搭錯線：我鍾意中史阿Sir，於是成為老師: 第一百十五章：釋懷

「阿揚你重新彈琴？」Uncle 驚訝地問。
 
「都係今日發生既事。」阿揚握住我既手講。
 
我感覺佢既手心正在冒汗，於是用另一隻手放係佢手背上。
 
阿揚望向我，我點點頭，支持佢繼續講落去。
 
即使我唔知阿揚跟住落嚟講咩，但相信係佢咁多年嚟埋藏係心底既說話。
 




Helen 只係繼續飲酒，並沒有回應。
 
「媽，我知道當年詩韻件事，你一直怪緊我。其實發生呢件事，成家人嚟講，你一定係最難受既人。」
 
「查利揚，如果你係要講呢件事，我只可以話你係兇手。」
 
「我一直都承認呢個事實，但成件事上面，我地每個人都有責任。」
 
「你咩意思？我所有野都係為左你地兩個人好！」Helen 激動到企起身講。
 




「老婆，你冷靜少少，Hailey仲係到。」Uncle 望向我，似乎想終止呢個話題。
 
「佢帶得Hailey上嚟，預左比Hailey聽到我地講咩，我諗Hailey都知我地既家事。」Helen 用尖銳既目光望向我講。
 
「Helen，阿揚只係想同你靜心傾下，不如你坐低先？」我微笑咁講。
 
Helen 坐低，繼續倒酒。
 
「我記得細個日日係咁練琴，彈到一首又一首既樂曲，16歲個陣，我既鋼琴生涯同詩韻一樣停滯，唔同既係我係主動，而佢係被動。咁多年嚟，我只要聽到琴聲，我就會諗起詩韻同我相處既點點滴滴，心入面既抽痛就好難受。
直到今日，Hailey 鼓勵我重新彈琴，佢同我講錯都好，都要繼續彈落去，起初我當然接受唔到錯誤，Hailey教識我，做人梗係會有錯，於是我再次彈琴，有錯都繼續彈落去，過程中我諗起以前同詩韻彈琴，佢係好享受鋼琴既聲音，我諗⋯⋯詩韻唔會想見到我地咁樣⋯⋯佢會想我地幸福咁生活落去⋯⋯」阿揚講講下，咽哽起嚟。




 
我係旁邊遞上紙巾，讓阿揚抹抹淚角既淚珠。
 
「阿揚，咁多年嚟呢個包袱，真係辛苦你！」Uncle 講。
 
「我之前唔彈琴，係一直逃避詩韻死亡既事實⋯⋯媽，你都唔好再飲咁多酒，做咁多傷害自己既行為，我每次見到都覺得好心痛，詩韻係天堂見到，佢都會同我一樣。」阿揚拭乾眼淚講。
 
「仔！」Helen 衝去阿揚旁邊，緊緊抱住佢講：「其實我一直都知，個日根本係一場意外，你係無心！只係我一直都好執著，好想詩韻做鋼琴家！我知佢衝紅燈，其實係因為我！只係你走開左，我就可以順理成章，將所有責任都推落你到，咁樣我就會舒服啲，其實唔係！
就算我每日飲酒，甚至做傻事，我覺得心入面總係有個缺口，除左詩韻，根本冇人可以修補個缺口。
阿揚，你講得啱，人總係有錯，人生都要繼續行落去，最重要係⋯⋯詩韻唔會想見到阿媽咁既樣⋯⋯佢眼中既阿媽，永遠都係好叻既大人！」
 
Uncle 都行入去佢地母子旁邊，輕輕拍住二人既肩膞。
 
「Hailey，多謝你，令佢地兩母子都放低呢個心結，呢樣野我咁多年嚟都做唔到。」Uncle 用由衷既眼神望住我講。
 




「我唔想見到阿揚被過去困住，或者同詩韻諗既一起，想見到阿揚真真正正咁笑。」
 
「你都過嚟啦！你都係我地家入面既一分子。」Uncle 邀請我過去。
 
我點點頭，同Uncle一齊拍拍佢地肩膞。
 
良久，Helen 鬆開擁抱，用堅決眼神望住我地講：「今日開始，我決定唔再飲酒。」
 
「媽，我定時定候打電話比你，睇下你有冇飲酒！」阿揚笑住講。
 
「阿揚你都係咁長氣！」Helen 笑到見牙唔見眼。
 
「阿揚，你唔好講Helen，有時我叫你唔好空肚飲齋啡，對個胃唔好，你都照做！」我心急咁講。
 
「睇嚟有人管到阿揚啦！」Uncle講。




 
我地全部人都笑不攏嘴，整間屋洋溢著愉快既空氣。

*******

如果大家依家方便可以填下問卷，關於故事內容，數據用係後記，公開角色人氣排名，可以提問故事發展同對我既疑問～

​https://forms.gle/KZRaC2iNjdfXiQWZ8