搭錯線：錯誤的時間遇上你: 第一百章：不變

「呢度學校，萬一有老師睇到，我地咪會⋯⋯」阿揚眼望四周，緊張咁講。
 
「就攬十秒，我依家先知，背後你做既野係超乎我想像，到底你有幾多野冇同我講？我仲以為⋯⋯你搞到我好似衰人！」
 
「咩衰人，傻妹！」阿揚拍拍我肩膞講。
 
「我誤會你，以為你想A字膞！點知你只係諗住我！你冇諗個陣我點諗你，點對你咩？」
 
「我知8年前，你的確係好無辜，所以我一見返你，就知道一定要補償返之前錯過既時間，以及為做過既事負責。」
 




「你唔需要成日將所有事攬上身！無論係詩韻，定係我，你都冇做錯，就算錯，人誰無錯？況且你依家有我！」
 
「好啦好啦！再攬落去，我抖唔到氣啦！」
 
我放開阿揚並講：「對唔住囉！」
 
話畢，拳頭輕輕敲落阿揚胸口上。
 
「你以後有咩都要同我講！你做完好事都唔同人講，等於Kafka寫左咁多書，如果唔係佢個朋友公開晒佢啲草稿，咁好既作品冇人睇到，係幾咁可惜！」
 




「咁我唔做Kafka！以後發生咩事，第一個一定同你講！」
 
「嗯！我都會！」
 
「你今日食完飯Call我，我嚟接你。」
 
「嘻嘻，唔洗啦，你又要特登出嚟，我食完飯同你講啦！」我望住佢，忍唔住笑左一下。
 
我突然感到有啲心虛，立即望向身後走廊。
 




「係喎，頭先冇人睇到掛？」我回頭望向阿揚講。
 
「你依家先擔心！」阿揚牽起嘴角，繼續講：「放心啦，頭先我唔見有人經過，冇事既！」
 
「嚇得我！比學生見到就麻煩！」我鬆一口氣講。
 
「行啦！一陣真係有校工上嚟清潔！」阿揚搭我膊頭，推住我出去。
 
我地返到教員室，分別返到自己座位。
 
我向阿揚做左電話手勢，示意食完飯會打電話比佢。
 
阿揚望住我眉開眼笑，下一秒即刻收起笑容，變返一本正經既樣子。
 
我男朋友真係好可愛！




.
「喂！盧正希！」Katy 係我面前揮手，令我回到現實。
 
「嗯？」我微笑望住Katy。
 
「你做咩一入嚟就笑到見牙唔見眼？傻左？」Katy 再係我面前揮手。
 
「Hailey，你拍拖呀？」Katy突然問。
 
抹緊餐具既我，叉「咣」一聲跌落枱面。
 
「即係係啦！趁Alice同Irene未到，好從實招來！邊個？邊到識？幾時？係咪我識既人？」Katy 立即連珠發炮發問。
 
「Err……你的確識既……」我停止抹餐具講。
 




「唔好話我聽，係Felix喎？之前聽你講話撞返佢。定係阿Jay？復合？」
 
「唔係囉！Felix已經有女朋友，仲有我同Jay已經冇再聯絡。」我急忙否認。
 
「唔會係查sir呀嘛？」Katy見我冇回應，繼續接下去：「真係佢呀？」
 
「係阿揚……你估啱啦。」我支支吾吾地說。
 
「阿揚？？？咁快叫到咁親切？你仲未答我，幾時開始？」
 
「Katy，你慢慢嚟先……」
 
「點可以慢慢嚟！簡直係大花生！」katy已經打斷左我講野。
 
「我同阿揚琴日先係第一日。」




 
「但你以前唔係對佢好失望咩？最近我真係太忙，忙到斷晒六親！」
 
事關最近Katy公司有大project，話搞緊收購，所以Katy wts都甚少上線。
 
加上我同阿揚琴日先開始，諗住今日都會見面再同Katy講，只係我冇諗到佢會咁驚訝。
 
「主要我知道，原來佢對我心意冇變過，8年嚟一直都等緊我。」我微微一笑講。
 
「你唔係一直好care佢當你熟人個妹，又話佢當你係升職工具咩？」Katy繼續追問。
 
「佢一直都將我放係重要位置，最重要係我知道佢一直用緊佢方法保護我。」
 
「你地開心咪好，恭喜你同查sir！」Katy由衷地微笑，捉住我既雙手講。
 




「唔好掛住講我，你同James最近點樣？」
 
「都係咁啦！唔好『呢度食，呢度痾』！比同事講事小，阿姐知就事大！」
 
我記得之前Katy講過，自從阿姐知佢同James拍拖，好多時候都會分派公司比佢地兩個一齊做。
 
前題情侶做事冇問題，仲好有默契，一旦嘈架，Katy就要焗住對James，兩個面阻阻做野。
 
公還公，私還私。Katy一直都後悔同James公開關係。
 
「阿揚原本都想公開，只係我驚比人講是非，諗起你同James就係咁樣。」
 
「咪就係死人James 話公開，搞到依家咁煩！Irene啱啱wts我，話開OT，點解Alice咁耐都未到！」
 
「我Call下佢。」我撥起電話，但無人接聽。
 
「喂……Hailey……Katy……」旁邊有人用氣音叫我地。
 
我同Katy回頭一望，不約而同發出：「哇！」

************
過左140 likes，會加更一篇，多謝支持！