搭錯線：錯誤的時間遇上你: 第九十七章：促膝深談

「唔知詩韻係天堂過成點？仲有冇怪我呢個阿哥呢？我做呢個『保鏢』失責，就算辭職都彌補唔到自己既錯誤！」阿揚嘆氣講。
 
「阿揚，你望住我。」我扭阿揚個頭過嚟。
 
阿揚一臉疑惑望住我。
 
「你係我眼中，就係好稱職既『保鏢』，由中學到依家，你一直都保護我。仲有呀，詩韻一定好重視你呢個哥哥，咁多心事都肯同你講！你係一個超級好既哥哥！」
 
「乜真係咩？」阿揚垂下雙眼講。
 




「我知一時之間兩言三語，可能安慰唔到你啲咩。只係以後你有咩唔開心，都可以同我講，唔洗再一個人面對，因為我係你女朋友，你就可以盡情依賴我就得！」我摸摸佢既臉龐，繼續講：「呢段時間辛苦你啦，多謝你同我講呢個難以啟齒既故事！」
 
阿揚聽到之後，眼眶滲出淚珠，望住我講：「因為你係正希，我唔同你講，仲可以同邊個講？」
 
「你想喊就盡情喊啦，我唔會睇你。」我抹去佢眼角既淚珠，溫柔地說。
 
「鳴鳴鳴......」阿揚一手緊擁我既腰部，嚎啕大哭。
 
我一直輕拍佢既背部，直到佢感覺舒暢為止。
 




哭泣聲逐漸收細，但阿揚一直緊擁我既腰部，一直維持呢個姿勢有啲攰，於是我問：「你依家舒服啲未？」
 
「嗯。」阿揚抽住鼻水，帶點鼻塞既聲音應我。
 
「咁可唔可以轉個姿勢呢？」
 
「唔好啦…..」阿揚好似小朋友咁扭計。
 
「喂呀～我真係有啲攰～」我放輕語氣講。
 




「因為我唔想你見到我依家個樣。」
 
「嘻嘻…..我想解鎖多啲你唔同既樣喎！況且你就算喊，係我眼中都係靚仔！」
 
阿揚雙手離開腰部，眼前佢只係一隻垂頭喪氣既大狗狗。
 
見到佢啲頭髮真係好柔順，我忍唔住又摸多幾下。
 
「唉，今日真係咩樣都比你見到晒！」查利揚扁住嘴講。
 
「車！咁我之前發酒癲，大吵大鬧，仲有中學最殘，未識化妝既樣，人生最樣衰既時間都比你見過晒啦！」
 
「中學既你其實都好可愛，邊有你講得咁差！」
 
「查利揚，乜你咁識講野既？」我雙手抱臂，頭背對阿揚。




 
事實上，我嘴角不斷向上揚，但唔想比阿揚見到。
 
「唔係呀，我真心咁覺得！」阿揚搖搖我膞頭講。
 
「我知，當然知啦～你一直係我留意唔到既地方留意我，唔係咩？」我望向阿揚得戚咁講。
 
「係啦係啦！全部學生入面，我當時淨係望到你一個！」阿揚用住真誠既眼望住我講。
 
「你呀！個陣有時勁冷漠，搞到我勁唔開心！不過依家做左老師，多多少少都明你當時既困擾，特別係送比你份生日禮物，哈哈！」
 
「個陣我唔想咁冷漠，只係你係Hazel個妹，我應承左佢要睇住你，如果我同你一齊，佢會唔知點諗。」
 
「你當時照顧我，除左因為我係熟人個妹，更加係？」
 




「你同一般學生唔同。當我比學生話既時候，我仲記得你講過『老師都係人，有邊個人會鍾意比人講壞話？』即使老師習慣比學生講，但有學生幫自己講野，難免都會感動，之後我就格外留意你。」
 
「果然當時唔係我錯覺，你就係鍾意我！」
 
「加上個陣其實有遙言，所以我先要避忌啲，我唔介意比人講，最驚你會比人講！」阿揚帶住傷感既眼神講。
 
「選科講座原本我咪拒絕左你，因為Miss Tsang同我講過我地既遙言，我怕⋯⋯如果我唔拒絕你，你就好難做老師，我唔想因為我而影響你既教師生涯。」
 
「個陣我應該做好本分就得，係冇諗過選科講座之後，遙言先會越傳越勁，我先對你冷漠，其中一件令我後悔既事就係我生日你送禮物個次。」
 
「唔好傻啦！明明份禮物咁名貴，你收左實比人講！只係你個陣唔只冷漠，更加係嬲。」
 
「正希，個次唔係你既錯⋯⋯」阿揚深呼吸講：「個陣做野好忙，我已經唔記得自己生日，係你搵晒全班慶祝我既生日，其實我當時好感動。自從詩韻去世，父母都好耐冇同我慶祝生日，每年淨係放禮物盒比我，而我仲好記得，第一年既禮物盒就係Gucci領帶。」
 
原來我送比阿揚既Gucci領帶，勾起佢妹妹去世既事，怪唔知當時佢反應先咁敏感，個陣我仲咁幼稚，根本對阿揚咩都唔知，淨係識發脾氣，又嬲左佢。




 
「我仲好記得係詩韻會提父母買我最鍾意食既雜果蛋糕，正日一齊吹蠟燭慶祝，然後詩韻仲會搶蠟燭嚟吹！」阿揚慨嘆咁講。
 
「嚟緊你每一個生日，我都陪你㗎嘛！到時一定有你最鍾意食既雜果蛋糕！」我牽住佢既手講。
 
「今年我生日你都陪我過左，係教員室。」阿揚無奈笑住講。
 
「下年仲教員室咩？你好想返工呀？」我目瞪口呆講。
 
「係呀，返工見到你，梗係開心啦！我好鍾意返工㗎！」阿揚興奮咁講。
 
「你都痴線！弊啦，仲有2個鐘就要返工！」我突然望向牆上既鐘講。
 
「我依家車你返屋企？」阿揚傾頭講。
 




「嗯～」我瞇住眼睛同時點點頭。