搭錯線：錯誤的時間遇上你: 第一百一十章：查利揚視角（4）——正視

「Charlie，你咁突然request 要覆診，係咪發生左啲咩事？」Dr Lee問。
 
「Dr Lee，我最近完全瞓唔到。」
 
「我之前開左啲安眠藥比你，都唔得？」Dr Lee 帶有少少驚訝既語氣問。
 
「半醒半瞓⋯⋯仲要咁啱半夜聽到琴聲，平時既我唔會嬲，唔會躁⋯⋯」我掩著臉，嘆左口氣。
 
Dr Lee 保持微笑，並比左杯水比我。
 




我飲左啖水，繼續講：「我打唔通樓下電話，於是直接著睡衣落樓下，投訴半夜有琴聲問題。」
 
「你係聽到點樣既琴聲？」
 
「好似Cecilia生前成日彈既Mozart：Fantasia in D minor, K.397。」一講到呢到，我個頭就隠隠作痛。
 
「Charlie，你聽到琴聲，第一個反應係點樣？」Dr Lee 拎起記事簿。
 
「我諗起Cecilia叫我聽佢彈琴，仲見到佢既笑容。」我苦笑講。
 




「咁有冇咩唔舒服？」
 
「之前見到血先會驚，聽到琴聲都會諗起Cecilia，琴日起開始好頭痛，成個人都諗唔到野⋯⋯有種好似返去車禍現場既感覺。」
 
「因為你覺得鋼琴就等於Cecilia，諗起佢係好正常既事。除左失眠，你最近食唔食得落飯？」
 
「求其食餐，冇點留意，餓咪食，唔餓咪唔食，可能忙到Skip左餐都唔出奇。」
 
「我諗你既PTSD復發，導致以上情況出現，你可能都意識到，琴日凌晨4點幾先咁突然揾我。」
 




「純粹我平時個人唔會咁易失控。」
 
「我知，你一直都係忍耐力好強既人，有咩唔開心都收埋，然後自責。最近係咪發生咩事？」
 
「我同女朋友嘈架。」
 
「我記得你之前仲好開心，你地一齊冇幾耐，因咩原因嘈架？」
 
「佢背叛左我。」
 
「你可唔可以講多少少，係點樣既背叛？」
 
「Dr Lee，你知我同阿媽既關係，而Hailey不但私下揾我阿媽，仲要撞返個Ex都冇同我講！如果佢一早同我講，我一定可以體諒佢！唔係佢個Ex嚟到佢屋企樓下送返耳環比佢，我真係繼續比佢呃都唔知！」
 
「因為你覺得佢背叛你，你冇足夠既安全感，所以先咁嬲？」




 
「可以咁講。」我低頭回答。
 
「正確嚟講，係因為Hailey做既野唔係你掌握之中，你覺得冇安全感，一旦發生好似Cecilia預計唔到既事件，你就會自責，所以你唔係嬲Hailey呃你，而係嬲緊你自己。你認為源頭係Hailey，事實上係佢觸發左你既不安，你就將所有情緒都發泄落佢到。」Dr Lee抬頭望住我講。
 
我無言以對。
 
「Charlie，你慢慢消化我啱啱同你講既野。我換過啲安眠藥比你，有需要就夜晚食一粒，另外你瞓唔著既時候，嘗試離開張床。」
 
「點解？我已經好攰，想係床瞇埋眼休息。」
 
「Charlie，你依家係床上唔會係休息，只會不斷replay返今日發生過咩事，even 以前發生既事都有，係咪？你以前同我講過，只要個腦一空，唔係諗起Hailey，就係家人，特別係Cecilia。」
 
Dr Lee 認真望住我講：「Charlie，床上面只可以做兩件事，一係瞓覺，二係親密行為，以外既事就要離開張床，令大腦知道床既用途係瞓覺為主。」
 




「我係床上面係瞓覺為主。」
 
「但你係咪都會係床上用手機、改薄？」
 
「個人未眼瞓既時候當係會。」
 
「呢啲都禁止，你返去書桌做。同埋你超過15-20分鐘瞓唔著，就要離開床。」
 
「離開張床，我仲點瞓覺？」
 
「你要令到身體有睡意，先好上床瞓覺，或者你可以試下點著香薰蠟燭，可以幫助到睡眠。」
 
「香薰蠟燭⋯⋯咁褪黑激素軟糖有冇用？」我腦海浮現正希既字跡。
 
「冇話唔得，好過你依賴安眠藥，但褪黑激素軟糖係輔助，幫你調節生理時鐘，最重要當然係克服源頭，嘗試接觸下鋼琴。」Dr Lee 停頓數秒，繼續講：「你依家先試下我比你嗰兩個方法，兩個星期後返嚟覆診。」




 
「好，唔該Dr Lee。」
 
「唔洗咁客氣，係你呢啲熟客先可以咁急預約，其他客我真係叫佢揀第二日。」Dr Lee 除下醫生袍講。
 
「返屋企陪老婆？」
 
「係呀！佢煮左飯等我，你都快啲返屋企抖下，做左成日野仲要過嚟我呢到，你都辛苦晒！」Dr Lee拍拍我膞頭講。
 
「你呢排有冇見過阿媽？」我臨走前問。
 
「如果想關心Helen，你可以去揾佢，呢個係作為Helen朋友既說話。」
 
「我純粹問下。」講完呢句，我就離開診所。
 




返到屋企，我係房間點著香薰蠟燭，整個房間都係香薰味道。
 
當我想打開安眠藥既樽蓋，公事包入面既褪黑激素軟糖包裝吸引我既注意。

我轉向扭開軟糖樽蓋，望左手上既糖幾眼，便放進口中，感覺微甜，冇我想像中既死甜。
 
我將旁邊既安眠藥蓋上樽蓋，並躺在床上。