搭錯線：錯誤的時間遇上你: 第一百零八章：查利揚視角（2）——傷害

正希講完之後，望住我欲言又止。
 
佢抿著嘴巴，下一秒則掛上專業既笑容，比建議準備中既學生。
 
我行去反方學生附近，睇到正希留下既字跡。
 
「如果善意既謊言係為對方著想，對方理解自然唔會造成傷害。」
 
我深呼吸，行去正方學生個邊，只見正希同佢地講完，剛好離去，紙上未有佢既字跡。
 




迎面碰上後，我講：「你今次係揀反方？」
 
眼前既正希望向正方一眼，講：「你好明顯係想揀正方，就唔洗問我意見。」
 
「我見你比反方意見咁仔細，覺得你揀反方唔係好合理咩？」
 
「老師應該保持中立，正如我唔明辯論隊點解要討論呢條題目，而唔係用辯論比賽常出題目。」
 
「呢條題目有好多觀點與角度，值得討論。」
 




「有咩放工講，我唔想嘈，特別係學生面前。」正希用氣音講。
 
佢盯左我一眼，就行去反方學生方向，而我行去正方學生個邊比建議。
 
「嘟嘟嘟嘟嘟嘟⋯⋯」計時器不知不覺間響起。
 
「好，依家正反學生可以準備辯論。」我講。
 
「今日辯題係『善意的謊言是否構成傷害？』先請由正方發言。」正希講。
 




「多謝主席。我方認為就算出發點係善意，謊言本身就係隱瞞對方，利用對方信任，係背叛既行為，所以一定會構成傷害。」正方代表Rachel企起身講。
 
「多謝主席。我方認為善意的謊言唔一定構成傷害，反而有時係保護。如果事實令人受傷，而謊言係避免佢崩潰，本質上呢個謊言係善意，重要係唔係所有謊言都會比人發現，又點會構成傷害呢？」反方代表Chris講。
 
「多謝雙方立論。接住落嚟進入自由辯論環節。」正希望住兩邊，語氣認真咁講：「請正方先開始提問。」
 
「我想問反方，如果你話善意謊言係保護，咁係咪代表只要你覺得自己出發點係好，就可以任意講大話？」正方代表Daniel講。
 
「首先謊言本質係唔好，而問題係如果謊言前題係驚對方知道真相會受傷，咁呢個謊言係合理既。」反方代表Natalie講。
 
「紙係包唔住火，謊言都唔係事實，始終都係會穿煲，到時對方知道真相，只會比原先受更大傷害，包括大家信任既破裂。」Daniel反駁。
 
「有幾多個謊言係一定會揭穿？正方同學，如果我同你講，你琴日唔見左粒朱古力，以為比自己食左唔記得，實際係比我食左，但我知道你明明病左，根本唔應該食朱古力，咁我出發點都係為你著想，同埋我唔講，你根本就唔知。」Natalie向著Daniel扮著鬼臉。
 
「原來就係你食左我粒朱古力！」Daniel大喊！




 
「Miss Lo，查Sir，Daniel所講既野同辯論話題無關！」反方Elaine講。
 
「正方同學繼續發言，唔好再講辯題以外既話題。」我講。
 
「從上述例子睇，Natalie出發點係為Daniel好，但佢都係呃左Daniel，同埋呢個確定係善意既謊言？依我所見，Nataile係為食多啲，佢已經唔係第一次偷食Daniel啲野食，Nataile動機係掩蓋自身過錯。」正方Billie 發言。
 
「容我再舉第二次個例子，感情上通常大家都一心一意，如果其中一方同Ex有聯絡，但Ex揾佢可能係有急事，咁佢唔同現任講Ex揾佢，其實目的都係唔想破壞關係為前題。」反方Markus發言。
 
「問題係，說謊者總係認為自己保護對方，實則根本就係自私。頭先例子中，既然Ex揾佢有急事，即係唔係單方面感情糾紛，點解就唔可以同現任講清楚，要講大話呃佢？事實上，因為佢驚對方嬲，驚對方走，驚自己要承擔後果，所以先選擇隱瞞，謊言前題根本就唔會有善意，帶嚟只有傷害！」正方Billie 激動地反駁。
 
全班瞬間鴉雀無聲。
 
我望向正希，只見佢低頭，若有所思既樣子。
 




「喂，Billie，你咁激動做咩？」Markus無奈地講。
 
「十成九佢男朋友同Ex有聯絡啦！呢題啱晒佢！」Elaine 捂著嘴笑住講。
 
「喂！Elaine，頭先查Sir咪講左辯論期間要講返辯論相關既野，我同Roy既事唔關你地事呀！」Billie大喊。
 
「好啦，你地都冷靜，雙方總結陳詞！」正希板著臉，行上前講。
 
「我地正方認為謊言根本冇善意可言，謊言只會成為傷害別人既利器，更係傷害彼此關係，故此經營關係，應該要彼此坦誠。」Oliver講。
 
「我地反方認為善意既謊言的確存在，只係觀點與角度既問題。善意既謊言本質係想對方唔會受傷，一個小小既謊言唔會影響關係太大，最重要係說謊者出發點，係為對方好。就算對方知道真相，理解背後係用心良苦，從而原諒說謊者，甚至可以拉近距離。」Venus講。
 
「今日呢場辯論都好精彩！正方同學表現幾好，特別係Billie，論點好有說服力。」我講。
 
「你地今日發揮既水準比平時好，反方同學明確指出善意既謊言存在既原因，加上例子配合得主題幾好，繼續努力！」




 
「咁Miss Lo 同查Sir，你地又支持邊一方？」Chris 舉手發問。
 
「明顯查Sir係正方，Miss Lo係反方，你咁都唔明？」Rachel 撞撞Chris 手臂講。
 
「今日時間都差唔多，夠鐘放學。」我講。
 
當同學紛紛收拾書包離去，剩下我同正希係班房。
 
「阿揚，你今日公私不分，我唔希望因為我地嘈架，而搞到班學生。」正希拉住我既手講。
 
「我公私不分？咁你教我點為之係『善意既謊言』？」
 
正希微微一怔。
 




我向前一步，盯住佢講：「點樣『善意既謊言』唔會傷害對方？」
 
正希激動咁講：「我就係所有野諗住你，所以先唔敢同你講真相！你睇依家，同我想像中一樣都係會嬲。如果我唔同你講真相，遲啲先比你知，我相信結果一定唔同。」
 
「你話你係為我好，但你有冇諗過……」我深呼吸講：「你既『為我好』，出發點係咪令自己好過啲？」
 
眼前既正希愣一愣，講：「你點可以咁諗我……」