每消滅一隻怪獸，我條女對波就大一個cup！: 17

負責清理嘅工作人員，用起重機吊起隻烏龜條屍，另外亦有一班清潔人員，清理緊地下嘅血跡。

而晴天博士呢條友為咗逃避賠償責任，照舊乜都唔理，拿拿聲走人 。

「朱大志！」

突然間，有人喺後面嗌我。聽到呢把熟悉嘅聲音，就知係Yanny。

「你唔係返緊工咩？點解嚟咗嘅？」我問對方。





「我收到你個message咪即刻趕過嚟！隻怪獸打完啦？今次你有無整親邊度？」Yanny照舊都係好緊張我有無受傷。

「無呀，我嚟到嗰陣，隻怪獸已經瓜咗，我連變身都無變。」

「咁都好啲，最起碼你無受傷呀嘛。」Yanny鬆咗一口氣。

之後大家散場，梁sir揸車車我地兩個返屋企。

喺呢次錯失咗嘅戰鬥中，我意識到一樣嘢，就係到達現場打怪獸嘅timing都好重要。





理論上，越早去到就應該越有利，最好就趁其他人未嚟到之前，獨自一個人打敗怪獸。

啱先大塞車嗰陣，我見到側邊嘅電單車左穿右插，令我諗返自己曾經有一架26，但咁啱舊年賣咗。

學揸電單車嘅主要原因都係受到幪面超人嘅影響，我覺得佢地揸住電單車個款好型，所以就去學。

當其時Yanny一樣都係好反對，仲同我嗌咗場交。

咁當然，到最後佢都係順我意俾我去學。





考完牌買咗部車，結果我揸咗一年都唔夠，跟住就賣咗。

因為我發覺揸電單車原來並無想象咁爽。

熱嗰陣揸出街，俾太陽曬到燶，落雨就更加唔使講，再加上啲泊車位又唔係好夠，於是我就嫌麻煩，索性賣咗佢。

諗返起頭先，假如我仲揸緊電單車嘅話，或者有機會趕得切。

於是乎，返到屋企，我第一時間匿入廁所，打開電話，摷返收我部車嗰間代理車廠嘅電話。

基本上買返原本嗰部就無可能架啦，不過平平地執部二手車應該都得嘅。

搵到電話，同間車廠約咗時間，到第二日趁Yanny去咗返工，而我自己又做曬手頭上嘅工作，跟住就偷偷地出去買車。

老實講，呢啲嘢一定係要先斬後奏架啦。





之前我買嗰架車主要係慳油，而今次我就決定買部馬力大，行得快嘅。

因為我要靠佢用最快嘅速度，帶我去到作戰現場。

價錢方面，二手就平過一手，只要三皮嘢鬆啲就有交易，呢個價錢同一粒豐胸丸差唔多。

所謂工欲善其事，必先利其器，假如架車幫到手，到時Yanny再升多幾個cup，咁就乜都抵返曬。

我開開心心買咗架車返去，停喺屋企附近，再收埋條車匙。

之後過咗幾日，居然完全無任何怪獸嘅消息，變身手環咁多日都無響過，爭啲以為佢壞咗。

正常嚟講，怪獸一定唔只兩隻咁少。我唯一可以做嘅就只有等，等怪獸出現。





等等等，等到嚟一個星期日嘅下晝，手腕戴住嘅變身手環終於有反應！

「啲啲啲！啲啲啲！」

盼星星盼月亮，我卒之都盼怪獸出現！

我第一時間衝入間房，拉開床下底個櫃桶，攞走條車匙，然後立即出發。

「你趕住去邊呀？」Yanny截停問我。

「仲使問，梗係打怪獸呀啦！」

「喂等埋我呀！我又去！」Yanny跟埋我一齊去。

落到樓下，我拖住Yanny過隔籬街口攞車。





對方見到架26，梗係嚇咗一跳：「下？呢架車你幾時買架？」

「呢啲嘢遲啲先講！上車先！」

坐上車，我撻著引擎，等Yanny上埋車，戴好頭盔，隨即就全速進發。