搭錯線：錯誤的時間遇上你: 第一百一十二章：約會

我拿拿臨執好袋，就去校門附近會合阿揚。
 
「你會唔會等左我好耐！」我上車講。
 
「唔耐！」阿揚吻上我既嘴瓣講。
 
「喂呀！呢度學校嚟㗎！」我急忙望四周講。
 
「放心啦！啲學生都走晒，呢個時間淨低既老師都唔多，冇事既！」阿揚輕鬆咁講。
 




「快啲揸車啦！」我緊張地說。
 
「得，乘客扣穩安全帶，我地就出發！」
 
過程中我地有說有笑，將呢一個星期冇講既事，都同對方講晒。
 
去到餐廳，我問阿揚：「你食唔食得辣？」
 
阿揚點點頭，於是我提議：「咁不如嗌辣炒年糕、芝士泡菜炒飯、海帶湯？你想食咩？」
 




「你話事！你想食咩就嗌，食唔晒我包底！」阿揚充滿自信講。
 
「真係既？咁我想叫埋辣豬肉紫菜包飯、魚糕串！」我雀躍地說。
 
我地叫到成張枱都係野食，當阿揚想夾野食既時候，我用筷子敲一敲佢既筷子。
 
「相機食先！況且我地都冇點一齊影過相！」
 
「我地點會冇影過相？中學Christmas Party影過。」阿揚用理所當然既語氣講。
 




「中學Christmas Party已經係8年前既事，由依家開始，我要儲多啲同你既回憶。」講完呢句，我舉高手機。
 
「1，2，3！」倒數過後，鏡頭中既阿揚急忙舉起V字手勢，好可愛！
 
「每次食飯都要影完先可以食野？」阿揚拎住筷子，唔敢郁眼前美食。
 
「睇下個一日值唔值得紀念？今日係我地和好既一日，點都要記錄低！」
 
「咁我既女朋友，請問依家食得野未呢？」
 
「食得！」
 
除左額上冒左少量汗珠，我同阿揚基本上都面不改色咁食晒枱上既野。
 
「食得我好飽！跟住睇咩戲？」離開餐廳後，我牽著阿揚既手問。




 
「尋泰記？最近好出名，全城都講緊。」
 
「講咩？我淨係知好多人講，真係唔知電影內容。」
 
所謂前世殺人，今世教語文，每日放工瘋狂改文，實在冇時間留意潮流。
 
「講主角去泰國旅行，參觀遺址時候因一場意外，意外穿越返去古代泰國。」
 
「穿越時空⋯⋯阿揚，如果可以揀，你想穿越去過去定未來？」
 
「過去。」阿揚毫不猶豫地說。
 
「我會揀未來。」我眨眨眼講。
 




「點解？人總會有後悔既事。」
 
「冇過去既事，又點會有現在？我覺得應該要活在當下，就好似我同你一樣，如果冇過去既事，我地依家又點會一齊？」
 
「就算你講得啱，我想堅持過去。」
 
「你要知道呢個世界冇時光機，我地只能接受同適當既改變。阿揚，你食唔食爆谷？」行到戲院時，我問。
 
「好。」我地一齊排隊買爆谷，然後入場睇戲。
 
「你覺得套戲點樣？」完場後阿揚問。
 
「都幾搞笑，我估唔到主角咁追求科技既人，竟然唔返現代啫！」
 
「返現代就要同鍾意既人分開，對主角嚟講係bad ending。如果你係主角，你會唔會返現代？」阿揚講。




 
「唔會！」我搖搖頭講。
 
「我都唔會。」阿揚搣一摵我塊臉講。
 
「叮叮叮⋯⋯」商場遠處有人正在彈琴。
 
我同阿揚同時望向後方一眼。
 
「正希，我送你返屋企，聽日仲要返工。」阿揚拉住我急步前行。
 
「阿揚，你冇事呀嘛？」我望住阿揚背影問。
 
「冇事。」
 




「嚟緊星期六音樂比賽帶隊，你真係冇問題？」
 
「有你係到，可以有咩事？」阿揚轉身微笑講。
 
我停下腳步，從後抱住阿揚。
 
「到時你緊張，我就會努力令你唔緊張。」我講。
 
阿揚拍一拍我既手，然後轉身摸摸我頭頂講：「正希，你真係大個女。」
 
「8年前你保護我，8年後到我保護返你。」我用堅決既眼神望住佢講。
 
阿揚緊緊抱著我，講：「多謝你，一直都陪住我。」


*******

如果大家依家方便可以填下問卷，關於故事內容，數據用係後記，公開角色人氣排名，可以提問故事發展同對我既疑問～

​https://forms.gle/KZRaC2iNjdfXiQWZ8