搭錯線：錯誤的時間遇上你: 第一百零三章：越界

「唔洗啦！我等多陣就有車。」我摸摸前額，微笑拒絕Jay既邀請。
 
自從同Jay分手，我同佢都冇見過面，冇諗過係酒吧附近見到佢。
 
「Hailey，呢度好多醉酒佬，你一個女仔係到我唔放心，同埋你睇落有啲醉喎！不如我叫司機車你返去先！」Jay 輕輕笑住講。
 
「係囉小姐！呢位先生講得啱㗎！我周不時見唔少女仔飲醉，比人『執屍』！」司機搭嘴。
 
我眼望四周，的確好多醉酒既人，有啲嘔緊，有啲嚎聲大哭，有啲行路失衡，跌喺地上，
 




「咁好啦，唔該你。」我輕輕點頭，拉開車門坐上後座。
 
Jay嘴角帶住一抹似有若無既笑意講：「Hailey，好少見你飲酒喎！以前我記得只有我飲，你係旁邊睇我飲。」
 
「人都變，正如你同我都會變。」我淡淡然講。
 
「我冇變，起碼我仲係好鍾意飲酒。」Jay側側頭，語氣帶點自嘲講。
 
「你酒量仲係咁好，不過酒到底有咩好飲？」
 




「睇你飲咩類型酒。飲酒當獎勵自己？收工飲返杯，同人吹下水。」Jay 擺擺手，輕鬆咁講。
 
「你都講得啱，飲左酒，個人又真係唔會諗好多野。」
 
「所以你先會上我車。」Jay笑住講。
 
「你同司機都話多醉酒佬呀嘛！」我無奈笑住講。
 
「Hailey，你住邊到？」
 




「我住荃灣，陣間係荃灣花園放低我就得。」
 
「咁啱既，我住青龍頭，我地都順路喎！」Jay開朗地講。
 
「司機，陣間荃灣放低呢位小姐，之後再去青龍頭，呢度係車錢，唔洗找。」Jay將數張鈔票塞係司機手中。
 
「我比返車錢比你？」我講。
 
「唔洗啦，我地仲係朋友嚟㗎嘛？」Jay 笑住問。
 
「嗯⋯⋯咁當然啦！」我尷尬笑一笑講。
 
「你最近過成點？」Jay問。
 
「湊住班學生好忙，同埋你知學校幾多行政野做，仲多過教務工作。」我無奈地說。




 
「點會唔明⋯⋯大家都係語文科老師，中文同英文工作量差唔多！除左工作，你平時有咩做？仲係鍾意睇書？」
 
「當然有，你呢？」
 
「最近好忙，好耐都冇睇書，有時間去247已經好好。」Jay聳聳肩，接住問：「咁感情生活呢？你有冇男朋友？」
 
「最近拍緊，你同Christy呢？」
 
Jay同我分手之後，冇幾耐就同Christy一齊，佢地一齊既時間有3定4年左右？
 
「我同Christy？一早散左。」
 
「以你條件，好快識到女仔。」我講。
 




「唔係㗎，有時仲要講timing。」Jay望住我講。
 
「總會有個啱timing，時間未到啫。」
 
「講就咁講！如果我地仲拍緊施，你覺得我地今日會點樣？」
 
我望向Jay，只見佢一臉認真講。
 
「唔好回望過去，我地要向前看。」我冷冷地說。
 
「你仲嬲我當年分手講既晦氣說話？」Jay 緊張地說。
 
「Jay，當年你講得啱。」我停頓幾秒，深呼吸講：「或者我一直望住既人，其實唔係你。」
 
「你果然仲記得⋯⋯個陣我太嬲先咁講，你唔好放上心！」Jay語氣急速地說。




 
的士突然一個大轉彎，我身體失去平衡，向 Jay 嗰邊傾過去。
 
Jay 下意識伸手扶住我，手卻冇即刻鬆開，反而順勢捉緊我隻手。
 
「放手！你頭先都話我地仲係朋友，同埋我已經有男朋友！」我帶點怒氣講。
 
Jay 只好放開我既手，用不甘既眼神望住我。
 
「司機，前面放低我就得。」我急忙拎起手袋就離開的士。
 
「Hailey！」Jay係車廂叫住我，我卻不回頭。
 
好彩司機係大窩口放低左我，我只需要行一個站就返到屋企。
 




風輕輕吹過我既臉頰，吹走我身上既酒意。
 
明明阿揚係我男朋友，呢件事應該要同佢講，但如果一講，佢就會知道頭先我同佢講大話。
 
幾經辛苦獲得既信任，我唔想就咁樣功虧一簣。
 
今晚既事，我希望如同酒意一樣消失。