搭錯線：錯誤的時間遇上你: 第九十九章：並肩的日子

「點解你會咁諗？」 我緊張地問。
 
「我成晚冇瞓過，不斷係咁諗，如果我唔係到，所有唔好既野都會消失，做人唔會再辛苦，唔好咩？」
 
「咁你家人都會傷心，同埋你好朋友Tiffany，仲有我，都會覺得難過。」
 
「你同Tiffany難過係真，但我老豆同阿哥只會覺得少左搖錢樹。」
 
「咁你阿媽呢？」
 




「我阿媽？唔知呢？」 Giselle苦笑講。
 
「你阿媽好緊張你，上次你暈低，我見到佢好心急等你醒返。」
 
「我真係唔知……佢……」Giselle停了半响，深呼吸後繼續講：「佢乜都做唔到，由得阿爸同阿哥，咁算係負責任阿媽咩？返工唔係大晒！」
 
「我琴日驚到瞓唔到……我好驚……我好驚一瞓醒，就會見到阿爸同阿哥，叫我去做野……如果未來係咁樣，我寧願去死！我唔想晚晚提心吊膽，驚到瞓唔到！」
 
望住Giselle，我腦海不其然浮現阿揚既身影。
 




我唔知道可以幫到幾多，但最起碼，我唔想佢都失眠。
 
係阿揚身上，我已經知道失眠實在太痛苦。
 
「我知你唔係想消失，只係依家好驚，好唔想返屋企，最重要係你嬲媽媽係呢件事上面幫唔到手，係咪？」
 
Giselle不發一言，垂頭望住地下。
 
「你依家唔需要答我，你自己心入面有答案就得。」我繼續講：「吳姑娘你都識，不如午息時候，你試下同佢講下依家諗咩？吳姑娘可以做既野，比起我更加多。」
 




Giselle緩緩點點頭。
 
「除左我，我只係想多一個人去幫你，萬一有咩急事你搵唔到我，仲有吳姑娘係你身邊。Giselle，你要知道你唔係孤單一個人。」
 
「多謝你，Miss Lo，同你講完舒服好多。」Giselle久違微笑講。
 
「有咩事就同我講聲。」我拍拍Giselle肩膞講。
 
Giselle 離開之後，我就搵吳姑娘，同佢交代Giselle事件，並且叫佢跟進。
 
如果Giselle解決家庭問題，自然就可以瞓得安樂，同樣地，如果解開阿揚、詩韻同媽媽，三個人既心結，咁阿揚係咪唔會再失眠？
.
教左成日書，終於到放學時間，我前往辯論學會課室，同學正在練習辯論，而阿揚仲未到。
 
「Rachel，你地依家練到邊？」




 
「題目一二。」
 
「一定二？定一同二？」
 
「一同二分別唔同隊練緊，陣間會調轉練習。」副主席Chris補充。
 
Rachel只係繼續指點後輩，旁邊既Chris尷尬笑一笑，就跟住Rachel。
 
「大家練成點？」一把低沉既聲音從我身後出現。
 
我回頭一望，阿揚同我相視而笑。
 
「我地依家練緊辯題一同二，分左ABCD Team，各有正反方。」Rachel 回答。
 




「進度點樣？」
 
「Ok la！查sir你上次急事取消左辯論學會，冇咩事呀嘛？」Rachel問。
 
「件事已經搞掂，你地練完，可以比賽，向我同Miss Lo講聲，我地有重要野要傾。」
 
阿揚同我坐係老師桌前面，枱下佢靜悄悄牽起我既手。
 
我睥一睥阿揚，隱藏笑意，講：「查Sir，有咩重要野要傾，連指導學生辯論都唔做？」
 
「同Miss Lo好多重要野要傾㗎！例如Miss Lo鍾意食咩、Miss Lo今日點解咁靚啦～」
 
「痴線……」我忍唔住笑左出嚟。
 
「我好關心Miss Lo 幾時得閒。」




 
「今個星期六日都要改簿，成3班！仲未備課！」我苦腦咁講。
 
「我都知主科比起選修，忙好多！」阿揚無奈笑講。
 
「咁我地返工都會見㗎嘛！仲有放工時間！」
 
「放工時間，仲可以食飯既！」
 
「查Sir，Miss Lo，我地準備比賽。」Chris過嚟講。
 
「今日辯題係『成績是否衡量一個學生價值的最佳標準？』先請由正方發言。」Rachel講。
 
「多謝主席。我方認為，成績係衡量學生價值既最佳客觀標準，當中反映學生既學習能力、努力程度同知識掌握。」
 




「多謝主席。我方認為，成績唔係衡量學生價值既最佳客觀標準，成績只可以反映一個學生既學習能力，但其他學生價值包括創意、品格、同理心同抗壓能力，所以我認為成績唔代表學生價值。」反方學生發言。
 
經過一輪辯論，我同阿揚要揀邊一方勝利。
 
「你揀邊一方？」我壓低聲線問。
 
阿揚不假思索講：「反方，佢地例子好充足，反駁到正方論點。」
 
「我都係反方，可能個人立場都有影響，點都覺得反方講得好啲。」
 
阿揚轉身，向學生宣布：「我同Miss Lo傾完，決定反方勝利。反方主要有較多現實例子做support，例如體藝優秀同善良既學生，佢地唔會因為成績唔好，而喪失佢地價值。」
 
「無錯，我好同意查Sir既說話。即使身處逆境，有良好既道德品格，比起成績好更為重要。價值，唔係由成績定義，所以你地放鬆少少，盡情咁享受你既青春，努力讀書同時都要有休息時間！」我微笑講。
 
「今日兩位老師立場竟然一致，少有。」Rachel 講。
 
「係囉！我仲諗起第一次兩個老師辯論，真係好精彩，唔知仲有冇機會睇下呢？」Chris加嘴。
 
「冇啦冇啦，就嚟放學，你地又練得差唔多，星期四見啦！」阿揚擦住黑板，催促學生講。
 
一班學生只好收拾桌面東西便離開班房，剩下我同阿揚二人。
 
「你約左朋友食飯，我早啲放人！」
 
「公器私用？查Sir，你濫用權力喎！」我用手指輕輕碰碰阿揚肩膊講。
 
「適當時候用下啫！班學生可以早放學，我地又冇會開，可以早收工，大家都有好處！」阿揚得戚笑住講。
 
「得啦！唔夠你辯論經驗多，唔講啦！」我撓起雙手講。
 
我突然醒起一個問題，於是問：「點解你當初會揾我做辯論隊老師？」
 
「因為唔夠指導老師既學會，個啲通常好多野做。」阿揚停一停，清清喉嚨講：「同埋我淨係想揾你，想同你好似以前咁熟。」
 
個一刻，我咩都冇諗，就直接上前抱緊佢，講：「我唔會放開你。」
 
我緊貼佢，繼續講：「就攬一陣。」