八年的距離: 2

8年前嘅9月1日，我啱啱升上F.3。上咗一朝早堂嘅我一早已經放空緊，等待食lunch嘅鐘聲。

「叮噹一一叮噹一一」第5堂完結嘅鐘聲響起。

「Yes! 再捱多一堂就放飯，一陣食乜？」我擰轉頭同坐我後面嘅李俊誠傾偈。

「是但啦，一陣先諗。下一堂係咩？」你老味又hea鳩我…

「各位同學起立。」一把溫柔嘅聲令原本嘈到顛嘅班房靜晒，而我都即刻擰返轉個頭。





望到老師嗰一刻，成個世界嘅時間好似暫停咗咁…
乜呢個世界上，真係有啲咁靚嘅人㗎咩？
我喺心入面問咗呢條問題好多次。

「我係戴希妍，今年會教你哋中文。各位同學早晨。」

全班立刻企起身敬禮。「戴老師早晨。」

跟住，佢就開始教書。
本身攰到就死咁款，又勁肚餓，諗住瞓一堂就可以食飯。但係…我嘅視線完全離開唔到佢，由望到佢嗰一刻，我就不自覺咁留意住佢嘅一舉一動…





佢嘅一舉一動，所有嘢都深深吸引住我。由佢喺黑板寫嘢，到打開本書，再到介紹課文嘅作者。所有行為舉止都十分優美、溫柔，散發住陣陣書卷氣息。

KP你痴撚咗線？眼甘甘咁𥄫住人哋，你變態㗎？俾佢知道咗嘅話，一定開學第一日就black list你。

突然俾腦入面殘存嘅意識鬧，我既刻望返住自己本中文書。聽住戴老師嗰把勁溫柔嘅聲，唔知點解就有返精神，肚餓嘅感覺都消失咗。聽下聽下，lunchtime嘅鐘聲就響起。佢預好晒時間，一打鐘就放我哋走，大半班即刻衝出班房，而我就坐咗喺張凳度發呆。

「喂…阿俊…阿俊！王！俊！誠！」

「係！我喺度，做咩？」突然傳嚟嘅聲嚇到我成個彈起咗。





「屌！頭先嗌咗你勁多次都冇反應，又話肚餓？行啦！李俊誠落咗去餐廳搵位喇。」

「哦…好，行啦。」

佢係阿文，我另一個好兄弟。由於佢身高有成190，而F.3嘅我170都未到，所以嗰陣成日俾人話我哋似阿哥同細佬。

行緊去餐廳嗰陣，我一直喺度諗緊嘢，個腦亂到爆。

點解我頭先會眼甘甘咁𥄫住人哋？
痴撚線佢好靚女。
點解我頭先可以咁專心上堂嘅？
佢真係好撚靚女。
點解我而家諗嘢咁亂，個心跳得咁快嘅？





唔經唔覺就行到餐廳，見到李俊誠之後就開始嗌嘢食。

「你哋覺唔覺戴希妍好靚女？」李俊誠突然講嘢。

「覺啊，佢一入嚟嗰下全班靜晒。」「KP你覺得呢？」

「吓？普通啦…errrrr 係幾靚嘅…」唔知點解，我唔太想俾人知我覺得佢靚。

「乜淨係普通咋…」阿文停咗一下「咦？你塊面做乜紅晒。」

「痴線，邊有…一定係你睇錯…」唔知點解，我好心虛。

「王俊誠…你唔係鍾意佢呀嘛？」平時最了解我嘅李俊誠咁講，搞到我成個人勁驚。鍾意佢？邊有可能。

「咪玩啦，我王俊誠咁大個仔都冇試過鍾意人，有咩可能鍾意佢呀…」





「你係咪頭先大部分時間都諗緊佢？」啱啱上完堂，正常都會諗起啦…頭先嗰啲唔計，所以，冇。

「你係咪一諗起佢就開始心跳加速？」頭先行緊路，心跳加速一定唔關佢事，所以，應該，冇。

「你係咪上堂嗰陣特別專心，目光一直喺佢度？」點算，好似反駁唔到，不過，應該，好似，冇…

「冇呀…都話唔會鍾意佢…你哋做咩咁興奮啫。」

「我哋全級公認嘅高冷男神KP bb鍾意人喎，梗係興奮啦～」

頂…呢兩條友根本冇理過我講咩。

「放心啦，呢件事我哋唔會講出去嘅～」





「唉…食嘢啦…」我都唔知講咩好…

就係咁樣，我成個中學生涯入面過得最開心嘅一年咁就開始咗。