搭錯線：錯誤的時間遇上你: 第九十八章：公開關係？

「睇頭。」阿揚將手放係車門頂上。
 
我進入車後，阿揚温柔幫我扣安全帶，並講：「到左我叫你起身。」
 
「你琴日成晚都冇瞓過，仲有冇精神揸到車？」講完之後，我掩著嘴巴打呵欠。
 
「睇下你，都已經咁攰，快啲瞓啦！」
 
「咁你呢？」
 




「我飲下咖啡就精神，放心！我體質係瞓兩三個鐘都冇問題。」
 
睇嚟詩韻離世，造成阿揚既傷害真係好大，佢既失眠問題並唔係一朝一夕可以解決。
 
「正希，起身啦～」阿揚温柔叫醒我。
 
「嗯？」我緩緩張開眼皮，先發現自己不知不覺間瞓著左。
 
「你快啲上去啦！」
 




「你都快啲返屋企！一陣學校見！」話畢，我便解開安全帶。
 
「啾！」臉頰感覺一股温熱既感覺。
 
我回頭一望，只見阿揚眉開眼笑，然後講：「正希，你就咁想走？」
 
「喂呀！再唔快啲返去就遲到啦！」我開玩笑拍住佢膊頭講。
 
「唉，話晒我都車你返嚟，可能會遲到，如果有啲獎勵就好！」
 




呢個時候咁識撒嬌，完全唔似冇戀愛經驗！
 
我靠近阿揚，輕輕貼上佢既唇上。
 
「獎勵！滿意未呀？」
 
「如果多少少就好！」
 
「咪得寸進尺！」
 
「好啦好啦！唔玩你！快啲上樓！」
 
「陣間學校都見啦！你真係呀！」我離開車輪就向前行左數步。
 
回頭一望，阿揚車輪仍未駛去。




 
我既手劃過天空，用最大力度同阿揚say bye，而阿揚係車內都不斷揮手。
 
過左一陣，我先向前行，上去梳洗。
 
2個鐘內，我要沖涼洗頭化妝夾頭。
 
唔知搞唔搞得掂？平時返工都唔會夾頭，但阿揚係學校，我都想比自己最好一面比佢睇到。
 
我係有限時間快速梳洗後，最後噴埋木質調香水就出門。
 
“That you were Romeo, you were throwing pebbles, and my daddy said stay away from Juliet……”我手機鈴聲響起。
 
「喂～」我興奮接下電話。
 




「你依家係邊？」
 
「屋企樓下。」
 
「你抬頭望向前方！」
 
眼前阿揚笑瞇瞇向我揮手。
 
佢咁快梳洗完，仲要可以車埋我？
 
我即刻覺得自己做野好慢……
 
我進入車輛後，阿揚就比左份三文治比我，並講：「知你未食早餐，咸牛肉三文治，再加檸檬茶走甜少冰。」
 
「哇，咁快買埋早餐！」我滿心歡喜打開三文治，大口大口嘴嚼。




 
「正希，慢慢食啦！荃灣去九龍灣好快，一定可以準時返到學校。」
 
「係因為好好味⋯⋯所以先⋯⋯食得咁快⋯⋯」我一邊食，一邊講。
 
阿揚只係笑一笑，眼望前方講：「下次再買比你食。」
 
食完三文治之後，距離學校仲有一段時間。
 
「上星期辯論學會取消左，今日補搞返，活動完左一齊食飯？」阿揚講。
 
「今日唔得，我約左朋友食飯，你都識㗎！」
 
「Katy？」
 




「Bingo！仲有Alice同Irene！」
 
「你地睇嚟好Fd，畢左業咁耐都有聯絡。」
 
「平時都約開Katy，Alice同Irene真係間中先約，畢竟要夾晒4個人時間，其實真係好難，特別係Alice，佢做左演員之後啲時間好Full，好耐先見一次。」
 
「Alice？係咪賣寶礦力廣告個女仔？我聽同事講佢係畢業生。」
 
「係呀！佢依家接左好多廣告，寶礦力只係佢其中一個。」
 
「我唔係好留意明星，真係唔太識佢。」阿揚無奈笑一笑講。
 
「我係前面街口落車。」我講。
 
「你想唔公開關係？」聽落阿揚語氣有啲失落。
 
「費事比同事發現啦！」我眼望周圍講。
 
「主要我覺得公開關係，就唔會有人打我女朋友主意。」阿揚牽起我既手講。
 
「點會呀？你唔係唔知班同事就係長舌婦，個期邊個有八掛，就會係咁講佢地，我聽佢地講野，耳仔都攰。」我輕輕搖頭，苦笑道。
 
「咁佢地總會有新既八掛，講完就唔會再講。」阿揚繼續講：「不過唔緊要，你唔想，我都唔會逼你既。」
 
阿揚輕輕摸我頭頂，講：「咁你落車先，我依家揸車返去，應該會快你5-7分鐘。」
 
我同阿揚前後腳返到學校，只見同事都埋首工作。
 
我不禁嘆左一口小氣，然後工作，準備班主任課事宜。
 
唔知琴日Giselle返到屋企點樣呢？我望向右邊，吳姑娘咁啱唔係座位上。
 
「唔該我想揾盧正希老師。」教員室傳出廣播。
 
我行出教員室門口，只見 Giselle 掛住深深既眼袋，一臉疲倦，眼神空洞，望住走廊既風景。
 
「Miss Lo，你有冇試過諗，如果有一日你唔係到，世界會點樣？」Giselle回頭說。