搭錯線：錯誤的時間遇上你: 第九十六章：查利揚的過去（4）

阿揚努力擠上前面，血腥味距離自己越嚟越近。
 
唔會既唔會既⋯⋯細妹一定等唔切我，自己安全過左馬路，係大會堂等緊我。
 
眼前熟悉既白色連身裙被血沾染，䄂邊一粒粒珍珠映入眼簾。
 
「詩韻！」阿揚上前推開人群。
 
眼前詩韻身處在血泊中，蒼白既臉孔令阿揚痛惜。
 




「唔好呀！詩韻呀！」阿揚跪坐在地上大喊。
 
阿揚將手上既白百合扔開，緊緊握實詩韻既纖幼既手。
 
「對唔住阿哥，我原本⋯⋯原本真係想等你⋯⋯等你返嚟⋯⋯但係我⋯⋯我驚遲⋯⋯遲到⋯⋯見係綠燈⋯⋯咳咳⋯⋯點知係紅⋯⋯」
 
「你唔好再講野，救護車好快就嚟！你一定會冇事！」
 
「我唔想媽咪⋯⋯失望⋯⋯」詩韻望向旁邊既花束講：「花好靚⋯⋯我鍾意⋯⋯如果我死左⋯⋯我都想要呢個花陪我⋯⋯」
 




「你好返，到時屋企日日放百合！」阿揚即刻拎花束比詩韻睇。
 
「好呀，放百合⋯⋯」詩韻微微一笑，就昏睡過去。
 
「你唔好瞓呀，你都仲未識男朋友比阿哥識！你講過話要揾比阿哥更加靚仔既男仔！」阿揚崩潰哭道。
 
「小朋友，我地係救護員，你先讓開，我地會盡力！」一位救護員拉開阿揚。
 
「我係佢阿哥，我要同佢去醫院！」阿揚失控大喊。
 




「好。」救護員遞上紙巾比阿揚。
.
阿揚係醫院一直等候。
 
如果我唔去買花；如果我唔去寫心意卡；如果我冇遲嗰5分鐘；如果我唔叫細妹係馬路等我——我唔應該買花比驚喜比細妹。
 
我唔應該買花，我唔應該遲到！
我唔應該買花，我唔應該遲到！
我唔應該買花，我唔應該遲到！
 
阿揚一直咁諗住，直到父母出現。
 
「查利揚，咪叫你睇住你細妹！點解佢會係醫院？你點做人地阿哥！」母親一嚟就破口大罵。
 
「老婆，你冷靜啲，阿揚一定冇心，聽下佢點講。」




 
「冷靜？我點冷靜？聽目擊者講，話詩韻好急咁行，佢想叫住詩韻，但貨車已經衝過嚟。點解詩韻會一個人？你答呀？」母親抽住阿揚既衣領，憤怒地質問。
 
阿揚目光呆滯：「我只係⋯⋯我只係⋯⋯諗住買花比驚喜比細妹，我叫左佢等我，冇諗過會搞成咁⋯⋯」
 
「冇諗過？佢咁細個，點解你會放心比佢一個人？買花比佢？就係因為呢啲爛鬼花，你細妹依家仲危殆緊，做緊手術！」母親不斷拉扯阿揚衣領，但阿揚絲毫反抗都冇，任由母親發泄怨氣。
 
