搭錯線：錯誤的時間遇上你: 第一百零七章：查利揚視角（1）——裂痕

「件事唔係你諗咁樣！」
 
「我咪試下去酒吧揾你阿媽，純粹想了解多啲你屋企⋯⋯」
 
「Jay的確係我個Ex⋯⋯我琴日都已經講得好清楚我有男朋友！佢拖我手我都已經拒絕左佢！」
 
「我本身冇諗住呃你，我驚……我驚你會嬲我私下搵你阿媽，你會嬲……我想你唔會比過去困住，可以向前行……」
 
「嘟嘟！」聲音來自後面既車，令我從思考中拉回現實。
 




訊息一段一段係腦入面重播，我卻一句都整理唔到。
 
我努力集中精神揸車，但不斷諗起正希。
 
我知佢做既所有野都係為左我，只係佢瞞住我見阿媽，更加瞞住我見Jay！
 
我心口一緊，便用力鬆開胸口上既領帶。
 
不知不覺間，我返到屋企。
 




我拎起手機，發現正希WhatsApp send 左messages比我。
 
「Sorry阿揚，我唔應該私下揾你阿媽。」
 
「仲有我唔應該瞞住你，見到Jay應該同你講。」
 
「原本我以為只要Jay唔出現，我對你好返啲，個心就可以舒服返啲，甚至可以當乜事都冇發生過。」
 
唔通正希今朝既唔舒服，而係因為Jay？
 




今朝既正希話想知我食野既口味，其實佢係想了解我多啲，係想同我走落去？
 
「我知你一定嬲緊，你係有權嬲我。」
 
「我預左你未必會咁快覆我，或者我地都要多啲時間。」
 
「只係我想同你講，我同Jay既關係真係唔係你諗咁樣。」
 
「由我決定揀你個一刻，我就諗得好清楚，我地一定會一齊行好多好多既路。」
 
「我已經一早放低Jay。你同佢唔同，你比到佢比唔到既野比我。」
 
我都想知，我同Jay到底有咩唔同。
 
「你仲記唔記得你第一次同我表白，我咪拒絕左你，其實係我同Jay臨分手前，佢曾經同我講過，話我唔識愛人。」




 
佢話正希唔識愛人？係我眼中，佢係好善解人意，永遠將人地感覺放係自己前面既傻妹。
 
「未重遇你之前，曾經有男仔同我示好，但因為呢句說話，我一直質疑自己，係咪唔識愛人，所以我推開左佢，更重要係我總係諗起你，中學時期對我無微不至既你。」
 
「直到見返你，我先知我一直放唔低你。當你病左既時候，我真係好緊張，好驚你有事。」
 
8年嚟，原來我地都放唔低大家。
 
「同埋個日係你屋企，我無意中倒瀉水，先發現你一直keep住左我地當年Christmas Party影左相、選科講座既書籤，仲有個日我知dse前你比我粒pandol，原來係你最後一盒。」
 
所有野佢知道晒？
 
咁日記佢有冇睇到？
 




「令我真正發現我對你同Jay唔同，係見到你阿媽個一次，我唔係因為你對我好而鍾意你，而係我發現自己冇合理身份可以即時知你感受，知你點諗，有關你所有既野，我都想知，所以我諗無論點樣既你，我都鍾意。」
 
「每當你唔開心既時候，我希望可以及時安慰你，成為你既避風港。」
 
「我唔知依家先講會唔會太遲……你頭先明明就比左咁多機會我去坦白。」
 
「我只係希望，你可以幸福。」
 
「Goodnight.」
 
睇到呢到，我關掉手機屏幕。
 
快速沖涼之後，我就上床打算瞓覺。
 
正希只係想我幸福，唔再被失眠困擾。




 
如果我唔再失眠，可以真真正正瞓到覺，咁就好。
 
我從手機中播放樹林聲音。
 
1隻綿半、2隻綿半、3隻綿羊……
 
正希依家唔知瞓左未？
 
我同佢聽日仲有辯論學會。
 
我真係唔知以咩心態面對佢。
 
10000隻……綿羊。
 




我將手背放在眼上，晨曦逐漸灑進入屋內。
 
唔知係咪冇瞓過，感覺新一天仍然係舊一天，問題仍然存在。
 
我換好衫，就落去茶記買早餐。
 
「哥仔，今日遲左嚟，想要咩？」嬸嬸熱情地講。
 
「沙嗲牛肉麵同齋啡。」
 
「另一份呢？」
 
「今日淨係要一份。」
 
「同女朋友嘈架呀？」嬸嬸突然問。
 
「佢今日會自己買返自己個份。」
 
「睇你咁樣，咁即係嘈架！快啲同人地好返啦！女仔嬲好易氹！」嬸嬸嘆氣講。
 
「你有心啦！」我無奈地講。
 
「拿！私人醒大碗既沙嗲牛比你，食完有力氣，好搵返女朋友！」嬸嬸笑逐顏開地講。
 
返到學校，我返埋位做野。
 
冇幾耐正希都返到，我地相視數秒，我卻逃避佢既目光，假裝埋首工作。
 
今日既我地就好似熟悉的陌生人，不斷係教員室擦身而過，但一句說話都冇同大家講話。
 
「叮噹叮噹叮噹叮噹……」放學鐘響起。
 
我同正希在課室門外遇上。
 
當我想開門既時候，正希剛好伸出手。
 
我地一齊掂到門柄既同時，更碰到對方既手。
 
「你開先。」正希退後並縮手。
 
我打開門先進入班房，正希跟上我既步伐。
 
「今日題目係『善意的謊言是否構成傷害？』」我一邊講，一邊係黑板寫低題目。
 
旁邊既正希抬頭，微微咬著嘴唇，下一秒掛著虛假既笑容講：「你地分正反方，有10分鐘時間準備。」

*******
另一邊過左160 likes，聽日會加更一篇，多謝支持！