搭錯線：錯誤的時間遇上你: 第一百零六章：差半步

「朋友。」我同Jay異口同聲，並互相對望。
 
「佢係我大學朋友。」我急忙向阿揚解釋。
 
只見Jay嘴角不禁向上揚，我立即盯住佢。
 
「你一定係Hailey男朋友。」Jay主動上前伸出手。
 
阿揚望左我一眼，望向Jay，露出標準微笑講：「係呀！我係正希男朋友，我叫Charlie。」
 




話畢，阿揚緊握Jay既手。
 
我係旁邊睇得心驚膽跳，兩方絲毫放棄既跡象都冇。
 
「今日真係麻煩你送返耳環比我，如果冇咩事，我同男朋友就走先。」我刻意係男朋友3個字上加重語氣。
 
Jay淡淡一笑，放開阿揚既手講：「我陣間都約左人係bar飲野，買醉既感覺真係好爽，Hailey你話係咪？」
 
「我好少飲酒，係你先飲得多。」我冷冷地說。
 




「乜係咩，唔太記得，哈哈！唔阻你同男朋友～你地繼續啦～」Jay望住阿揚，留下意味深長既笑容。
 
佢咁講代表我同阿揚kiss個陣，睇得一清二楚！！！！
 
望住Jay遠去背影，我不禁咬牙切齒，恨不得用拳頭令佢收聲。
 
自以為是呢一點，佢真係一啲都冇改過！
 
「上去我屋企？」我牽住阿揚既手講。
 




阿揚點點頭，我地就一同上去。
 
過程中我地保持沉默。
 
直到上到我屋企，阿揚先開口講：「Hailey你咁大頭蝦，漏左耳環係Jay到都唔記得。」
 
「琴晚去過咁多地方，真係唔太記得，哈哈！」我假裝輕鬆說道。
 
「琴晚我記得你同我講過，係中學朋友飯眾，而Jay係你大學朋友，你地好有緣撞到？」
 
「咁啱撞到。上到嚟我屋企，飲咩？茶、果汁、水？」我刻意走進廚房，逃避阿揚既目光。
 
「水。」阿揚跟隨我入廚房。
 
「你係出面等我就得。」我從廚房走出嚟。




 
阿揚接過我既水杯，但水杯只係完整不動放係桌上。
 
「你同Jay大學個陣好熟？佢連你屋企都知。」阿揚冷不防地說。
 
「你想問咩？」我忐忑不安，搓著手指說。
 
「應該係我問返你先啱，到底琴晚你去左邊？」阿揚緊皺眉頭同抿嘴，更上前一步說。
 
我同Jay係意外見到，原本係想揾Helen。
 
我喉嚨好似有野塞住左，連一個字都講唔到出嚟。
 
點解咁簡單既一句我都唔講？
 




「你唔講，我幫你講？」阿揚沉住氣，繼續講：「你琴日呃我同Jay去飲野，根本冇見過Katy佢地。」佢木無表情望住我。
 
唔係唔係唔係唔係唔係唔係！！！！！！
 
根本唔係咁樣！
 
「你再唔出聲，我當我諗既野係啱？Jay係你個Ex？你地一直Keep住仲有見面？」阿揚苦笑一下，講：「冇野啦，我都係走先。」
 
阿揚轉身到大門之際，我從背後抱上去。
 
「阿揚，唔好走……件事唔係你諗咁樣！」
 
「事實係我⋯⋯我去左揾你阿媽……我知你一直會唔高興，所以我先唔想講！」我衝口而出。
 
「我琴日真係同Katy佢地食飯，食完飯我叫你做催眠，你唔肯，咁我咪試下去酒吧揾你阿媽，純粹想了解多啲你屋企，點知又真係見到佢，先同佢傾左幾句。你阿媽唔知我係你女朋友，我只係以朋友身份同佢傾。」




 
「你講啱，Jay的確係我個Ex。自從我地分左手，就算上GE courses，我地都係分開坐，根本冇再聯絡。至於琴晚，我係飲到有啲醉，咁啱真係見到Jay，佢好心車埋我，我琴日都已經講得好清楚我有男朋友！佢拖我手我都已經拒絕左佢！」
 
「我本身冇諗住呃你，我驚……我驚你會嬲我私下搵你阿媽，你會嬲……我想你唔會比過去困住，可以向前行……」我越講越哽咽，已經講唔落到去。
 
「我諗我地都需要時間去消化。」阿揚強行拉開我對手，轉身離開，只剩下我一個人在原地。
 
「對唔住，我唔應該呃你……」我跪坐在地下，飲泣地講。