每消滅一隻怪獸，我條女對波就大一個cup！: 36

「做咩呀你？個樣咁呆嘅？」Yanny問我。

「無嘢呀。」我放低手上嘅啞鈴，然後用毛巾抹一抹額頭上嘅汗水

呢日我如常嚟到gym房操肌，增強體能。

經過一段時間嘅操練，我嘅肌肉量、體力同耐力都進步咗。變身後，基礎戰鬥力有所提升，只係仲係遠遠比唔上Z大俠。

同埋我依然未解通Z大俠提升分貝力嘅秘訣。





「啲啲啲！啲啲啲！」

呢個時候，變身手環突然間發出通報聲。

有怪獸出現！

對上三隻怪獸都出現喺離島，今次終於出現返喺市區，正位於鯉魚門舊石礦場。

至於我架錢7二手車亦都已經整返好，可以自己揸車過去。





轟隆！

天空烏雲密布，不時行雷閃電，好似就嚟想落雨咁。

我揸住電單車，搭載住Yanny，喺馬路上左穿右插，跟住地圖指示，向目的地飛奔而去。

「啲啲啲！啲啲啲！」變身手環仲喺度響緊。

今次嘅通報聲好似響得特別耐，而且除咗啲啲聲之外，仲聽到「Urgent」嘅字眼，令我下意識扭大油門，加速再加速。





石礦場位處海邊嘅位置，要去到目的地，首先要穿過鯉魚門一條海鮮街。

入面啲路好窄，但我都唔理咁多，直接揸住架車喺街市嘅橫街窄巷穿梭，隨即駛到近海嘅石灘小徑，再按照路牌指示，拐左拐右，輾轉嚟到石礦場嘅入口。

晴天博士已經到咗，仲有一班升cup戰士嘅眷侶都喺度。

當中包括Z大俠嘅女朋友，Q女郎。

佢坐咗喺地下度，身上著住升cup戰衣，但戰鬥甲嘅表面卻傷痕累累，膊頭同手臂嘅裝甲更加係裂開咗，甚至見到入面嘅血跡。

之前我有見過佢變身，不過就未見過佢出手戰鬥，因為Z大俠通常都係一招秒殺，根本唔使佢出手。

而呢刻嘅佢遍體鱗傷，估計佢頭先應該有參與戰鬥，依家就退下咗火線。

相反Z大俠就唔見蹤影，睇嚟佢應該仲戰鬥緊。





我心諗，呢個世界上竟然有Z大俠秒殺唔到嘅怪物？

「今次呢隻怪獸就係當日打爛鐵籠同鎖鏈，走甩出嚟嘅大猩猩，就係佢破壞我地藥廠喺異世界嘅基地，就係佢殺死曬我地所有研究人員！」

晴天博士一講完，天上面就閃過一道猛烈嘅閃電。

轟隆！

天空黑雲湧動，雖然仲未落雨，但風好大，吹嚟一陣濃烈嘅血腥味。

仲未見到隻怪獸，我卻已經感受到一股死亡嘅氣息。