搭錯線：錯誤的時間遇上你: 第一百零一章：面對

眼前既Alice戴上黑色鴨舌帽，臉上戴上墨鏡同口罩。
 
「你地咪咁大聲啦屌！」Alice坐係Katy旁邊講。
 
「Alice你搞咩？」Katy捂住嘴巴既笑容講。
 
「最近有狂迷跟蹤我，所以我小心啲，兜晒路過嚟。」Alice左望右望。
 
「你著成咁先易認喎！」Katy繼續笑住講。
 




「你冇事呀嘛？」我問Alice。
 
「唉！純粹覺得好撚煩！做明星原來都唔係想像中咁好！」Alice脫下墨鏡同口罩講。
 
「唔好意思，啱啱有client，傾耐左！」Irene坐左我旁邊講，除掉手上金絲眼鏡講。
 
「喂～client搞咩搞咁耐？」Katy問。
 
「啱啱個 session 拖咗好耐，本身想帶client入狀態，但佢對催眠好抗拒，要慢慢解釋。」Irene講。
 




「點解仲同佢做催眠？」我問。
 
「因為佢有 PTSD，」Irene 望住杯水講，「有啲人唔係唔想放低，只係個腦唔肯放過佢。夜晚一閉眼，所有畫面就一齊湧返出嚟。」
 
我點點頭，繼續問：「創傷既人你一般都建議做催眠？」
 
Irene 抬頭望我一眼，稍微皺眉，搖搖頭講：「真係好睇client情況再做決定。Hailey，你身邊有人都有PTSD？」
 
「我純粹好奇問下。」我攪拌意粉講。
 




Irene聳聳肩，微笑住講「你問到咁仔細，我仲以為你或者身邊朋友都有PTSD，睇嚟我多心，食野先啦！」
 
如果阿揚進行催眠，會唔會都幫到佢失眠既病情？
 
轉眼間我地就食完飯，我就打電話比阿揚。
 
「喂～」
 
「同Katy佢地食飯？」
 
「一食完就打比你！」
 
「頭先食左咩？」
 
「我WhatsApp Send比你睇！」我一邊講，一邊已經低頭撳相。




 
「你鍾意食卡邦尼意粉？」阿揚笑住問，語氣帶點意外。
 
「係呀！」
 
「我下次整比你食！」
 
聽到呢句既我，嘴角忍唔住向上揚，已經開始想像阿揚著上圍裙下廚既樣，一定好有型！
 
「好呀！幾時試到你手勢先？」我興奮地問。
 
「今個星期六？帶完隊上去你屋企？」
 
「好！」
 




「睇嚟我要買定材料。」阿揚用開朗既聲線講。
 
「你依家做緊咩？」我問。
 
「夜晚準備出考試卷，好多野要睇。」
 
「你今晚打算幾點鐘瞓？」
 
「睇進度，反正都唔眼瞓。」隔住手機，但感受阿揚好無奈。
 
「我驚你會好攰。」
 
「最多我應承你，出到一半卷就去瞓。」
 
「你打算食安眠藥？」




 
「有需要的話。」
 
「今日聽Irene講，佢依家係心理醫生，今日佢幫PTSD 既client 做催眠，我係到諗你會唔會有需要。」
 
「我之前心理醫生有向我提議過，但我拒絕左。」阿揚淡淡地講。
 
「點解？催眠有機會改善到你既失眠。」我緊張地問。
 
「我唔想再諗起個陣既事。」阿揚沉著氣講。
 
電話間突然沉默，只剩下背景車廂同人們交談聲音。
 
「唔緊要，可能我太心急……你都需要時間。」我停一停，勉強笑住講：「我唔阻你出卷啦。」
 




「你返到屋企Wts我。」阿揚再度輕快地講。
 
「嗯。拜拜。」我按下收線制。
 
我係咪唔應該干涉佢太多？
 
我只係想佢可以完整瞓到天光，點解佢咁快就拒絕催眠？
 
「下一站，太子。Next station, Prince Edward.」我由太子行去對面月台。
 
我上到去荃灣列車後，突然踏出車門，轉身選擇往中環方向既列車。
 
去到尖沙咀，我前往熟悉既酒吧。
 
打開酒吧門，傳來既鋼琴聲音令我停下腳步。
 
查母陶醉在鋼琴中，絲毫冇察覺我既到來。
 
佢專注既眼神，追求完美既表演，其一絲不苟既態度，更令我諗起熟悉既臉孔。
 
我一直聆聽佢既表演，直到佢彈完為止。
 
佢抬頭一望，我地對上眼。
 
「你咪係上次個老師？」查母問。
 
「伯母你仲認得我？」我驚訝地說。
 
「當然認得，上次件事咁深刻！」
 
「其實我係阿揚女朋友，想同你傾下阿揚既事。」我開門見山咁講。
 
「你係佢女朋友？」查母瞪大雙眼，繼續講：「呢啲係我地兩個人既事，外人冇資格插手！」