搭錯線：錯誤的時間遇上你: 第一百零四章：內疚

成晚我都諗住Jay件事，在床上輾轉反側，直到清晨。
 
我提早起床，用強勁既遮暇膏蓋過暗黑既黑眼圈，臉頰上再用胭脂抹多數遍，睇落個人精神啲。
 
我去左茶記準備買早餐。
 
「想食咩？」男店員講。
 
「唔該我想要餐肉三文治，凍檸茶走甜。另一份係⋯⋯」
 




我突然諗：
到底阿揚鍾意食咩？
唔鍾意食咩？
野飲正常甜度？少甜？走甜？
有冇食物敏感？
 
「小姐，另一份你想要咩？」男店員不耐煩問。
 
「唔好意思，我唔要啦。」我急忙離開。
 




「痴線！繁忙時間過嚟玩野！後面仲有好多人排隊㗎！」男店員大喊。
 
一直以嚟，都係阿揚了解同照顧我。
 
我好似視佢既付出同理解係理所當然。
 
一諗起琴日同Jay既事，我個頭不禁抽痛。
 
死啦！阿揚會唔會買埋我份早餐？
 




我即刻打電話比阿揚。
 
「喂～阿揚，你買左早餐未？」
 
「啱啱買左！餐肉三文治，凍檸茶走甜。」對話中既阿揚聽落好精神。
 
「你點知我今日想食呢個？」我勉強提高聲線，假裝開心咁講。
 
「你通常食朝早食咸牛肉、餐肉、炒蛋三文治多。」
 
「我好似冇同你講過喎！」我吞吞口水講。
 
「憑我既觀察！快啲讚你男朋友！」
 
「叻呀你！」講完之後，我眼眶微微發熱。




 
我抽抽鼻子，繼續講：「咁你呢？你買左你自己早餐未？」
 
「買左！蕃茄牛肉通心粉。返去Office先食。」
 
「仲有買左咩野飲？」
 
「熱奶茶。你今日突然咁好奇我食咩既？」阿揚好開心咁問。
 
「咁⋯⋯咳⋯⋯我都想知你鍾意食咩、唔鍾意食咩、平時飲開咩。」我開始有啲哽咽。
 
「正希，睇嚟你想買早餐比我喎！」
 
「下次⋯⋯咳⋯⋯下次一定買到。」我抹去旁邊淚水講。
 




「嚟緊大把時間，冇所謂啦！係呢，我依家去到你屋企樓下，你快啲落嚟！」阿揚興奮咁講。
 
「我係屋企附近間7仔。」我行去茶記旁邊既711。
 
「哦！我見到你！」阿揚將車駛過嚟。
 
我勉強笑住同佢揮手並上車。
 
「正希，你唔舒服？見你面色好差，頭先電話又有聲咳。」阿揚擔心問。
 
「我冇事，琴晚唔夠瞓啫。」
 
「我琴晚聽住海浪聲瞓著，如果你真係瞓唔著，你都可以試下。」
 
「嗯。」




 
我突然摸摸耳珠，發現右邊耳環跌左。
 
「死啦！」我焦慮地說。
 
「做咩事？」
 
「我右邊耳環唔見左！」
 
「咩樣？」
 
「銀色花朵樣，中間鑲左粒鑽石。」我急忙在車上不斷翻尋，但徒勞無功。
 
「正希，我等陣會幫手搵，你不如快啲食早餐先，我驚凍！」
 




「好啦。」我接過佢比既三文治。
 
即使眼前餐肉三文治香噴噴，腦袋一靜便會重播琴晚既事，讓我頓時失去食慾。
 
「唔啱食？」阿揚見我久久未動而問。
 
「可能琴晚食得太多，消化唔到。」我按著肚子講。
 
「咁你一陣返到學校記得食，陣間上堂就冇時間食野，你有時Lunch time忙到連飯都食唔切。」
 
「你真係好了解我。」
 
「唔了解你點做你男朋友？」儘管阿揚揸緊車，仍然牽著我既手。
 
「相比你了解我既程度，我好似冇咁了解你。」我低頭講。
 
「Sorry，我可能少講自己野，我會同你講多啲自己野。」阿揚一臉真摯同我講。
 
明明就係應該我講Sorry，點解你會同返我講Sorry？
 
「Sorry⋯⋯其實我⋯⋯」
 
前面嗰架車揸得又快又亂，導致阿揚突然嚟一個急煞。
 
「其實咩？」阿揚停下車，側側頭望我，語氣溫柔地說。
 
我避開佢視線，勉強笑左一下：「冇野呀⋯⋯其實我想話好多謝你，明明我咁蠢，成日咩都要你照顧同包容我。」
 
阿揚輕輕捏我隻手：「拍拖本來就係互相照顧㗎啦。」
 
我微笑點點頭，心入面卻愈嚟愈沉。
 
我依然冇勇氣同阿揚坦白，就連講一句「對唔住」都冇勇氣。
 
「你不如恰陣，瞓醒我叫你？你今日面色好差！」阿揚皺住眉頭講。
 
「嗯。」我瞇起眼睛休息。
 
我感覺阿揚摸我既額頭，細聲講左一句：「冇發燒。」
 
我寧願佢唔好對我咁好，對自己好啲，起碼我個心冇咁痛。
 
我轉過面向窗外，假裝已經瞓著。