每消滅一隻怪獸，我條女對波就大一個cup！: 11

「同你地介紹，呢一粒就係由我地『森立製藥』研發，獨一無二嘅豐胸丸！原本價值三萬蚊一粒，不過依家無辦法，只能當係獎勵送俾你地。」

「下？呢粒嘢值三萬蚊？真定假呀？」我半信半疑。

「我呃你做咩啫，呢隻藥本來計劃下個月推出市面，每粒定價三萬，原本我地藥廠準備靠呢隻藥大賺一筆，點知人算不如天算，唉…」晴天博士講講下，耷低頭歎咗口氣。

「發生咩事？」我問。

「唉…要講都唔從邊度講起好…唉…」





「咁你最起碼都解釋一下，點解無啦啦會有怪獸出現？」

「其實隻怪獸喺我地藥廠用嚟做試驗同研究嘅實驗品，你知我地呢啲做研究嘅，梗係先搵啲動物呀昆蟲呀嚟測試，無論測試結果係點，通常我地會等到成個project完成曬，收集所有完整嘅數據之後，先會處理呢班用作試驗嘅生物...」

「殊不知有隻怪獸唔知點解走甩咗，然後就周圍破壞，情況一發不可收拾，係咪咁？」我搶先反問對方。

「係呀！就係咁呀！好死唔死，就喺我地研究成功，準備將嗰班實驗品消滅嘅時候，其中一條用嚟鎖住佢地嘅鎖鏈鬆開咗，結果俾一隻大猩猩走甩，嗰隻嘢唔單止大肆破壞，兼且仲釋放埋其他嘅怪物，最後就搞到今時今日咁嘅田地。」

一個自稱博士嘅人，加上突如其來出現嘅怪獸，呢兩樣嘢加埋果然都係離唔開「化學實驗」、「實驗品失控」呢啲關鍵字。





但係有一個問題，頭先嗰隻螳螂並唔係從實驗室走出嚟，佢係從天上面跌落嚟，當時個天仲穿咗個窿。

對於呢個疑問，晴天博士嘅回答係：隻怪獸係穿過次元通道，從異世界返嚟地球。

大約喺三年前，佢地藥廠喺一次研發新藥嘅時候，因為儀器出錯發生故障，結果意外打通咗一條通往異世界嘅通道。

對佢地嚟講，呢個係一個意想不到嘅收穫。

皆因喺異世界入面，有大量豐富嘅天然礦物，當中有好多都係地球上從未見過。





當時晴天博士聯同成班科學家，決定喺異世界設立基地，抽取各種礦物做分析研究，然後再利用呢啲礦物元素研發新嘅藥物。

只不過，由於嗰個異世界只有礦物資源，無任何生物，因此佢地先研究咗唔同嘅方法，令連接地球同異世界嘅次元通道變得更寬闊、更穩定，跟住再將嗰啲用嚟做實驗嘅生物，從地球運過去異世界嘅基地作研究。

當嗰班失控嘅實驗品喺異世界四處破壞嘅時候，不但實驗基地被嚴重損毀，亦令到連接地球同異世界嘅次元通道受到牽連，原有嘅連接數據同設定全部被打亂曬。

啱先出現喺天上面嗰個窿，實際上係次元通道，正常唔應該出現喺機場嘅上空，但就因為班怪物喺異世界造成嘅破壞，導致到運作失常。

當見到次元通道一打開，嗰班原本被送去做實驗嘅昆蟲同動物，就會出於本能反應，趁機從異世界穿梭返嚟地球。