八年的距離: 3

「以上就係嚟緊學年嘅學校政策，有冇同事有嘢想問或者有提議？」

副校嘅聲音令我由8年前返返嚟現實。我下意識咁望咗一眼坐喺隔離嘅戴老師，佢同以前一樣都係咁靚，甚至因為時間流逝而變得更成熟，令人心動。

正當我仲望緊嗰陣，佢突然望過嚟我嗰邊，就係咁，我哋對視咗。我驚慌失措咁擰去一邊，塊面變到好㷫。喺我擰轉頭嗰吓，眼尾稍到佢都即刻望第二度。果然，我哋兩個之間，真係好尷尬。

「如果冇嘢想講嘅話，咁我哋落下一part喇。」

接住落嚟就係講下年嘅分班同各班班主任嘅編排。啲級主任開始檢查分班有冇出錯，順便再調多少少咁，直到佢哋滿意為止。而我哋呢班未有嘢做嘅老師就開始細細聲傾偈，黎Sir繼續捉住李俊誠講嘢，戴老師都開始同佢隔離嘅Miss Wong講嘢，Miss Chiu都係咁撩我傾偈。





傾咗大概15分鐘左右，佢哋終於搞掂晒個分班，係時候睇各班班主任嘅編排。校長拎咗一疊編排表出嚟傳俾每個老師，收到之後，個個都急不及待搵自己個名，連我都唔例外。

王俊誠…王俊誠…啊，搵到喇，係3A班嘅副班。睇吓係邊個同我一齊教3A先…

戴…希…妍…「吓？」我同佢異囗同聲咁忍唔住細細聲吓咗出嚟，再望住對方。為免係我睇錯或者出現幻覺，即刻確認多幾次。痴線，真係佢…

「Hi…睇嚟我哋嚟緊要一齊做嘢喇，王老師…」

「嗯…請多多指教，戴老師…」





俾以前教過我兼鍾意嘅人叫「王老師」嘅感覺真係好奇怪…雖然好擔心之後會發生啲咩好尷尬好奇怪嘅事，但可以同佢教同一班，始終都係幾開心嘅。

話咁快就開完會，終於可以放工。黎Sir邀請我同李俊誠一齊去學校附近食lunch，Miss Chiu同黎Sir都算熟，所以就跟埋我哋一齊食。沿途一直傾緊頭先開會啲嘢。

「係喎，你哋教邊班？我同Miss Chiu都係1C」李俊誠問。

「我同Miss Wong一齊教4D，頭先見到，KP好似同戴老師一班？」果然八卦嘅黎Sir冇可能留意唔到我哋兩個個名。

「係呀… 3A班…」





「哇…阿俊又幸福了。」李俊誠我勸你唔好亂講嘢。

「哦！唔怪之得你頭先面紅啦～原來係因為戴老師…」

「吓？咁你都見到？有咁明顯咩？」

「你塊面紅成咁，我又坐喺你隔離，邊有可能睇唔到。」跟住佢哋3個就咁笑我怕醜。

咪住先，今舖大鑊！如果我塊面真係有咁紅，連Miss Chiu都睇到，咁咪即係戴希妍都會睇到？屌…好撚瘀呀… KP點解你咁易面紅㗎！！！