搭錯線：錯誤的時間遇上你: 第一百零二章：善意的謊言

「老師，你嚟呢度做咩？」查母再問，將我由幻想拉回現實。
 
如果我同佢坦承講係阿揚女朋友，以阿揚之前既描述，佢一定會當場發火，同我嘈架。
 
為了避免以上情況，我即刻講：「純粹今日想嚟飲野。」
 
「過嚟呢邊！」查母帶我去旁邊既座位。
 
「唔該，我要whiskey，另一位要加冰！」查母已經幫我叫埋野飲。
 




「Titos伏特加、Hendricks、Tequila……我飲過好多酒，最愛都係whiskey。」
 
「點解？你唔會覺得Whiskey 好嗆咩？」我問。
 
「以前我同你一樣，後來發現酒點苦，都唔夠人生苦……」查母苦笑，大口飲左啖whiskey，繼續講：「咁多種酒，唯獨whiskey比我既感覺，就係最苦，我諗你今日都需要杯。」
 
「但我酒量唔太好，可能會晒左你一番好意。你點稱呼？」我輕輕搖住酒杯講。
 
「你叫我Helen就得，咁你呢？」Helen微笑回答。
 




「我叫Hailey。」
 
身前既Whiskey有種煙既嗆鼻氣味，為表示禮貌，我飲掉一小口。
 
我緊皺眉頭，講：「點解會有人鍾意咁苦既野飲？」
 
Helen見我呢個反應，忍唔住笑一笑，講：「每個人鍾意既味道都唔同，唔好飲就無謂再飲。」
 
佢接著向酒保講： 「唔該比Bees Knees比呢位小姐。」
 




「雞尾酒，應該啱你飲。呢2杯當我請你飲，熟客有折。」
 
「多謝！你成日嚟酒吧㗎？上次嚟酒吧都見到你。」
 
「我會去唔同酒吧，呢間係我常去酒吧之一，同埋我同呢間酒吧有合約，得閒過嚟彈琴。」
 
「咁我地撞到都好有緣。」我講。
 
「既然我地咁有緣，咪唔洗一支公飲悶酒囉！Winnie，嚟多杯！」Helen將Whiskey一次過飲晒。
 
「你酒量睇落好好。」我望住仍未臉紅既Helen講。
 
「飲得多，冇咁易醉，只係我想醉都好難。」
 
「點解你想醉？」




 
「只要一瞓醒，活係現實太辛苦，想死又死唔去⋯⋯」Helen嘆左口氣，又再飲酒。
 
「咁你呢？今日點解一個人嚟飲悶酒？我唔介意做你樹窿。」Helen 放低酒杯，盯著我講。
 
「嗯⋯⋯男朋友意見不合⋯⋯其實我只係想幫佢，但佢個人有咩事總係收埋係心。」
 
「男人係咁樣，你只可以比時間比佢，我個仔咪咁樣！」
 
我真係講緊你個仔⋯⋯
 
「問題係我好擔心佢，正因為佢個人成日收收埋埋，所以好大壓力，有失眠問題，佢睇完心理醫生，淨係食安眠藥。」我飲左啖雞尾酒講。
 
「你知唔知佢壓力來自邊度？」
 




「來自佢家庭。」我牢牢望住Helen講。
 
「家庭⋯⋯咁我幫你唔到⋯⋯我係一個唔合格既母親。」
 
「點解咁講？你有冇問過你個仔點睇？」
 
「身為一個母親，我應該要愛錫子女，而我對佢只有憎恨。」Helen大口喝掉酒，繼續講：「我明明知唔關佢事，可能比佢講中，我唔想責怪自己，所以將所有責任推落佢到，我個心都係覺得好唔舒服。」
 
「或者你試下放低同仔仔傾下？」
 
「我都想⋯⋯只係我冇勇氣⋯⋯」Helen 又飲完一杯。
 
“That you were Romeo, you were throwing pebbles, and my daddy said stay away from Juliet……”我手機鈴聲響起。
 
「你有電話，可能係男朋友打比你。」Helen 講。




 
我望手機來電，真係阿揚。
 
我完全唔記得返到屋要同佢講聲，只係呢度一聽電話，就知我未返到屋企。
 
我將電話較做靜音。
 
「唔聽？」Helen 叫左第三杯Whiskey。
 
「Helen，你飲埋呢杯好啦，飲得太多傷身。」
 
「既然你咁講，我飲埋呢杯就停，你都飲埋杯Cocktail！」
 
我同Helen一齊飲埋剩低既酒。
 




臨走前，我同Helen更係交換Contact，方便之後聯絡。
 
離開酒吧後，阿揚再次來電。
 
我行去少人啲地方聽電話。
 
「喂～」
 
「正希，你返到屋企未？」
 
「我返到啦，頭先沖緊涼，聽唔到你電話。」
 
「咁就得啦，咁你早啲抖，聽日我過嚟接你。」
 
「好呀，Goodnight。」
 
「Goodnight。」我立即掛斷電話。
 
如果阿揚知我私下特登揾佢阿媽，感覺佢會嬲。
 
只要幫到阿揚同Helen和好如初，我諗⋯⋯善意既謊言⋯⋯應該冇關係？
 
飲完酒，個人有啲頭暈。
 
偏偏我返去大街，又截唔到的士。
 
突然，我前面停下一架的士。
 
「Hailey，順路車埋你？見你等緊的士。」入面乘客講。
 
「Jay？」我揉揉眼睛，確保我冇睇錯。