每消滅一隻怪獸，我條女對波就大一個cup！: 30

喺剛才嘅戰鬥中，我為咗將戰鬥力提升到1000%，嗌爆咗喉嚨，結果打唔贏怪獸之餘，仲搞到喉嚨發炎。

第二日瞓醒，我嚴重失聲，跟住俾Yanny「的」咗去睇醫生。

醫生檢查完，開咗啲消炎藥俾我，仲叫我好好休息。

佢話如果我想快啲好返，咁最好一個禮拜之內都唔好大聲講嘢同大嗌。

老老實實，家陣我莫講話大聲講嘢，就連飲啖水喉嚨都會赤赤痛。





所以今鋪真係頭痕，把聲變成咁，短期內我都好難再靠大嗌提升戰鬥力。

咁點算好呢？

我為此而感到十分苦惱。

後來諗下諗下，我諗到一個解決辦法。

雖然我把聲嗌唔到，但我搵個人幫我嗌出嚟咁咪得囉。





返到屋企，我就叫Yanny大嗌，並且打算用電話錄低佢把聲，等到戰鬥嗰陣，我就播返佢把聲出嚟，提升我嘅戰鬥力。

「下？你想我大嗌？」

失聲嘅我用力咁點一點頭，回應對方。

Yanny嘅表情有啲唔情願，而我就好似一隻可憐嘅狗仔，用哀求嘅眼神望住佢。

對方猶豫咗一陣，最後都係心軟，答應我嘅請求。





我即刻打開電話嘅錄音功能，示意佢盡情咁嗌出聲。

Yanny吸一啖氣，聚精會神，對住我部電話大嗌：「啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊——」

女仔一般把聲都係比較尖，但就無男人把聲咁響。

我用敦促嘅眼神，示意Yanny再嗌大聲啲。

「啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊——」

佢用盡力氣尖叫大嗌。

雖然佢已經算係嗌到好大聲，但比起我突破1000%戰鬥力，甚至只係800%戰鬥力所嗌出嚟嘅聲音，仲係相差好遠。

因此我一定要佢歇斯底里，不顧一切咁嗌出嚟。





「啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊——」

Yanny聽我指示照做，嗌到面都紅曬。

只但係，佢呢個聲量最多就只係去到600%戰鬥力，

「叮噹！叮噹！叮噹！」

呢個時候，突然間有人㩒我地屋企嘅門鐘。

我同Yanny都嚇咗一跳，跟住打開門，見到隔籬屋個阿嬸棟咗喺度。

「我個仔做緊功課，唔該你地兩個可唔可以靜少少？」對方投訴我地聲音太滋擾。





由於我失咗聲講唔到嘢，所以就交俾Yanny應付。

「唔好意思，我地啱先見到好大隻曱甴，所以就一時驚到大嗌，唔小心嘈到你，好對唔住。」Yanny向隔籬屋個阿嬸say sorry。

「得架啦，大家成年人，我知你地做咩，但係我唔該你地要做都留返夜晚先做，日光日白嘈到拆天咁，俾啲細路聽到，會教壞佢架嘛。」個阿嬸以為我地啱先喺度扑嘢。

「下？唔係呀，我地頭先都無…」

「明架啦，唔使解釋咁多，總之你地以後唔好咁大聲就ok架啦！」個阿嬸唔聽Yanny解釋，直接行開，返過隔籬屋 。

其實又係嘅，嗌到咁大聲，始終都會嘈到人。

於是我向Yanny提議出去搵無人地方再嗌過。

「唔好啦，頭先嗌到咁已經俾人誤會，出到去俾人聽到，到時就仲尷尬，加上我嗌咗一陣，個喉嚨已經嗌到好乾好痛，所以真係唔明點解你可以堅持咁耐，次次戰鬥都嗌到咁大聲。」





Yanny拒絕我嘅提議，而我就再用楚楚可憐嘅眼神請求對方。

不過對方好決絕唔肯制，但就俾咗另一個提議我：「不如你試下搵其他聲音代替啦，例如好似係獅子嘅叫聲、又或者啲rock友鬼殺咁嘈唱歌嘅聲，諸如此類。」

係喎！Yanny真係一言驚醒夢中人！

呢個世界有咁多種聲音，一定有啲聲可以用嚟提升分貝力！