每消滅一隻怪獸，我條女對波就大一個cup！: 18

怪獸出現嘅地點喺荃灣大會堂對出嗰條馬路，路程唔算好遠。

我喺屯門公路向住荃灣一路直踩，時速超過八十公里。

Yanny坐喺後座緊緊咁攬實我，黑色嘅電單車猶如脫韁野馬，喺馬路上飛奔。

用咗大約8分鐘，我就順利到達目標所在地。

今次出現嘅怪物係一隻巨型大青蛙。





呱呱！呱呱！呱呱！

我先喺附近將架車停低，再叫Yanny行埋一邊。

現場已經有五個升cup戰士，變咗身戰鬥緊，分別係四男一女。

我估佢地應該住喺附近，所以先會咁快到。

雖然我唔係第一個嚟到，但我將會係第一個消滅呢隻怪獸嘅人！





「變！身！」

手指輕輕㩒一下變身掣，隨即銀白色嘅光芒包圍住我嘅全身，形成一件無堅不摧嘅戰鬥盔甲。

呱呱！隻大青蛙彈下跳下，佢條脷又長又尖，好似一條鞭咁發發聲，不停伸出嚟攻擊我地。

我同另外五個升cup戰士不停左閃右避。

「啊啊啊啊啊啊啊啊啊啊啊——」





喺避嘅同時，嗰五個升cup戰士一直大叫，提升戰鬥力。

有過一次戰鬥嘅經驗，我覺得除非有必勝嘅把握，否則唔好亂咁嗌，一定好好咁保護自己嘅喉嚨。

砰！！！

隻青蛙伸條脷出嚟，大大力隨便一發，打斷咗馬路中間一條行人天橋。

成條行人天橋當堂斷開咗兩截，橋上面嘅人分開兩邊逃走。

有個阿叔走唔切，結果喺中間斷開個位sir咗落去。

好彩嘅係，佢及時揸住石屎中間一條露出嘅鋼筋，暫時無跌落地，只係成個人半天吊。

「救命啊！救命啊！」個阿叔大嗌救命。





呢一刻我都想救佢，弊就弊在我唔識分身，顧得佢又顧唔到隻怪獸。

於是我嘅做法係盡快打低隻青蛙，然後再去救個阿叔。

呱呱！呱呱！

隻青蛙不停喺度彈嚟彈去，佢每跳一下，地下就震一次，路面更碎開一條條裂痕。

𡁻𡁻𡁻𡁻𡁻𡁻𡁻𡁻𡁻𡁻𡁻—

由於隻青蛙係咁郁嚟郁去，好難埋到佢身，因此嗰五個升cup戰士就選擇用離子炮遠攻。

問題係，佢地啲眼界都幾差下，瞄準又瞄得唔好，亂鳩咁射，連續好幾下都射唔中隻青蛙，反而射爆咗荃灣大會堂嘅建築外墻。





至於我就一路無出手，一直喺度觀察隻青蛙嘅動靜。

隻嘢除咗鍾意跳上跳落，同埋不停伸脷攻擊之外，佢仲會用條脷卷走停喺路邊嗰啲樹，再吞落肚。

我諗咗一陣，決定將計就計。

呱呱！呱呱！

隻青蛙彈下彈下跳咗一陣，突然間伸條脷出嚟，又再亂咁發。

我就趁住呢個機會，跳上去佢條脷度，主動送上門俾佢吞落肚。

「啊————」

當隻嘢合埋口，將我吞落肚嗰下，我聽到附近有人尖叫，無聽錯嘅話應該係Yanny把聲。





佢喺出面見到我俾隻嘢食咗，一定嚇到就嚟暈低咁滯。

但係呢個其實係我嘅策略。

順住青蛙嘅食道，我一路跌入佢個肚入面。

佢啲胃液同內臟黐黐笠笠，周圍環境又黑麻麻，仲飄散住一股腥臭味，成個環境都令人好唔舒服。

只不過唔緊要，因為我好快就會返出去。