搭錯線：我鍾意中史阿Sir，於是成為老師: 第一百十四章：回到舊宅

我同阿揚一同帶班學生去音樂比賽。
 
學生逐一表演，當中樂器包括大提琴、琵琶、長笛等等。
 
當以上樂器演奏完畢，就到重中之重既鋼琴。
 
鋼琴聲響起，我瞄向阿揚，佢只係一臉平靜咁專心欣賞表演。
 
我將手伸向旁邊座椅，阿揚輕輕握住我既手，並靠近我耳邊講：「佢彈得幾好，好有層次。」
 




「我都覺。」
 
「但我覺得你彈得好聽啲。」
 
我轉頭望向阿揚，認真說道：「我彈到錯漏百出喎。」
 
「你講既，錯唔緊要，重要係過程。」阿揚開朗咁應。
 
「咁下次再雙手聯彈。」我拎起阿揚另一隻手講。
 




「放工之後，我想你陪我去見一個人。」
 
「我都識？」
 
「主要係我阿媽，加埋我阿爸。」阿揚微笑說道。
 
完場後，我同阿揚食完Lunch，就去左九龍塘。
 
眼前低密度既住宅，白色外牆，高度約10層樓。
 




搭升降機既時候，我忍唔住問阿揚：「點解咁突然帶我嚟見你阿媽？仲有你阿爸呢？」
 
「主要今日彈完琴，諗通左啲野。」
 
「我今日著得唔算得體，仲要空手上去，真係唔洗買？」我急忙係手袋中，翻找唇膏，然後補色。
 
「真係唔洗買，我阿爸份人冇咩所謂，反正我阿媽都見過你，我好清楚佢，如果佢唔鍾意嗰個人，唔會同你飲酒，更加唔會請你飲酒，最重要係有你係到，我可以將一啲平時唔夠膽同佢講既說話，放心講出口。」
 
「呢啲係你地家事，我外人介入唔係幾好。」
 
「你係我女朋友，又點會係外人？」
 
「咁我陣間應該做咩？」
 
「坐係我隔離就得。」




 
升降機門打開，阿揚牽著我既手，前往啡色大門後按下門鈴。
 
開門既人係有少許白髮既男人，鼻樑上架住金絲眼鏡，手上拎住I Pad，顯示緊新聞。
 
呢位應該係阿揚既爸爸，佢既五官睇落同阿揚都有幾分相似，年老後更增添幾分成熟既氣息。
 
「阿揚？呢位係？」佢盯住我講。
 
「Hailey係我女朋友。」阿揚接住講：「Hailey，呢位係我阿爸。」
 
「Uncle你好。」我微笑住講。
 
「Hailey唔洗咁拘緊，入嚟坐下先。」Uncle帶我入屋之後，並同阿揚講：「你一年都好少返屋企，今次仲帶埋女朋友上嚟。」
 




「因為我想揾阿媽。」話畢，Helen剛好從廚房出嚟。
 
「老婆，佢叫Hailey，係阿揚女朋友。」Uncle行去Helen旁邊講。
 
「我知，之前我地有見過。」Helen行近，出奇地搭著我既肩膞講。
 
「原來你地識㗎？」Uncle 驚訝咁講。
 
「睇嚟你既問題已經解決。」Helen微笑咁講。
 
「係呀，你最近點樣？」我問。
 
「都係咁樣，得閒去Bar 彈下琴。Hailey，你飲咩？Whiskey啱唔啱？」
 
「媽，依家仲係朝早。」阿揚板著臉講。




 
「飲幾啖又唔會醉。」Helen無視阿揚既說話，入去拎支Whiskey出嚟。
 
「阿揚。」Uncle 拉阿揚到沙發坐低。
 
我同阿揚坐埋一齊，而阿揚父母坐係我地對面。
 
Helen 從廚房中拎左4隻酒杯，然後倒入一半酒。
 
「呢支係Glenmorangie 12，入口甜甜地。」Helen 遞上酒杯比我。
 
「唔該Helen。」我飲左一啖，感覺比起上次酒吧易入口好多。
 
當我地三個都飲左數口時，阿揚酒杯裏既酒冇郁過。
 




「阿揚你唔飲酒？」我問。
 
「因為我覺得要保持清醒，先可以有勇氣講出呢一番說話。」阿揚嚴肅咁講。
 
「到底係咩事？連酒都唔飲咁晒？」Helen 倒緊第二杯問。
 
阿揚深呼吸後講：「我今日終於可以重新彈琴。」
 
Helen 怔一怔，停下倒酒既動作，呆愣望向阿揚。

*******

如果大家依家方便可以填下問卷，關於故事內容，數據用係後記，公開角色人氣排名，可以提問故事發展同對我既疑問～

​https://forms.gle/KZRaC2iNjdfXiQWZ8