點。
 
11點之後終於係自由時間，然而詩韻已經覺得好眼瞓，一秒入睡。
 
見到詩韻咁攰，阿揚都唔忍心，於是佢拎統測成績表比查母簽名時，小心翼翼講：「媽，細妹咁細個，11點瞓，聽日7點起身，佢邊夠精神，我見佢黑眼圈都好大。」
 




「佢唔勤力啲點拎冠軍，當年我都係咁過，依家又唔係好地地！阿揚，你今年中三要選科，理科考得咁差點得？你有冇花心機時間落去？中史高分冇用，出嚟乞食！」查母仔細睇緊成績表，遲遲唔簽名。
 
「我覺得文科啱我多啲，數學對我嚟講真係有啲難。」
 
「總之phy chem bio一定要揀，將來揀科條路先闊啲。我聽Fiona講Charlotte 全級頭十名，小提琴鋼琴都精通，聽講佢鋼琴準備考7級，我都唔好意思同人講，我個仔啱啱先考到6級，好彩詩韻準備考7級！」
 
「係咪只要我聽你講，你就可以比返啲休息時間比詩韻？太夜瞓對健康唔好。」
 
「你依家威脅我？我以事論事。」查母簽完成績表，冷冷望住阿揚。
 
既然母親唔聽自己講野，阿揚只好嘗試搵父親。
 
幸好父親愛女心切，佢觀察到詩韻呢排變得沉默寡言，好耐都冇見佢笑，於是同妻子商討後，減少詩韻1個鐘練習時間。
 
鋼琴比賽前兩日，當阿揚係房做緊功課既時候，突然聽到母親叫阿揚出廳。




 
屋企既燈光柔柔灑落，詩韻坐係鋼琴前，白色連身長裙順住身形垂落，袖邊一粒粒珍珠係燈下閃閃發光，光滑既布料更係映射得一束彩虹。
 
「阿揚，詩韻今個星期六咁著過去，你覺得點樣？」查母興奮咁講。
 
「阿妹咁著超好睇，一定係全場焦點！」阿揚目不轉睛講。
 
「阿哥，你唔好眼定定望住我啦！」詩韻尷尬咁講。
 
「因為同平時既你太唔同！」阿揚大聲講。
 
阿揚眼中既詩韻，只係成日追住佢跑，食野食到周圍都係，係天真爛漫既妹妹。
 
「詩韻，你試下彈下一曲，當屋企係演奏廳！」查母講。
 




詩韻緩緩彈奏Mozart：Fantasia in D minor, K.397，依佢呢個年紀彈呢首歌，阿揚感受到個種悲哀同寂寞。
 
阿揚陶醉係當中既旋律，諗起一直以嚟阿媽既偏心，對詩韻既羨慕同妒忌……
 
詩韻的確係天生既鋼琴家，樂曲既高低起伏掌握非常完美，佢完全沉醉係樂曲入面，用音樂去表達佢既所思所想。
 
只係呢首曲聽落好抑鬱，詩韻最近係咪好唔開心？
 
「叮～」鋼琴聲結束。
 
詩韻微笑鞠躬，臉上掛住兩個酒窩不斷顫抖著。
 
相比起因為幸福而笑既佢，呢個更係緊張而刻意擠出既笑容。
 
「詩韻你彈得好好！」阿揚拍手講。




 
「阿揚，星期六朝早我要同你婆婆去醫院Body check，佢最近成日話個胃唔舒服，你阿爸又要返公司開會，所以個日就要麻煩你帶細妹去演奏場地。」
 
「冇問題，阿媽你就放心同婆婆覆診，細妹交比我就得！」
 
「阿哥你記得做好保鏢角色！我放心交比你啦！」查母笑一笑講。
 
「保鏢？有冇糧出先？」阿揚同母親開玩笑。
 
「平時零用錢咪你份糧！」母親得戚笑住講。
 
母親好少同阿揚有傾有笑，但呢一次係佢地最後一次有傾有笑。

************
另一邊過左110個likes，聽日加更一篇，多謝支持。