搭錯線：錯誤的時間遇上你: 第一百一十三章：副歌

諗起個日睇完戲，商場突然傳嚟琴聲，阿揚緊握我既手，佢既手心不斷冒汗。
 
今日音樂比賽帶隊，我同阿揚約好提早一個鐘返到學校做準備。
 
當我行去教員室諗住同阿揚會合，走廊盡頭卻見到阿揚。
 
佢企係音樂室門前，伸手向門柄，手停留左門柄數秒，先扭開入去。
 
我急步前往音樂室，從窗外見到阿揚坐左係鋼琴前，嘗試觸碰琴鍵既一剎那，卻縮掉了手，然後雙手緊抱著頭。
 




我靜悄悄打開音樂室既門，慢慢走到佢旁邊，然後坐下。
 
「阿揚。」我小聲喚道。
 
「正希？點解你會知我係到？」阿揚立即抬頭問。
 
「明明我地約左8點，我真係準時返嚟，就見到有人係音樂室門口。」
 
「即係頭先你乜都見到晒？」阿揚垂下頭講。
 




「我細個都有學琴。」話畢，我打開琴蓋，並按下第一個琴鍵。
 
「叮——」琴聲縈迴在音樂室中。
 
我再按下不同琴鍵，然而太耐冇彈，樂曲都走調。
 
「你係咪想彈One Summer's？」阿揚淡淡笑住問我。
 
「係呀，你仲記得點彈？」
 




阿揚雙手放在鋼琴上，深呼吸後，用力按下琴鍵。
 
「叮叮叮——叮叮——叮叮叮⋯⋯」琴聲帶有緩慢而悲傷既感覺。
 
眼前阿揚專注彈琴，呢一面既佢係我從來都未見過。
 
「叮⋯⋯叮叮叮叮叮叮！」旋律忽然斷裂，幾個凌亂既音符重重落下。
 
「明明以前成日同詩韻一齊彈One Summer's，但每次副歌前，我就會彈錯，於是詩韻就會話冇所謂啦，佢接落去彈個一段，冇諗過佢唔係到，我都係彈錯！」阿揚激動咁講。
 
「既然係咁，不如我地由副歌彈起？副歌係成首歌彈得最多既部分，我都記得點彈。」
 
「我地？」
 
「以前詩韻同你彈，今日我同你一齊彈，唔記得都唔緊要，我地又唔洗比賽，當玩下？」




 
「玩？」阿揚感覺難以置信。
 
「玩！出錯都要繼續彈，彈到最後為止！」我拉左阿揚既左手放落琴鍵上。
 
「準備好未？」我掛住微笑問。
 
阿揚輕笑後點頭。
 
「1、2、3！」
 
「叮叮叮⋯⋯叮！」
 
「呢度我又彈錯！」阿揚沮喪咁講，並放下手。
 




「你頭先應承左我，陪我玩到最後，要無視錯誤。」我拉住阿揚既手，再次放上琴鍵。
 
阿揚深呼吸後，我地再次彈琴。
 
琴聲行雲流水，宛轉悠揚。
 
即使中途幾個音亂左，我們都冇停落嚟。
 
旋律斷了一瞬，又重新接上。
 
隨住最後一個琴聲消失，我轉頭望向阿揚。
 
阿揚鬆了一口氣，手仍然放在琴鍵上，卻再冇頭先既猶豫。
 
「自從詩韻一事，我真係冇再彈過琴。」阿揚牽起嘴角講。




 
「無論你發生咩事，我都會係你身邊陪你面對。」我挨落阿揚既肩膞講。
 
「有時候覺得自己明明係大你8年，比你多社會經驗，應該要照顧你，反而依家好多時候，變左你照顧我。」
 
「換著我有心魔，你係咪都會陪我克服？」
 
「當然會！」
 
「我地一齊就係互相照顧對方，冇話邊個年紀大啲就有多啲責任，就會付出多啲！」我離開阿揚肩膞，望向佢講：「你依家有我呀嘛。」
 
鋼琴旁邊窗簾恰好吹起，令晨曦滲入音樂室裏。
 
「依家時間唔早！我地仲未準備好帶隊啲野！」我緊張手講。
 




「我地兩個一齊搞好快就搞掂！」阿揚拉住我既手，離開音樂室。
 
我地就係學校牽著手奔跑，感覺終於可以唔洗理會旁人目光。

*******

如果大家依家方便可以填下問卷，關於故事內容，數據用係後記，公開角色人氣排名，可以提問故事發展同對我既疑問～

​https://forms.gle/KZRaC2iNjdfXiQWZ8