搭錯線：錯誤的時間遇上你: 第九十五章：查利揚的過去（3）

鋼琴比賽當日，當阿揚起身後，打算叫詩韻起床既時候，點知詩韻已經準備緊早餐。
 
「哇，阿妹你今日咁乖！記得麵皮要烘…」
 
「烘乾啲呀嘛！仲要多果醬！阿哥刷完牙洗完臉就有得食啦！」詩韻轉身一笑講。
 
阿揚梳洗完之後，就同詩韻一齊早餐。
 
「阿妹，你琴晚冇瞓過咩？」阿揚打住呵欠講。
 




「太緊張，瞓唔好…..同埋媽咪一朝早要同婆婆睇醫生，所以6點起身就揾媽咪化妝，原本講話6點半先化既，哈哈！」
 
「阿妹你琴日彈得咁好，唔洗驚啦！你只要一緊張，就當台下觀眾全部都係提子糖，你淨係彈比提子糖聽！」
 
「嘻嘻嘻…..阿哥，我已經四年班啦！我都唔信有聖誕老人啦！阿哥你將來點識女朋友，都唔識安慰人既！」
 
「我到時就識返個女朋友比你睇！仲要一定係好靚、心地善良、善解人意既女仔！」阿揚立即反駁詩韻。
 
「咁我都要揾返個靚仔男朋友，要對我好好！」
 




「靚仔？你阿哥我仲靚仔啦！」
 
「下？？」詩韻講完，笑容連帶酒窩出現係臉上。
 
阿揚得戚一笑，繼續食多士。
 
早餐充滿著樂融融既氣氛。
 
食完早餐後，詩韻就入房換禮服。
 




阿揚係廳等左一陣，直到詩韻大喊：「阿哥你入嚟幫一幫我呀！」
 
「叩叩叩…..」
 
「你快啲入嚟，我拉唔到背脊條拉鏈！」詩韻講。
 
「琴日我生日，阿媽咪叫你食少件蛋糕！」阿揚努力拉住拉鏈講。
 
「本身條裙就好緊，阿媽買個陣都冇問過我意見……全部野都冇問過我意見。我都冇話想著呢條裙，我唔想參加比賽……我人生除左鋼琴，好似乜都冇。」詩韻突然鳴咽。
 
「我琴日只係想食蛋糕，都要比媽咪監督！我食左兩啖，佢就唔比我食！連食蛋糕都唔比！」
 
「最多比賽完，阿哥買蛋糕比你食！」阿揚心急講。
 
「真係既？」詩韻轉身，只見眼線位被淚水弄花。




 
「快啲抹乾眼淚！陣間咁上台就唔好睇！」阿揚拎起桌上既紙巾為妹妹拭淚。
 
「其實我已經厭惡鋼琴好耐，但周邊既人都話：『查詩韻係鋼琴天才』，每次媽咪聽到就好開心，令我不得不繼續彈琴……我都想試下玩下其他樂器，甚至跳舞、畫畫……」詩韻紅住眼眶講。
 
「阿哥應承你，比賽一完，我地就同阿爸講，好冇？」
 
「嗯！」詩韻苦笑講。
 
雖然阿揚心知機會渺茫，但為左詩韻，點都要試下。
.
由九龍塘搭車去中環，都要20分鐘。
 
因為詩韻出門換衫搞耐左，導致時間有啲趕。
 




阿揚同詩韻一到中環，就趕去比賽場地。
 
途中阿揚見到間花店，佢記得之前同詩韻睇音樂會既時候，詩韻講過：「如果將來我演奏，可以好似佢地收到咁多花就好，感覺全世界既人都支持你！」
 
阿揚一諗起呢段說話，距離大會堂仲有一段馬路。
 
於是阿揚同詩韻講：「阿妹，你企係到等阿哥， 10分鐘內好快返嚟！」
 
「阿哥你咩事？」詩韻擔心地問。
 
「我有啲肚痛，我記得附近有個廁所，我快去快回！」
 
「好啦！阿哥你快啲返！」詩韻乖乖企係到等阿揚。
 
阿揚趕緊跑返去頭先經過間花店買花，諗住比到細妹一個驚喜。




 
希望詩韻會收到我既祝福，演奏時可以輕鬆啲。
 
「唔該老闆娘！請問有冇花係啱祝演奏成功？」阿揚大喊。
 
老闆娘回應：「白百合啱唔啱？今日新返。」
 
「好呀！細妹實鍾意！幾錢呀？」
 
「600蚊。」
 
「我淨係得500蚊……老闆娘，我要少幾朵得唔得？」
 
「見你買比細妹，小朋友有幾多零用錢！收你500蚊啦，當我都祝你細妹演奏成功！你細妹叫咩名？我幫你寫卡。」
 




「唔該晒老闆娘！你比我寫就得！」
 
阿揚諗左一陣，好快就落筆：
“To Cecilia: No matter how you play tonight, you are my little sister, and I will always love you.”
 
寫完之後，阿揚望手錶，發現搞左成15分鐘，比原先約定遲左5分鐘。
 
今次時間真係好炆水，好彩轉彎直行就係大會堂前面馬路，距離尚算近。

不過一諗到詩韻見到花，佢輕輕靠近花束後，聞到淡淡百合花香味，酒窩隨著笑容而浮現，阿揚覺得見到細妹笑容就乜都值得。

阿揚飛快跑返去馬路個邊揾詩韻。
 
馬路邊人群聚集，喧鬧聲不斷傳入阿揚耳中。
 
咁多人塞住晒，細妹係邊到呀？
 
「詩韻？查詩韻！查詩韻你係邊？」阿揚不斷係人群中大喊。
 
「死囉，個女仔仲係小學生，咁後生搞成咁，佢父母點算？」突然一位女途人既聲音傳入阿揚耳中。