搭錯線：錯誤的時間遇上你: 第一百零九章：查利揚視角（3）——餘震

「我從來⋯⋯都冇諗過自己⋯⋯反而你一直⋯⋯逃避緊問題⋯⋯所以先想推開我，係咪？」正希聲線顫抖咁講。
 
「我逃避問題？依家係你唔同我坦白，私下見我阿媽，仲要同Jay有聯絡。」我聲線不自覺升高。
 
「係，呢點我從來都冇否認⋯⋯冇同你講係我錯⋯⋯阿揚呀⋯⋯對唔住⋯⋯」
 
我胸口一窒，手指不自覺收緊。
 
「我嬲係你到今日，都覺得善意既大話冇問題，你頭先仲講如果遲啲同我講，我一定唔會嬲，事實係你幾時講都好，我都係會嬲，因為大話就係錯。」我沉住氣講。
 




正希拉出我雙手講，語氣急速咁講：「我應承你，以後有咩事都同你講⋯⋯有咩事都同你講，唔再呃你！」佢握住我雙手，繼續講：「今次真係我錯，你原諒我啦！好唔好？」
 
眼前既正希一臉真懇，雙眼泛著淚光。
 
我原本想抱住佢，同佢講：「算啦，唔緊要！」
 
但依家既我站在原地，一句野都講唔出，連擁抱既力氣都冇。
 
我一諗到Jay既笑容，心中就有怒火。
 




仲有阿媽，唔知佢地個晚傾左啲咩。
 
正希眼神逐漸變得暗淡，講：「睇嚟你仲嬲緊……我想問我地……係咪……仲要啲時間？我唔想就咁結束……」
 
「我淨係知依家一諗到Jay同阿媽，心入面就好唔舒服。」
 
「對唔住……」正希咬住下唇，將我隻手握得更緊。
 
「不如我地分開一段時間，唔係分手，純粹我想要時間整理一下。」我講。
 




下一秒，佢忽然踮起腳，唇瓣輕輕貼上嚟，而我竟然冇推開，反而不自覺攬住佢條腰，回應呢個吻。
 
「起碼你冇推開我，咁就夠啦……」正希苦笑，聲音沙啞咁講：「如果你諗通左再同我講，我會等你。」
 
正希紅著眼眶，離開班房。
 
見到佢落寞既影子，我心中隱隱作痛。
 
自從同正希冷戰，每一個晚上我都係睜開眼皮度過，即使我吞下安眠藥，仍處於半醒半睡既狀態。
 
「噔噔噔……」琴音斷斷續續，我從半醒半睡既狀態，變得清醒。
 
邊個咁夜彈琴？已經連續2日都有琴聲！
 
越聽我個頭就越痛⋯⋯




 
「阿哥係我第一個觀眾，我要彈比你聽！」詩韻拉住我既手。
 
「聽完我要入房繼續做功課㗎！」看似抱怨既我，卻聽得非常陶醉。
 
我拎起枱上既電話，打過去管理處，卻無法接通。
 
我著住睡衣，去樓下管理處，只見保安已經瞓到不省人事。
 
我拍拍保安肩膞，繼而搖醒佢。
 
保安神色慌亂，指尖下意識抹過嘴角。
 
「唔好意思，請問你係？」保安急忙地問。
 




「我係20B 既住客，頭先聽到有人練琴。」
 
「呢個時間應該冇人練琴，會唔會先生你聽錯？」
 
「因為啲琴聲我瞓唔著，我頭先打過電話落嚟，但係冇人聽。」
 
保安立即逃避我既目光，一邊揾紙，一邊傻笑咁講：「先生貴姓？你留下電話號碼，我地聽日會處理。或者你塞住耳塞瞓住先？我地唔肯定邊個單位，夜晚無理由逐戶逐戶敲門問。」
 
我係紙上寫低資料，講：「希望你地聽日朝早就會處理，我唔想聽日夜晚再聽到琴聲。」接著我望住手機講：「你要知道任何人於下午11時至翌日上午7時，或於公眾假日的任何時間，在住用處所或公眾地方發出或促使發出噪音，而該噪音對任何人而言是其煩擾的根源，即屬犯罪。」
 
「好好好，查生，我地聽朝一定會處理！唔洗擔心！」
 
第二個夜晚好靜，再無琴聲，但我依然瞓唔著。
 
我只好半夜WhatsApp Dr Lee，希望聽日放工有位可以walk in。




 
一個夜晚過去，我返到學校，枱頭有樽既「褪黑激素軟糖」，同埋香薰蠟燭，上面癡著Memo，係熟悉既字跡。
 
「揚：
見你呢幾日都好攰，齋啡一杯接一杯，除左安眠藥，你可以試下食『褪黑激素軟糖』，每晚食一粒，對壓力型失眠幾有用，至於香薰蠟燭係薰衣草味，聞住佢再加埋草原聲音，應該可以幫你入眠。
希」
 
我抬頭，只見熟悉既身影不在。
 
或者學正希所講，我應該要試下解決自身問題，唔好再逃避？