「真係好對唔住⋯⋯」阿揚掩著臉痛哭。
 
「老婆，依家怪阿揚都冇用，件事都發生左！我地等詩韻醒返就得！」父親鬆開母親既手。
 
「唔係佢，詩韻就唔會搞成咁！」母親轉向父親大喊。
 
過左唔知幾耐，醫生從手術室出嚟。
 




「好抱歉，我地已經盡力，你地節哀順變。」醫生垂頭講。
 
「詩韻呀！」母親大聲嘶吼。
 
阿揚聽到後，立即跑走。
 
「阿揚你去邊？」遠處既父親高呼。
 
阿揚無視父親，一心諗住返去大馬路，拎返紮花。
 
詩韻講過，如果佢死左，想要百合陪佢。
 
點知阿揚跑到醫院大門，一位救護員截停左佢，正係啱啱遞紙巾個位。
 
佢手上拎住一束花，講：「我啱啱仲諗住揾你，你係咪想揾返紮花？」




 
阿揚無力點點頭，講：「細妹好鍾意白百合，我想拎呢束花陪佢。」
 
救護員講：「你係一個好哥哥，你妹妹只係一場意外。」
 
「多謝！」阿揚哽咽講。
 
冇諗過陌生人既安慰，可以令阿揚獲得係家庭得唔到既安慰同温暖。
 
嗰一個夜晚，阿揚夜不能寐。
 
只要一閉上眼，腦海就會浮現出詩韻係血泊痛苦既模樣。
 
「詩韻，唔好走呀！」
 




「阿哥會準時到！」
 
「等你表演完，我地再一齊慶祝，阿哥講過請你食蛋糕！」
 
無數個夜晚，阿揚都活係後悔既地獄。
 
阿揚唔係冇試過瞓覺，只係每次都被噩夢驚醒。
 
加上阿揚做事盡善盡美，係學校佢擔任學會幹事，又申請做領袖生，好多時候已經遲放學，放學要去補習。
 
當佢返到屋企，當做晒功課既時候，已經係凌晨，有時甚至要準備統測、考試，變相佢用學業繁忙，塞滿自己時間表。
 
慢慢咁，阿揚習慣夜晚既孤獨。
 
自從詩韻車禍一事發生後，母親一蹶不振，終日飲酒度日，有時候甚至自殘，企圖輕生。
 
屋企既鋼琴都逐漸鋪滿厚厚既塵埃。
 
上學期既統測同考試悄然過去，還未回過神，下學期既統測已經逼近。
 
阿揚呢段時間都努力讀書，就連之前理科都考得不俗既成績。
 
只係阿揚心繫中西史，佢覺得歴史就好似故事好有趣，最重要係歴史可以提醒人類，唔好重蹈覆轍。
 
「爸，我想選中西史做我既electives。」
 
「點解揀呢兩科？」
 
「我對呢兩科有興趣。」
 
「好，我同你媽咪商量下。」
 
去到凌晨12點，父親帶住一身酒味既母親返嚟。
 
「查利揚，你話你要揀中西史？」母親衝入阿揚既房間質問。
 
「係。」阿揚繼續温書應道。
 
「依家長輩！你阿媽同你講緊野！係關於你既未來！你唔可以揀啲史科！」
 
「點解唔得？」阿揚停低筆，望住母親講。
 
「揀商科理科先有出路！最好全理科！」母親氣沖沖講。
 
「到底係你讀書定我讀書？」阿揚冷冷地問。
 
「查利揚你講咩？」母親聲嘶力竭喊著。
 
「阿揚，你快啲同阿媽say sorry！」父親焦急講。
 
「咁係應該阿媽同我say sorry先，佢冇叩門就入我房。」
 
「阿揚呀，你做咩事啫！」父親問。
 
「媽，你係咪利用我同詩韻滿足你細個做唔到既事？」
 
「唉！」父親細聲嘆氣。
 
「我都係為你地好！仲有你唔好唔記得，詩韻係因你而死！」母親狠狠盯住阿揚講。
 
「我有份殺詩韻，但你都要負責任！詩韻死前一日，佢同我講，其實佢好憎彈琴！佢每日都厭惡過每一日！」
 
「冇可能！冇可能！你講大話！」
 
「詩韻演奏前一日，個一日係我生日，詩韻明明想食蛋糕，你淨係比佢食幾啖就唔比佢食，話條裙太緊，詩韻食太多會著唔落，事實上你連買裙都冇問過詩韻著唔著得落！你淨係諗你自己！冇問過佢意見！」
 
「你講夠未？」母親顫抖著說。
 
阿揚接住講：「就連我揀科，你都冇問過我意見！阿爸起碼會問我點解會揀，會尊重我！你呢？你簡直就將你既仔女當作你既人生作品！我要做醫生，而詩韻就係幫你圓夢！做鋼琴家！你冇問過佢想唔想！就連詩韻臨死，佢之所以睇錯紅燈做綠燈，佢驚遲到，唔比入場，都係因為驚你會失望！」
 
「啪！」阿揚只覺得一邊臉頰猛然一熱。
 
阿揚瞬間一愣，眼前既母親舉高了手，眼眶充滿住淚水。
 
「依家係邊個遲到，導致詩韻要衝紅燈？係你呀！查利揚，你呢個淨係為人帶嚟不幸既人！我做唔到鋼琴家都係因為有左你！詩韻明明大好前途，但做唔到鋼琴家，都係因為你！唔係你，詩韻就唔洗咁早死！以佢既天賦，今日佢就係維也納受訓！我地兩個咁不幸，都係因為你剋住我地！」母親衝口而出。
 
「夠啦！你地都講夠！」父親當場嘶喊。
 
脾氣好好既父親，阿揚從來未見過佢氣急敗壞既樣子。
 
「你地都係我家人，係我身邊最重要既人，可唔可以唔好再嘈落去！」父親崩潰喊道。
 
全場鴉雀無聲。
 
「阿揚你鍾意揀咩科就揀咩科！佢大個，要為自己未來負責任。」父親拋低呢句說話就離開。
 
而母親則默不作聲，再冇干涉阿揚選科一事。
 
家就如死城，阿揚中學畢業後，大學就住Hall，當中Part time既人工都儲起，加上父母定期比零用錢佢，變相阿揚都儲左唔少錢。
 
大學畢業，阿揚直接用之前儲落既錢搬出嚟住。
 
2年後，我就同阿揚相遇。

*********************
過左120 likes，聽日會加更一篇。
最近PENANA多咗人like我真係好開心🥹 但我發現自己有少少寫到太急， 想寫好啲先出比大家～
所以之後改做 20 likes 解鎖加更 🤍 即係下次加更目標係 140 likes🫶，多謝支持！