搭錯線：錯誤的時間遇上你: 第一百一十一章：查利揚視角（5）——和解

呢幾日都瞓到幾個鐘，感覺個人都精神啲。
 
我返到學校，座位上又有早餐。
 
炒蛋多士、蔥油雞扒撈丁、蕃茄牛肉通粉、沙嗲牛肉麵、火腿通粉、五香肉丁麵、餐蛋麵……呢個境況維持左一個星期。
 
我同正希一直都冇講野，就好似變返普通同事。
 
繁忙既一日又過去，我前往會議室。
 




「查sir都到齊，我地可以開會。Miss Tai，你可以先講VA學會嚟緊既活動。」張sir清喉嚨講。
 
我坐係正希旁邊，中間卻有一道無形既牆。
 
我打開文件，今日係討論各個學會係開放日舉辦既活動。
 
公事方面，我先前開左個共享文件，冷戰期間我地都各自完成大家負責既部分。
 
趁住Miss Tai present緊，我急速略睇文件內容。
 




「跟住係辯論學會。」張sir 聲音拉回我到會議中。
 
「我地辯論學會嚟緊會舉辦『你問我答』，會比參與者抽籤做正或反方，然後同幹事辯論一分鐘，能夠維持一分鐘既參與者，可以獲得小禮物。」我講。
 
「呢個活動受眾以小學生為主，你確定佢地可以同中學生辯論一分鐘？」張sirm質疑。
 
「我地幹事會調低難度，務求小學生都可以享受辯論既樂趣。」我回應。
 
「小學生同中學生程度相差有啲遠，就算幹事已經遷就左佢地，如果小學生維持唔到一分鐘，你地會點處理呢個情況？」
 




當我想回應時，旁邊既正希卻早我一秒開口：「為左應對呢個情況，我地設置兩個獎項，安慰獎係比唔過一分鐘既參與者，過左一分鐘既參與者當然可以有較豐富既禮品。」
 
呢一部分係我負責既部分，睇嚟正希已經熟讀會議內容。
 
「咁你地經費咪比其他攤位多？」張sir轉向問正希。
 
「唔會，安慰獎我地會預多啲，大約佔3分之2，成功獎就佔3分之1，如果成功獎派晒，安慰獎會派2份。」正希繼續回答。
 
「好，咁音樂學會，你地會準備咩活動？」張sir轉向問其他人。
 
我輕輕瞄過正希，然後係文件上打字。
 
「頭先我自己一個都可以搞掂。」
 
正希望到我既舉動後，接著佢係文件上回應我：「我都有責任去回應張sir既問題，你唔洗死頂。」




 
「死頂？」
 
「你慣左咩事都自己攬上身。」
 
「你事先有睇定我個part？」
 
「成份文件我都睇足晒，張sir一向問到好仔細。」
 
「頭先唔該你。」
 
「你同我仲要咁客套咩？」
 
正希打完呢句，我望向正希，恰好佢亦望向我，微微一笑。
 




心中既牆彷彿打碎左一部分。
 
正希繼續敲打鍵盤。
 
「上次件事，呢個星期我真係徹底反省過自己。
如果站係你立場，你的確係有資格嬲我咁耐，因為我完全冇問過你意見，未有徵得你既同意，私下搵你阿媽。
另外我同Jay冇再聯絡，連ig都 unfollow左佢，我見佢既次數真係得2次，一次係酒吧門外同的士，另一次就係我地3個人見面。自從你嬲左我，我覺得自己都有唔啱，你係太在乎我，先在意我隱瞞你。
以後我都會問過你意見，有咩事就同你講聲，你唔好再嬲我……呢段時間冇左你，我先發現你係我心中，真係佔左好重要地位。」
 
我實時睇完正希打左呢段字出嚟，在文件上回應正希：「我都有唔啱，將自己控制唔到既不安發泄係你身上，我唔應該發你咁大脾氣，sorry。」
 
「咁以後有咩事，大家都要開心見誠同對方講。」
 
「遵命，我既女朋友！」打完呢句，我係枱下牽起正希既手。
 




正希只係低頭一笑，並冇望向我。
 
「其他老師仲有冇補充？」張sir橫視會上所有老師。
 
正希馬上收起笑容，保持嚴肅既樣子，並試圖鬆開我既手。
 
然而我緊捉佢既手，令佢冇半點爭扎既機會。
 
「冇既話我地就散會。」張sir收拾桌上東西，各個老師亦在收拾東西。
 
「執野啦！」正希咧著牙齒，壓低聲音講。
 
我依依不捨放開佢既手，然後一同收拾東西。
 
我地向各自返到座位上，然後我wts正希。




 
「陣間一齊食飯？」
 
「去尖沙咀？最近有間新推出既韓國餐廳想試！仲有食完想睇戲！」
 
「冇問題！我去拎車先，你陣間過嚟！」我打完望向正希，佢用手機擋左半邊臉，只見到笑眼。
 
正希就好似一隻怕羞既兔仔，好想呵護住佢。
 
如果每日都可以見到正希，日子一定會好幸福。

*******呢份問卷係關於故事內容，需時約一分鐘，有時間可以做下，統計後既數據會放係後記，多謝大家～

https://forms.gle/KZRaC2iNjdfXiQWZ8