每消滅一隻怪獸，我條女對波就大一個cup！: 37

怦怦！怦怦！

我心跳加速，有少少淆底，但唔嚟都嚟咗，無理由臨陣退縮。

我望一望Yanny，再望一望佢心口對C cup奶，然後抖啖大氣，心入面激勵一下自己：

朱大志！你得架！只要打敗到呢隻怪獸，咁就揸到D cup奶架啦！

我抖擻精神，穿過一條窄到只容納到一個身位嘅狹道，獨自一人向戰場進發。





呢度係一個廢置咗好耐嘅石礦場，入口生滿好似人咁高嘅蘆葦草。

我沿住草地小徑，撥開到擋路嘅野草向前行。

殊不知一撥開眼前嘅野草，隨之就見到一個血淋淋嘅畫面。

十幾個升cup戰士攤咗喺地下，佢地全部失去知覺，身上嘅升cup戰衣破敗不堪，外露出血肉模糊嘅身體，未知係生係死。

轟隆！





烏雲密佈嘅天空又閃過一道閃電。

當我再行前啲，就發現四周一片屍橫片野，一個個升cup戰士受傷重創，奄奄一息，躺臥喺血海之中。

濃烈嘅血腥味加上血淋淋嘅場面，令我嘔心反胃，幾乎忍唔住嘔咗出嚟。

我即刻轉移視線，向前遠望。

空曠嘅石礦場依山傍海，喺左手邊我見到一座開鑿咗一半嘅花崗岩石山，右手係海水拍岸嘅石灘，兩者中間隔住一大片廣闊嘅草地。





喺呢刻烏雲蓋頂、屍橫片野、風吹草勁嘅畫面中，只有一個人屹立不倒。

佢身上嘅升cup戰衣散發住金色嘅光芒，隱隱照耀住四周。

呢個人就係Z大俠。

平時下下都秒殺怪物嘅佢，今日身上嘅戰鬥裝甲竟然出現碎裂嘅痕跡。

但由於天色灰暗，加上啲草生得好高，又俾啲風吹到擺嚟擺去，不斷遮擋我嘅視線，所以我一時之間都見唔到隻大猩猩喺邊，淨係見到Z大俠揸住把金色嘅劍，打醒十分精神，警惕住身邊嘅風吹草動。

呢次係我第一次見到佢露出咁認真嘅表情。

下一秒，地下突然「咚」一聲，劇震咗一下。

一道黑影喺礦石山上跳咗落嚟，隨即好似一陣風咁撲向Z大俠。





如果無估錯嘅話，呢隻就係嗰隻兇殘嘅大猩猩。

我以為佢嘅身形好似King Kong咁巨型，點不知只係比一般大猩猩大隻少少，大約係兩米幾三米高。

雖然佢無之前啲怪獸咁大隻，但係佢嘅速度極快，快到影都無，連Z大俠都反應唔切，無辦法以招拆招，只能以側身閃避。

跟住隻大猩猩並無停低，繼續向前衝。

呢一次佢嘅目標係我！

「變身！」

我第一時間後退，並且立即㩒掣變身！





砰！！！！！！

隻嘢嘅速度真係好快，本來我同佢嘅距離起碼隔咗五十米，結果我呢頭啱啱變完身，件裝甲著咗半秒都無，嗰頭佢就殺到埋身，一拳盅埋嚟，狠狠咁打落我個心口度。

佢呢一拳嘅威力好比隕石撞地球，我心口堅硬嘅裝甲好似玻璃咁裂開。

之後我成個人飛起咗，眼前一黑，劇烈嘅痛楚令我當堂休克，失去意識。