八年的距離: 1

正當啲中學生放緊暑假，喺度玩緊嗰陣…
我要去學校返工啊！！！

今日係我第一日正式返工，要返去開教職員會議。由於琴晚太緊張，成晚冇瞓過，所以我就索性早啲落床去沖涼。
搞掂好晒之後，手機彈左條massage出嚟

－出門口未？不如一齊返去

原來係李俊誠。睇嚟條友同我一樣都好緊張。





我哋約咗喺屋企樓下個巴士站到等，沿途傾咗好多戇鳩嘢，令我個心平復咗好多。

落車之後，我哋入咗學校會議室，入面已經有唔少老師坐咗喺度等。有啲睇落好後生，應該淨係大我一兩年。有啲就教過我。

突然，有個肥佬行咗埋嚟。
「俊誠s！！好耐冇見！好掛住你哋呀！話俾你聽吖，而家班細路呢…」
佢喺我哋以前嘅英文老師，黎Sir，勁鍾意講八卦，不過教書好好，一直深受學生歡迎。

我應咗佢幾句之後就搵位坐低，坐咗喺Miss Chiu隔離，而李俊誠就俾黎Sir捉住咗，坐咗喺佢隔離。





但係，我一直想見嘅人仲未到…

「戴老師呢？」我細細聲問Miss Chiu。

「佢應該就到。你係咪好緊張？」佢笑住問我。

呢個時候，會議室嘅門俾人推開咗，一個女老師行咗入嚟。
佢五官生得好標緻，成個人散發住一種溫柔嘅氣質，面帶微笑。佢對眼好大好圓，靚到好似識發光咁，戴住一副圓框眼鏡為佢成個人增添咗一絲文青嘅感覺。

真係好靚女…





佢就係教咗我4年中文嘅老師，戴希妍。亦都係我第一個鍾意，令我一見鍾情，咁多年嚟一直掛住嘅人。

我同佢對望咗一眼，佢對住我笑咗一笑，然後就坐咗喺我左手邊個空位。

同佢對望嗰一刻，我個心好似停咗一拍，然後又瞬間加速。嗰種感覺好熟悉，就同8年前第一次見到佢嗰刻一樣。

終於夠鐘開會，校長行咗入嚟，開始今日嘅流程。
開始嗰陣就要新老師自我介紹，今年得我同李俊誠兩個係，所以好快就可以去下一part。我負責教中文同中史，而佢就負責教History。

之後就聽咗校長同副校講一大堆學校政策，但我根本冇心機聽，發發下呆就諗返起8年前嘅嘢…