每消滅一隻怪獸，我條女對波就大一個cup！: 35

Z大俠開開心心拖住佢嘅N cup女朋友，離開球場。

相反，我地幾十個升cup戰士又一次食白果，所以笑唔出。

俾Z大俠截咗胡嘅梁sir，心入面就更加唔忿氣。

「頂！爭少少渣！爭少少我就打敗到隻怪獸，跟住我就揸到E奶！」梁sir一邊揸車，一邊憤憤不平。

由於我架電單車壞咗，所以我就同Yanny搭梁sir嘅順風車返屋企。





梁sir嘅未婚妻Judy亦都喺度，佢坐喺司機位隔籬。

「個死人Z大俠遲唔嚟早唔嚟，偏偏喺我就嚟得米嗰陣先嚟截胡！真係激死人！」

「可能呢啲就係天意，或者個天都覺得你揸到D cup就已經夠。」Judy同梁sir講。

「無可能，我一定會揸到E奶！」

「其實D cup都夠大啦，再大一個cup又爭得幾遠啫？」





「梗係爭得遠啦，E係大到一隻手都揸唔曬！」

「點解你咁肯定，你揸過咩？」

「我就係無揸過，所以先想試下！」

「我真係唔明點解你硬頸，係都要揸E cup？」

「我之前咪同你講過囉，因為喺我心目中，只有E cup或以上先稱得上係大波或者巨乳，而我就係要揸巨乳！」





「你將你對巨乳嘅定義降低一個cup咪得囉！」

「呢啲係原則問題，點可以話改就改？」

「點解唔得？」

「咪話咗呢個係原則問題…」

梁sir同Judy完全無視我同Yanny，雙方你一句我一句咁喺度嗌交，搞到成程車嘅氣氛都非常尷尬。

而我啪兩粒Z大俠俾嘅喉糖之後，感覺喉嚨真係舒服咗好多，不過都係諗唔明條友用手指指住頭頂、頸、心口同手掌，究竟係代表咩意思？

同埋佢係點樣做到唔使用喇叭，單靠把聲就可以將分貝力推到咁高？

依家Z大俠喺我心目中就好似一道跨唔過嘅高墻，墻後面係一排DEFGHIJ唔同size嘅乳房，只係佢擋住喺我前面，令我觸摸唔到。





食咗Z大俠嘅喉糖，再食埋醫生俾嘅消炎藥，過咗幾日，我嘅喉嚨終於好返。

「啊啊啊啊啊啊啊啊啊啊啊啊啊啊啊啊啊啊啊啊啊啊啊啊——」

然而，當我再放聲大嗌嘅時候，把聲比以前削弱咗，去唔返1000%。

就算我去鴨寮街買埋聲稱最勁最響嘅大喇叭，將把聲放到最大，結果都係得1600%戰鬥力，依然都係比唔上Z大俠。

條友身上件升cup戰衣已經轉化成黃金形態，保守估計，佢嘅戰鬥力應該突破咗3000%。

佢喺大球場打敗咗三隻怪獸，攞咗三粒紫石之後，接住又連續打敗多三隻怪物。

眨下眼，佢條女對波嘅cup數已經去到Q，由N女郎變成Q女郎。





（我唔知Z大俠條女叫咩名，所以就喺佢嘅Cup數後面加上「女郎」稱呼佢）

講真，淨係佢心口嗰兩舊肉搬上山都夠食一個月。

但見到佢心口孭住咁大舊肉，都仲可以挺直條腰，健步如飛，又不得不寫個服字。

只可以講，Z大俠同Q女郎真係天生一對，佢地兩個都係追求極致嘅強人。

咁當然，Z大俠都唔係完全無所不能，至起碼當啲怪獸出現喺啲偏遠嘅離島，佢就無辦法及時趕到現場。

有三隻怪獸出現喺石鼓州、東平洲、吉澳呢啲要搭船但又唔知幾時有船去到嘅地方，本來Z大俠趕唔切去，對我同梁sir嚟講都係一個好機會。

弊在就弊在呢幾個地方我地都未去過，亦都唔識點去，要臨時臨急先嚟查google，咁就已經遲咗其他人一步。

據說出現喺呢三個離島嘅怪獸都係廢廢地，無之前嗰啲獨角仙、箭豬、穿山甲嗰啲咁勁，結果因為地方太遠又唔知點去，咁又錯失咗三個機會。





家下怪獸嘅數量就得返十隻。

諗返起對上一次我成功攞到紫石，已經係唔知幾耐之前打敗嗰隻大青蛙，Yanny對波亦都停咗喺C cup好耐好耐。

呢種一路停滯不前嘅感覺，令我產生強烈嘅無力感。

老實講，唔好諗到J cup咁遠，Yanny有無機會升到D cup都成問題...

唉……