每消滅一隻怪獸，我條女對波就大一個cup！: 38

「朱仔！醒醒啦喂！」

突然之間有人用力拍醒我。

我迷迷糊糊咁擘大眼，跟住見到梁sir。

「好啦，你終於都醒返啦。」梁sir慢慢扶起我。

但我個身一郁一郁，心口就傳嚟一陣劇痛。





拉高件衫，我發現胸口位又紅又腫，劇烈嘅痛楚更令我無辦法挺直上半身，只能夠挨落面前一舊大石上面。

啱先梁sir一嚟到石礦場，就見我俾隻怪獸打到暈低咗，而我暈低之後，本來隻猩猩想乘勝追擊，不過Z大俠突然出手偷襲，所以我先避過一劫。

之後梁sir就趁機會孭起我，匿到嚟岸邊石灘一舊大石後面。

轟隆！

陰暗嘅天空又閃過一下旱天雷。





匿喺大石後面，離遠望過去，我見到Z大俠正同隻大猩猩激戰緊。

Z大俠手上嘅合金劍劃出一道金色嘅弧線，劈向大猩猩，但隻猩猩身手敏捷咁退後避開，同時反身勾拳還擊。

Z大俠嘅反應好快，立即用肘頭隔擋。

噔！！！

拳頭對肘頭，兩道力猛然對撞，空氣中馬上產生咗強烈嘅震蕩聲。





「Raugh！」

下一秒，隻猩猩發出野獸嘅叫聲，並連環出拳，對住Z大俠追身攻擊。

佢嘅拳頭猶如粗礦嘅大鐵鎚，每揮動一下都帶起一陣拳風。

更厲害嘅係佢揮拳速度好快，快到好似一個職業拳擊手咁，左右左右連環出拳。

Z大俠Keep住一路後退閃避，我以為佢會俾隻怪獸逼到去死角，點不知佢突然一個迴旋轉身，手持合金劍反手橫腰一斬。

換轉係平時，Z大俠呢一招應該已經攔腰將隻怪獸斬成兩半，但呢隻大猩猩靈敏度極高，佢以0.幾秒嘅反應時間縮後。

結果銳利嘅刀鋒掠過，只係削到表皮，剃走咗佢幾執毛，不過就無傷到入肉。

真係估唔到呢隻大猩猩竟然可以同Z大俠打成均勢。





「好呀！係咁落去就啱啦！」梁sir匿喺大石後面睇得好肉緊。

至於我嘅心口受咗傷，身上件裝甲亦都爛咗，假如繼續戰鬥嘅話，一定凶多吉少。

但若然我放棄呢次戰鬥嘅機會，咁Yanny就無辦法變成D cup，甚至距離J cup又遠咗一步。

呢一刻嘅我內心掙扎，與此同時，Z大俠就同大猩猩繼續打得燦爛。

「哼啊啊啊啊啊啊——」

Z大俠驚天動地大嗌一聲，從二十米左右嘅距離，向敵人發射出威力強大嘅離子炮。

兩道金色嘅衝擊波猶如兩條兇猛嘅金龍，吞噬草地上嘅蘆葦草，以咄咄逼人嘅氣勢攻擊目標。





「Raugh！」大猩猩雙腳𨂽地，雙手咚咚咚大力拍打心口，擺出一副無所畏懼嘅姿態。

結果面對住驚濤駭浪嘅衝擊波，大猩猩左右手同時猛力揮出直拳，一招雙龍出海，直接用出拳嘅勁道抵消咗衝擊波嘅破壞力。

我嚇咗一跳，完全無諗過Z大俠呢招一擊必殺嘅衝擊波，竟然咁樣俾人化解咗。

但Z大俠甚至係我隔籬嘅梁sir，就唔係特別大反應，睇嚟喺剛才嘅戰鬥中，佢地已經見識過一次。